ក្រុមហ៊ុនអាកាសចរណ៍រដ្ឋចិន ខាតបង់រាប់រយលានដុល្លារ ចំពេលមានភាពមិនច្បាស់លាស់នៃការកើតមានសង្គ្រាមពាណិជ្ជកម្ម

ក្រុមហ៊ុនអាកាសចរណ៍ China Southern Airlines ដែលជាក្រុមហ៊ុនដ៏ធំបំផុត១ក្នុងចំណោមក្រុមហ៊ុនធំៗទាំងបីរបស់រដ្ឋចិន បានខាតបង់ប្រាក់ប្រមាណ១០៣លានដុល្លារ នៅត្រីមាសទី១ឆ្នាំនេះ ពោលគឺជិតស្នើនឹងប្រាក់ចំណេញសុទ្ធរបស់ក្រុមហ៊ុននេះក្នុងរយៈពេលដូចគ្នាកាលពីឆ្នាំ២០២៤។ ប្រាក់ចំណូលប្រចាំត្រីមាសរបស់ក្រុមហ៊ុននេះ បានធ្លាក់ចុះ២,៧% នៅត្រីមាសទី១ឆ្នាំនេះ មកនៅត្រឹមជិត៦ពាន់លានដុល្លារ។

ក្រុមហ៊ុនមានមូលដ្ឋាននៅទីក្រុងក្វាងចូវមួយនេះ បានសន្មតការខាតប្រាក់នេះ គឺបណ្ដាលមកពីកត្តាជាច្រើនរួមទាំងការផ្លាស់ប្តូរប្រជាសាស្រ្តអ្នកធ្វើដំណើរ សម្ពាធប្រកួតប្រជែងពីបណ្តាញផ្លូវដែកល្បឿនលឿន ឧបសគ្គនៃខ្សែច្រវាក់ផ្គត់ផ្គង់សកល និងការធ្លាក់ចុះប្រាក់យន់របស់ចិន។

ចំណែកក្រុមហ៊ុនអាកាសចរណ៍រដ្ឋចំនួន២ទៀត ក៏ស្ថិតក្នុងស្ថានភាពស្រដៀងគ្នានេះដែរ។ ជាក់ស្ដែងក្រុមហ៊ុនអាកាសចរណ៍ Air China បានមើលឃើញប្រាក់ចំណូលរបស់ខ្លួនប្រចាំត្រីមាសទីមួយឆ្នាំនេះធ្លាក់ចុះ០,១% បើធៀបនឹងរយៈពេលដូចគ្នាកាលពីឆ្នាំមុន ដោយធ្លាក់មកនៅត្រឹម៥,៥ពាន់លានដុល្លារ ខណៈដែលការខាតបង់របស់ខ្លួនបានកើនឡើងពីជាង២២០លានដុល្លារដល់ជាង២៧៥លានដុល្លារ។

ទន្ទឹមនេះដែរ ក្រុមហ៊ុនអាកាសចរណ៍ China Eastern ដែលមានមូលដ្ឋាននៅទីក្រុងសៀងហៃ បានកត់ត្រាពីការកើនឡើងនូវប្រាក់ចំណូល០,៧% ដោយឡើងដល់ជាង៤,៥ពាន់លានដុល្លារ ប៉ុន្តែការខាតបង់សុទ្ធរបស់ក្រុមហ៊ុននេះបានឡើងដល់ជិត១៣៧លានដុល្លារអាម៉េរិក។

បើតាមឯកសាររបស់ក្រុមហ៊ុន China Eastern ដែលផ្ញើទៅកាន់ផ្សារហ៊ុនក្រុងហុងកុង និងសៀងហៃ បានបង្ហាញពីចំណុចរួមគ្នាមួយ ដែលនាំឱ្យមានការខាតបង់ប្រាក់របស់ក្រុមហ៊ុនទាំងបីនេះ គឺការការប្រកួតប្រជែងកាន់តែខ្លាំងឡើងនៅក្នុងទីផ្សារអាកាសចរណ៍៕

ដោយ៖ សុខ មង្គល