កូរ៉េខាងត្បូង ត្រៀមមូលនិធិ៣៤ពាន់លានដុល្លារ ដើម្បីជួយគាំទ្រក្រុមហ៊ុនបច្ចេកវិទ្យាក្នុងស្រុក
រដ្ឋាភិបាលកូរ៉េខាងត្បូងនឹងបង្កើតមូលនិធិគោលនយោបាយមានទំហំរហូតដល់៣៤ពាន់លានដុល្លារ ដើម្បីជួយផ្តល់ការគាំទ្រដល់ក្រុមហ៊ុនក្នុងស្រុកលើវិស័យបច្ច…
អាចចាត់ទុកជារឿងចៃដន្យមួយ ដែលមហាយក្សចិន និងសហរដ្ឋអាម៉េរិក បានរៀបចំកិច្ច ប្រជុំ សភាក្នុងថ្ងៃតែមួយ ហើយមេដឹកនាំប្រទេសទាំងពីរបានថ្លែងសុន្ទរកថាពីផែនការ និងគោលនយោបាយ ទៅកាន់ថ្នាក់ដឹកនាំ និងសមាជិកសភា ក៏ដូចជាពិភពលោកល្អៀងគ្នាត្រឹមតែប្រមាណ១ម៉ោង។ ទោះបីមេដឹកនាំទាំងពីរឡើងថ្លែងសុន្ទរកថាក្នុងថ្ងៃតែមួយ តែក្រុមអ្នកវិភាគមើលឃើញថា សកម្មភាព និងខ្លឹមសារដែលមេដឹកនាំទាំងពីរបានបង្ហាញមានការផ្ទុយគ្នាស្រឡះ។
នៅក្នុងអំឡុងថ្លែងសុន្ទករថា មេដឹកនាំរបស់មហាអំណាចទាំងពីរបានបង្ហាញពីវិធីសាស្រ្តផ្សេងៗគ្នា ដើម្បីសម្រេចបាននូវមហិច្ឆតានយោបាយ សេដ្ឋកិច្ច និងពាណិជ្ជកម្មរៀងៗខ្លួន។ ប៉ុន្តែក្រុមអ្នកវិភាគមើលឃើញថា មេដឹកនាំចិនហាក់បានបង្ហាញជំហរ និងគោលនយោបាយមានភាពច្បាស់លាស់ និងហ្មត់ចត់ជាងមេដឹកនាំសហរដ្ឋអាម៉េរិក ដែលបានបង្ហាញពីទស្សនៈវិស័យ និងគោលនយោបាយ ដែលអាចឈានទៅរកប្រព័ន្ធសេដ្ឋកិច្ចមានភាពបែកបាក់។
លោក លី ឈាង នាយករដ្ឋមន្រ្តីចិនដែលបានថ្លែងទៅកាន់សភាប្រជាជនរបស់ខ្លួនដែលមានសមាជិក៣ពាន់នាក់តំណាងឲ្យប្រជាពលរដ្ឋ១,៤ពាន់លាននាក់ ដែលមានលោក ស៊ី ជិនពីង អង្គុយនៅក្បែរ បានជំរុញឲ្យចិនរួបរួមគ្នាក្នុងការជម្នះឧបសគ្គ ដើម្បីឈានទៅសម្រេចជោគជ័យរបស់ជាតិដ៏រស់រវើកនាពេលអនាគត។
ដោយឡែក សម្រាប់លោក ដូណាល់ ត្រាំ ប្រធានាធិបតីសហរដ្ឋអាម៉េរិកវិញ បានថ្លែងសុន្ទរកថាទៅកាន់សភា ដែលមានសមាជិក៥០០នាក់តំណាងឲ្យប្រជាពលរដ្ឋ៣៤០លាននាក់ ពីគោលនយោបាយដំឡើងពន្ធលើទំនិញនាំចូលពីប្រទេសនានាក្រោមមហិច្ឆតាធ្វើឱ្យអាម៉េរិកក្លាយជាប្រទេសអស្ចារ្យ។ ប៉ុន្តែផែនការនេះត្រូវបានអ្នកវិភាគមើលឃើញថា អាចទាញពិភពលោកឱ្យធ្លាក់ចូលទៅក្នុងសង្គ្រាមពាណិជ្ជកម្ម និងការបែងចែកប្លុកសេដ្ឋកិច្ច។
សុន្ទរកថារយៈពេល៥៥នាទីរបស់លោក លី ឈាង ភាគច្រើនផ្តោតលើការអនុវត្តគោលនយោបាយរបស់រដ្ឋាភិបាលចិនកាលពីឆ្នាំ២០២៤ និងផែនការសម្រាប់ឆ្នាំ២០២៥ ហើយក្រោយថ្លែងចប់ ប្រតិភូរាប់ពាន់នាក់រួមទាំងលោក ស៊ី ជិនភីង ផងបានអបអរសាទរ។ ប៉ុន្តែនៅក្នុងសុន្ទរកថា១ម៉ោង៤០នាទីរបស់លោក ដូណាល់ ត្រាំ ឯណោះវិញរាល់ការថ្លែងទទួលបានការសាទរពីសមាជិកសភាមកពីគណបក្សសាធារណរដ្ឋ ប៉ុន្តែសមាជិកមកពីគណបក្សប្រជាធិបតេយ្យភាគច្រើនអង្គុយនៅស្ងៀម ហើយម្តងម្កាលស្រែកតវ៉ារហូតធ្វើឱ្យតំណាងរាស្ត្រម្នាក់ត្រូវបានបណ្តេញចេញពីអង្គប្រជុំ។
នៅក្នុងអំឡុងថ្លែងសុន្ទរកថា លោក ដូណាល់ ត្រាំ បានហៅលោក ចូ បៃដិន ថា ជាប្រធានាធិបតី ដែលអាក្រក់បំផុតរបស់សហរដ្ឋអាម៉េរិក ហើយបានឆ្លៀតអួតពីគោលនយោបាយដំឡើងពន្ធរបស់ខ្លួនថា នឹងធ្វើឲ្យឧស្សាហកម្មអាម៉េរិកមានភាពប្រសើរឡើង៕
ដោយៈ សរ សុជាតិ
