មហាយក្សចិន ជំរុញឱ្យក្រុមហ៊ុនផលិតរថយន្តរដ្ឋរបស់ខ្លួនច្របាច់បញ្ចូលគ្នា ដើម្បីជំរុញផលិតកម្មរថយន្តអគ្គិសនី

លោក កូ ពីង (Gou Ping) អនុប្រធានគណៈកម្មការត្រួតពិនិត្យ និងគ្រប់គ្រងទ្រព្យសម្បត្តិរដ្ឋនៃក្រុមប្រឹក្សារដ្ឋ បាននិយាយនៅវេទិកាយានយន្តអគ្គិសនីក្នុងទីក្រុងប៉េកាំងថា រដ្ឋាភិបាលចិននឹងលើកទឹកចិត្តដល់ការរៀបចំរចនាសម្ព័ន្ធឡើងវិញ និងការបង្រួបបង្រួមគ្នាក្នុងចំណោមក្រុមហ៊ុនផលិតរថយន្តខ្នាតធំរបស់រដ្ឋ ដើម្បីបន្តការផ្លាស់ប្តូរទៅរកការផលិតរថយន្តអគ្គិសនី។

ផែនការលើកទឹកចិត្តឱ្យក្រុមហ៊ុនផលិតរថយន្តរដ្ឋច្របាច់បញ្ចូលគ្នានេះ ត្រូវបានមន្ត្រីជាន់ខ្ពស់រូបនេះអះអាងថា ធ្វើឡើងក្នុងគោលបំណងប្រមូលផ្តុំការអភិវឌ្ឍ និងធនធានផលិតកម្ម ដើម្បីកែលម្អការប្រកួតប្រជែងក្នុងចំណោមក្រុមហ៊ុនផលិតរថយន្តនៅទូទាំងពិភពលោក។ ស្របពេលទីផ្សារបរទេសបានបង្កើនការប្រុងប្រយ័ត្នកាន់តែខ្លាំងចំពោះរថយន្ត EV របស់ចិន ដែលមានតម្លៃទាបនោះ រដ្ឋាភិបាលចិន សម្លឹងឃើញការលើកទឹកចិត្តដល់ក្រុមហ៊ុននានា ក្នុងការកែលម្អគុណភាពយានយន្ត និងប្រកួតប្រជែងឱ្យកាន់តែមានប្រសិទ្ធភាព។

ក្រុមហ៊ុន Changan និងក្រុមហ៊ុន Dongfeng បាននិយាយកាលពីខែកុម្ភៈថា ក្រុមហ៊ុនមេរបស់ពួកគេនីមួយៗកំពុងរៀបចំផែនការក្នុងការរៀបចំរចនាសម្ព័ន្ធឡើងវិញ ជាមួយនឹងសហគ្រាសរដ្ឋមួយផ្សេងទៀត​។

ក្រុមហ៊ុន ឆេងហ្គិន (Changan) ក្រុមហ៊ុន ដុងហ្វេង (Dongfeng) និងក្រុមហ៊ុន ហ្វោ (FAW) ក្នុងឆ្នាំ២០១៧ បានដាក់បញ្ចូលគ្នានូវភាពជាដៃគូយុទ្ធសាស្ត្រលើការអភិវឌ្ឍយានយន្តអគ្គិសនី ហើយបានផ្លាស់ប្តូរ ដើម្បីសហការកាន់តែជិតស្និទ្ធចាប់តាំងពីពេលនោះមក ដោយមាននាយកប្រតិបត្តិផ្លាស់វេនគ្នាក្នុងចំណោមក្រុមហ៊ុនទាំងបីនេះ៕

អត្ថបទ៖ សុខ មង្គល