ការវាយលុករបស់រថយន្តអគ្កិសនីចិន នៅប្រេស៊ីល កំពុងគំរាមកំហែងដល់បណ្ដាក្រុមហ៊ុនផលិតរថយន្តលោកខាងលិច

សមាគមក្រុមហ៊ុនចែកចាយរថយន្តប្រេស៊ីល ហ្វេណាប្រេវ (Fenabrave) បានរាយការណ៍ថា ការលក់ចេញរថយន្តលក្ខណៈគ្រួសារ និងរថយន្តដឹកទំនិញធុនតូចនៅក្នុងប្រទេសប្រេស៊ីល មានចំនួនសរុប២០ម៉ឺន៨ពាន់គ្រឿង ក្នុងខែមេសា។ ចំនួននេះមានការកើនឡើង៣៧% ក្នុងនោះក្រុមហ៊ុនផលិតរថយន្តលោកខាងលិច រួមមាន ក្រុមហ៊ុន ហ្វីយ៉ាត់ (Fiat) របស់អ៊ីតាលី ក្រុមហ៊ុន Volkswagen របស់អាល្លឺម៉ង់ និងក្រុមហ៊ុន General Motors របស់អាម៉េរិក កាន់កាប់តំណែងកំពូលទាំង៣ជាមួយនឹងការក្ដោបក្ដាប់ចំណែកទីផ្សាររួមបញ្ចូលគ្នា៥០% នៅក្នុងប្រទេសនេះ។

ទោះជាយ៉ាងណា បណ្ដាក្រុមហ៊ុនផលិតរថយន្តចិន បាននិងកំពុងសម្ងំដណ្ដើមចំណែកទីផ្សាររបស់ក្រុមហ៊ុនលោកខាងលិចធំៗទាំង៣នេះដោយស្ងាត់ៗ។ យោងតាមទិន្នន័យបង្ហាញថា ក្រុមហ៊ុនផលិតរថយន្តធំៗរបស់ប្រទេសចិន រួមមានក្រុមហ៊ុន BYD ក្រុមហ៊ុន Chery Automobile ក្រុមហ៊ុនចិន Great Wall Motor បានកាន់កាប់ចំណែកទីផ្សាររួមបញ្ចូលគ្នា៧%នៅប្រទេសប្រេស៊ីល ក្នុងខែមេសា។

ក្នុងរយៈពេល៤ខែដើមឆ្នាំ២០២៤ នេះ បណ្ដាក្រុមហ៊ុនផលិតរថយន្តចិនលក់រថយន្តថ្មីៗរបស់ខ្លួនបានចំនួន៤ម៉ឺន៨ពាន់គ្រឿងនៅក្នុងប្រទេសប្រេស៊ីល ពោលគឺកើនឡើងដល់ទៅ៨ដងបើធៀបនឹងរយៈពេលដូចគ្នាកាលពីឆ្នាំមុន។ ចំណែកទីផ្សារកាន់កាប់ដោយក្រុមហ៊ុនចិនបានកើនឡើងពីក្រោម៣%សម្រាប់ពេញមួយឆ្នាំ២០២៣។

ដើម្បីដណ្ដើមចំណែកទីផ្សារទាំងក្នុងស្រុក និងក្រៅប្រទេស បណ្ដាក្រុមហ៊ុនផលិតរថយន្តចិន បានខិតខំប្រឹងប្រែងយ៉ាងខ្លាំងក្នុងការផលិតរថយន្ត (EV) និងរថយន្ត Hybrid ដោយពង្រឹងទាំងការឌីហ្សាញ និងគុណភាពនៃការផលិត ព្រមទាំងលក់ក្នុងតម្លៃធូរថ្លៃផងដែរ៕

ដោយ: តែម សុខុម