មនុស្ស ៤ នាក់ ដែលដឹងរឿងផ្ទាល់បាននិយាយថា នៅក្នុងការប៉ុនប៉ងដ៏កម្រមួយដើម្បីជំរុញប្រាក់យ័នរបស់ប្រទេសចិនឱ្យមានតម្លៃ, និយ័តករដែលគ្រប់គ្រងដោយធនាគារកណ្តាលចិន បានប្រាប់ធនាគាររបស់រដ្ឋធំៗឱ្យបញ្ចុះអត្រាការប្រាក់ចំពោះប្រាក់បញ្ញើជារូបិយប័ណ្ណដុល្លារ។
វិធានការនេះអាចជួយលើកទឹកចិត្តដល់ក្រុមហ៊ុនចិន ជាពិសេសក្រុមហ៊ុននាំចេញ ក្នុងការទូទាត់បង្កាន់ដៃប្តូរប្រាក់បរទេសជាប្រាក់យន់ ដែលបានធ្លាក់ចុះដល់កម្រិតទាបបំផុតក្នុងរយៈពេលប្រាំមួយខែ បើធៀបនឹងប្រាក់ដុល្លារ។ រូបិយប័ណ្ណអាមេរិកដែលឡើងថ្លៃ និងការដំឡើងអត្រាការប្រាក់របស់ធនាគារកណ្ដាលអាមេរិក បានជំរុញឱ្យក្រុមហ៊ុនចិនជាច្រើនរក្សាទុកបង្កាន់ដៃប្រាក់ដុល្លារ។
អត្ថបទគួរអាន
អត្រាការប្រាក់ដែលផ្តល់ដោយធនាគារចិនលើប្រាក់បញ្ញើជារូបិយប័ណ្ណដុល្លារចាប់ពី ៥ម៉ឺនដុល្លារឡើងទៅ ឥឡូវនេះនឹងត្រូវកំណត់ឱ្យនៅត្រឹម ៤,៣%។ នេះបើយោងតាមប្រភពដែលសុំមិនបញ្ចេញឈ្មោះដោយសារតែពួកគេមិនត្រូវបានអនុញ្ញាតឱ្យនិយាយទៅកាន់ប្រព័ន្ធផ្សព្វផ្សាយ។ពួកគេបាននិយាយថាការផ្លាស់ប្តូរនេះបានចូលជាធរមានកាលពីថ្ងៃអង្គារ។ ពីមុន អត្រាការប្រាក់បញ្ញើជារូបិយប័ណ្ណដុល្លារគឺ ៥,៣%។
សូមជម្រាបថា ប្រាក់យ័នរបស់ចិនបានធ្លាក់ថ្លៃដោយសារកត្តាមួយចំនួន ជាអាទិ៍ទិន្នន័យសេដ្ឋកិច្ចខ្សោយ, ភាពខុសគ្នាកាន់តែធំនៃទិន្នផលហិរញ្ញវត្ថុបើធៀបជាមួយសហរដ្ឋអាមេរិក, ការទូទាត់ភាគលាភសាជីវកម្មដែលខិតជិតមកដល់, និងការបន្តមានរំហូរចេញនៃមូលធនតាមរយៈការលក់ភាគហ៊ុននិងសញ្ញាប័ណ្ណបរទេស។
តម្លៃប្រាក់យ័នបានធ្លាក់ចុះជាង ៦% បើធៀបនឹងប្រាក់ដុល្លារ ចាប់តាំងពីពេលដែលវាបានឡើងថ្លៃខ្ពស់ក្នុងខែមករា ស្របពេលដែលប្រទេសចិនបានបើកព្រំដែនរបស់ខ្លួនឡើងវិញ។ ការធ្លាក់ថ្លៃក្នុងអត្រាប៉ុណ្ណោះ បានធ្វើឱ្យប្រាក់យ័នរបស់ចិនក្លាយជារូបិយប័ណ្ណអាស៊ីមួយដែលមានដំណើរអាក្រក់បំផុតនៅឆ្នាំនេះ។ រូបិយប័ណ្ណចិនត្រូវបានជួញដូរចុងក្រោយនៅក្នុងតម្លៃជិត ៧,១២ យ័ន ក្នុង ១ ដុល្លារអាមេរិក៕
ប្រែសម្រួលដោយ៖ ឯម មាឃ
