ធនាគារកណ្តាលចិន បានចាក់បញ្ចូលសាច់ប្រាក់រហូតដល់ទៅ៧០ពាន់លានដុល្លារអាម៉េរិកបន្ថែមទៀតចូលទៅក្នុងប្រព័ន្ធធនាគារកាលពីអំឡុងខែតុលា កន្លងទៅថ្មីៗនេះតាមរយៈកិច្ចព្រមព្រៀងទិញយកមូលបត្របំណុលត្រលប់មកវិញក្នុងរយៈពេល៦ខែ ដែលជាឧបករណ៍សន្ទនីយភាពថ្មីមួយទើបបង្កើតឡើង ដើម្បីធានាបាននូវសន្ទនីយភាពគ្រប់គ្រាន់។
នេះជាលើកទី១ ហើយដែលធនាគារកណ្តាលចិន បានលាតត្រដាងពីការប្រើប្រាស់ឧបករណ៍សន្ទនីយភាពថ្មីរបស់ខ្លួន ដែលទើបដាក់ចេញនៅសប្តាហ៍នេះ។ ឧបករណ៍សន្ទយនីភាពនេះអនុញ្ញាតឱ្យធនាគារកណ្ដាលចិនទិញមូលបត្របំណុលផ្សេងៗពីបណ្ដាគ្រឹះស្ថានហិរញ្ញវត្ថុរហូតដល់មួយឆ្នាំ រួមទាំងមូលបត្របំណុលរដ្ឋាភិបាល និងមូលបត្របំណុលក្រុមហ៊ុនសាជីវកម្មផងដែរ។
ការចាក់បញ្ចូលសាច់ប្រាក់នេះ ជួយធនាគារនានាការគ្រប់គ្រងការខ្វះខាតសាច់ប្រាក់ដែលមានរហូតដល់ជាង៦៧ពាន់លានដុល្លារអាម៉េរិក ក្នុងរយៈពេល៣ខែមកនេះតាមរយៈឥណទានគោលនយោបាយលរយៈពេល១ឆ្នាំរបស់ធនាគារកណ្ដាលចិន។ ការអន្តរាគមន៍នេះបានធ្វើឡើង ខណៈដែលធនាគារនានាបានប្រឈមនឹងសម្ពាធហិរញ្ញប្បទានកាន់តែខ្លាំងឡើង ស្របពេលដែលប្រាក់បញ្ញើសន្សំបានធ្លាក់ចុះដោយសារអ្នកដាក់ប្រាក់បញ្ញើសន្សំបានបង្វែរលុយសន្សំរបស់ខ្លួនទៅវិនិយោគលើភាគហ៊ុន។
អ្នកជំនាញបានលើកឡើងថា ការរក្សាសាច់ប្រាក់ឱ្យមានគ្រប់គ្រាន់នៅក្នុងទីផ្សារ គឺចាំបាច់ណាស់ដើម្បីទ្រទ្រង់ដល់សេដ្ឋកិច្ចដែលកំពុងជួបបញ្ហាតម្រូវការក្នុងស្រុកធ្លាក់ចុះខ្លាំង និងវិបត្តិអចលនទ្រព្យដែលកំពុងបន្តកើតមាន។
សូមបញ្ជាក់ថា ប្រទេសចិន គ្រោងនឹងបោះផ្សាយមូលបត្របំណុលរដ្ឋាភិបាលបន្ថែមទៀតដែលជាផ្នែកមួយនៃកញ្ចប់វិធានការស្ដារសេដ្ឋកិច្ច ដែលកត្តានេះអាចនឹងធ្វើឱ្យខ្វះសាច់ប្រាក់ ដែលបណ្ដាធនាគារមានសម្រាប់ផ្ដល់ឥណទានដល់គ្នាទៅវិញទៅមក៕
ដោយ: តែម សុខុម
