បច្ចុប្បន្នភាពកូវីដ-១៩៖ កម្ពុជាចាក់វ៉ាក់សាំងជំងឺកូវីដ-១៩បានជាង៩៩%ហើយ នៃផែនការ១០លាននាក់

កម្ពុជាត្រូវបានគេដឹងថា ស្ថិតក្នុងចំណោមប្រទេសមួយដែលមានការចាក់វ៉ាក់សាំងបានលឿនជាងគេនៅក្នុងតំបន់អាស៊ាន។ ដោយក្នុងនោះ អ្នកដែលបានចាក់វ៉ាក់សាំងសរុបជារួមទាំងកុមារ និងមនុស្សពេញវ័យមានជាង១៣លាននាក់ហើយ ដោយក្នុងនោះ អ្នកបានចាក់គ្រប់២ដូសមានជាង១១លាននាក់។

បើគិតក្នុងផែនការចាក់វ៉ាក់សាំងសម្រាប់មនុស្សពេញវ័យ ១០លាននាក់ គឺកម្ពុជាសម្រេចបានការចាក់វ៉ាក់សាំងជាង ៩៩%ហើយនៃផែនការ ប៉ុន្ដែបើធៀបនឹងចំនួនប្រជាជន១៦លាននាក់វិញ កម្ពុជាសម្រេចបានការចាក់វ៉ាក់សាំង ជាង៨៣%ហើយ។

សន្ទុះនៃការចាក់វ៉ាក់សាំងបង្ការជំងឺកូវីដ-១៩ ជាការរួមចំណែកយ៉ាងសំខាន់ ក្នុងការទប់ស្កាត់ការឆ្លងរាលដាលជំងឺកូវីដ-១៩ ពិសេសប្រភេទកូវីដ-១៩ បំប្លែងថ្មី ក៏ដូចជា កាត់បន្ថយការឆ្លងធ្ងន់ធ្ងរ និងកាត់បន្ថយការស្លាប់ ដោយសារជំងឺកូវីដ-១៩ នៅកម្ពុជា ផងដែរ។  បើតាមរបាយការណ៍របស់ក្រសួងសុខាភិបាល នៅថ្ងៃទី១ ខែតុលា នេះ ក្រសួងបានរកឃើញអ្នកឆ្លងកូវីដ-១៩ ចំនួនត្រឹមតែ ២៣២នាក់ប៉ុណ្ណោះ ដែលចំនួននេះ ហាក់មានការថយចុះខ្លាំង ជាងថ្ងៃកន្លងទៅ ដែលមានអ្នកឆ្លងរហូត ជាង៩រយនាក់។ 

សូមបញ្ជាក់ថា គិតត្រឹមថ្ងៃទី១ ខែតុលា កម្ពុជា មានអ្នកឆ្លងជំងឺកូវីដ-១៩ សរុបជាង១១ម៉ឺននាក់។ ក្នុងនោះ អ្នកជាសះស្បើយមានចំនួន ១០ម៉ឺននាក់ ខណៈអ្នកស្លាប់មាន ២ពាន់៣រយនាក់៕