តើវិស័យអចលនទ្រព្យនៅចិន កំពុងប្រឈមមុខនឹងបញ្ហាអ្វីថ្មីបន្ថែមទៀតនៅពេលនេះ?

ប្រជាពលរដ្ឋចិន ប្រមាណ១ពាន់៥រយនាក់ បានអះអាងថា ពួកគេបានបង់ប្រាក់ផ្តាច់លើការទិញលំនៅស្ថានតាំងតែពីឆ្នាំ២០១៩ ប៉ុន្តែមកទល់ពេលនេះពួកគេនៅមិនទាន់ទទួលបានលំនៅឋាននៅឡើយទេ ហើយសូម្បីតែរូបរាងលំនៅឋាន ក៏មិនទាន់បានឃើញដូចគ្នាផងដែរ។ អ្នកទិញផ្ទះមួយចំនួនសុទ្ធតែបានអះអាងដូចគ្នាថា ពួកគេលែងចង់បានផ្ទះដែលពួកគេបានទិញទាំងនោះទៀតហើយ ពោលគឺបច្ចុប្បន្នពួកគេកំពុងធ្វើយ៉ាងណាយកលុយដែលខ្លួនបានបង់ទាំងនោះមកវិញតែប៉ុណ្ណោះ។ អ្នកទិញផ្ទះទាំងនោះមានអារម្មណ៍ថា ពេលនេះពួកគេត្រូវបានក្រុមហ៊ុនអភិវឌ្ឍន៍បោកប្រាស់។

ពាក់ព័ន្ធនឹងបញ្ហានេះ លោកស្រី ដាន វ៉ាង (Dan Wang) មន្រ្តីនៅធនាគារ Hang Seng Bank បានចាត់ទុកករណីនេះ គឺជាបញ្ហាក្រៅឆាកមួយទៀត ដែលបានឆ្លុះពីបញ្ចាំងពីស្ថានភាពរបស់ អ្នកអភិវឌ្ឍន៍អចលនទ្រព្យនៅក្នុងប្រទេសចិន។ សម្រាប់អ្នកជំនាញរូបនេះ អ្វីដែលបានកើតឡើងនៅទីក្រុង ធៀនជីង មិនមែនជាបាតុភូតប្លែកនោះទេ ហើយលោកស្រីជឿជាក់ថា នៅពេលខាងមុខវានឹងមានបញ្ហាថ្មីៗបន្ថែមទៀត។

មកដល់ពេលនេះគេបានប៉ាន់ប្រមាណថា អ្នកដែលមានស្ថានភាពស្រដៀងគ្នានឹងពលរដ្ឋ១ពាន់៥រយនាក់ នៅទីក្រុងធៀនជីង គឺមានលើសនេះ ខណៈដែលលំនៅឋានដែលគេលក់មុនគម្រោងចាប់ផ្តើមសាងសង់មានរហូតដល់ទៅ២០លានលំនៅឋានឯណោះ ស្របពេលដែលក្រុមហ៊ុនអភិវឌ្ឈន៍ដែលដួលរលំ ឫក្ស័យធន គឺមានជាបន្តបន្ទាប់ដោយរួមទាំងក្រុមហ៊ុនអចលនទ្រព្យ Evergrande ដែលកំពុងតែលង់ខ្លួនក្នុងបំណុលរហូតដល់១៧៤ពាន់លានដុល្លារ មិនទាន់ដោះស្រាយបាននៅឡើយចាប់តាំងពីមានបញ្ហានៅក្នុងឆ្នាំ២០២០ មក៕

ដោយៈ សរ សុជាតិ