ជីប ម៉ុង បន្ដពូនជ្រំឬសគល់នៃកម្លាំងគាំទ្រផលិតផលខ្មែរ ខ្មែរធ្វើបាន ដើម្បីបង្ហាញកិត្យានុភាពផលិតផលខ្មែរទៅកាន់ឆាកអន្តរជាតិ

តួយ៉ាង កាលពីពេលថ្មីៗនេះ ក្រុមហ៊ុនខ្មែរមួយនេះ បានចូលរួមសហការ​រៀបចំ ពិព័រណ៍ផលិតផលខ្មែរ រយៈពេល៣ថ្ងៃ ក្រោមប្រធានបទ «ខ្មែរធ្វើបាន៖ ចូលរួមជំរុញ និងគាំទ្រផលិតផលក្នុងស្រុក» ដែលមាន​ការចូលរួម​​ពី​សំណាក់​ប្រពលរដ្ឋរាប់ម៉ឺននាក់។ នៅក្នុងពិព័រផលិតផលខ្មែរនោះដែរ អ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយក ជីប ម៉ុង ក៏បានអញ្ជើញចូលរួមធ្វើជាវាគ្មិន ដើម្បីចែករំលែក​អំពីបទពិសោធន៍​ដឹកនាំអាជីវកម្ម ដល់សហគ្រិនក្នុងស្រុក និងអ្នកចូលរួមជាច្រើនទៀតផងដែរ។

អ្នកឧកញ៉ា លាង ម៉េង បានអះអាងថា ក្នុងនាមជា​ក្រុមហ៊ុនខ្មែរ ជីប ម៉ុង តែងតែប្រកាន់ខ្ជាប់នូវគោល​ជំហរ​យ៉ាងរឹងមាំ ក្នុងការអភិវឌ្ឍផលិតផលក្នុងស្រុក ដែលមាន​គុណភាពខ្ពស់ ត្រឹមត្រូវតាមស្ដង់ដារអន្តរជាតិ ដើម្បីជំនួសការនាំចូលផលិតផលពីក្រៅប្រទេស។ មិនត្រឹមតែ​ប៉ុណ្ណោះ ជីប ម៉ុង នៅតែបន្ដ​ជួយជ្រោមជ្រែង​ដល់សហគ្រិនខ្មែរនៅគ្រប់វិស័យ ដើម្បីជំរុញការផលិតក្នុងស្រុក និងលើកកម្ពស់កំណើនសេដ្ឋកិច្ចជាតិ។

បន្ថែមលើនេះ ដោយមានចក្ខុវិស័យជំរុញដល់ការផលិតក្នុងស្រុក អ្នកឧកញ៉ា លាង ម៉េង បានអះអាងថា ជីប ម៉ុង គ្រោងនឹងចំណាយប្រមាណ ១០០ ទៅ២០០លានដុល្លារអាម៉េរិក ដើម្បីវិនិយោគនៅក្នុងវិស័យកសិកម្ម ពិសេស​ការវិនិយោគលើការកែច្នៃផលិតផលស្វាយចន្ទី។

អ្នកឧកញ៉ា លាង ម៉េង បានបន្ដលើកទឹកចិត្តឱ្យម្ចាស់អាជីវកម្ម​ក្នុងស្រុក ត្រូវតែស្រវាក្រសោបយកឱកាស​នាពេល​បច្ចុប្បន្ននេះ ដើម្បីពង្រឹងសមត្ថភាពរបស់ខ្លួនឱ្យកាន់តែខ្លាំង ពិសេស​ផលិតនូវផលិតផល ដែលមានគុណភាព ស្ដង់ដារ តម្លៃសមរម្យ និងមានការផ្គត់ផ្គង់ប្រកបដោយនិរន្ដរភាពសម្រាប់អ្នកប្រើប្រាស់។

ក្នុងស្មារតីគាំទ្រផលិតផលខ្មែរ សិល្បៈវប្បធម៌ និងការផ្សារភ្ជាប់ទៅនឹងវិស័យទេសចរណ៍ ក្រុមហ៊ុន ជីប ម៉ុង កាលពីពេលថ្មីៗនេះ បានបើកសាកល្បងនូវផ្សារទេសចរណ៍បែបខ្មែរដ៏ថ្មីស​ន្លាងមួយទៀត គឺ «ភូមិខ្មែរអ្នកធ្វើ» ដែលស្ថិតនៅក្នុងផ្សារទំនើប ជីប ម៉ុង ២៧១ ប្រមូលផ្ដុំទៅហាងលក់ទំនិញខ្មែរ​សរុបប្រមាណ ១២០ហាង ដោយក្នុងនោះ មានលក់​ផលិតផលជាច្រើនដូចជា ចំណី​អាហារ វត្ថុអនុស្សវរីយ៍ គ្រឿងអលង្កាបែប​ប្រពៃណីខ្មែរ ចម្លាក់ និងមានការសម្ដែងរបាំ ល្ខោន និងឧបករណ៍តន្ត្រីបុរាណខ្មែរផងដែរ។ ដោយមានសម្ទុះគាំទ្រ​ពីប្រជាពលរដ្ឋ​កាន់តែខ្លាំង ផ្សារបែបទេសចរណ៍ «ភូមិខ្មែរអ្នកធ្វើ» នឹងបើកដំណើរការជាផ្លូវការនៅថ្ងៃទី ១០ ខែតុលា ឆ្នាំ២០២៥។