តើមានកត្តាចម្បងអ្វីធ្វើឱ្យតម្លៃផ្ទះជួលនៅចិនធ្លាក់ចុះខ្លាំងបំផុតមិនធ្លាប់មានក្នុងពេល៤ឆ្នាំមកនេះ?

ទិន្នន័យពីក្រុមហ៊ុនស្រាវជ្រាវមានឈ្មោះថា Wind បានបង្ហាញថា តម្លៃផ្ទះជួលនៅក្នុងទីក្រុងធំៗចំនួន១០០ទូទាំងប្រទេសចិន មានកម្រិតទាបត្រឹមតែ៣៦១ដុល្លារអាម៉េរិក ក្នុង១០០ម៉ែត្រការ៉េ កាលពីអំឡុងខែវិច្ឆិកា កន្លងទៅនេះ ដែលជាតម្លៃទាបបំផុតមិនធ្លាប់មានចាប់តាំងពីខែវិច្ឆិកា ឆ្នាំ២០២០ មក។

តួយ៉ាង នៅក្នុងទីក្រុងឈីតុង (Qidong) ខេត្តជាំងស៊ូ (Jiangsu) អាផាតម៉ិនដែលមានទំហំ៥១ម៉ែត្រការ៉េ ដែលបំពាក់ដោយម៉ាស៊ីនត្រជាក់មានតម្លៃត្រឹមតែ៨២ដុល្លារអាម៉េរិក ក្នុងមួយខែប៉ុណ្ណោះ។ អាផាតម៉ិនដែលសាងសង់ដោយក្រុមហ៊ុនចិន China Evergrande Group ដែលជាក្រុមហ៊ុនអភិវឌ្ឍន៍ចលនទ្រជំពាក់បំណុលច្រើនបំផុតក្នុងពិភពលោក ជាមួយនឹងបំណុលគរដូចភ្នំរហូតដល់ទៅជាង៣០០ពាន់លានដុល្លារអាម៉េរិក គឺថោកជាងការស្នាក់ក្នុងសណ្ឋាគារមួយយប់នៅក្នុងប្លុកអគារតែមួយទៅទៀត។

យោងតាមភ្នាក់ងារអចលនទ្រព្យម្នាក់បានឱ្យដឹងថា អាផាតម៉ិនដែលធ្លាប់តែមានតម្លៃជិត៥ម៉ឺន៥ពាន់ដុល្លារអាម៉រិកក្នុងមួយយូនីត ពេលនេះលក់ក្នុងតម្លៃត្រឹមតែជាង២ម៉ឺន៧ពាន់ដុល្លារអាម៉េរិកប៉ុណ្ណោះ ប៉ុន្តែទោះជាអាផាតម៉ិននេះធ្លាក់ថ្លៃខ្លាំងបែបនេះយ៉ាងណាក្ដី ក៏ម្ចាស់ផ្ទះត្រូវដាក់ជួលរហូតដល់ទៅជិត៣០ឆ្នាំឯណោះទម្រាំរួចថ្ងៃទិញ។

សូមបញ្ជាក់ថា ការផ្គត់ផ្គង់លើសតម្រូវការ គឺជាកត្តាចម្បងដែលធ្វើឱ្យតម្លៃផ្ទះជួលធ្លាក់ចុះខ្លាំងទូទាំងប្រទេសចិន ហើយទន្ទឹមនេះទិន្នន័យបង្ហាញថា គម្រោងលំនៅឋានរបស់ក្រុមហ៊ុន Evergrande នៅក្រុងឈីតុង (Qidong) មានរហូតដល់ទៅ៤ម៉ឺនយូនីតឯណោះ៕

ដោយ: តែម សុខុម