ក្រោយកម្ពុជា ជួបសង្គ្រាម តើការធ្វើបច្ចុប្បន្នភាពព័ត៌មានឱ្យបានឆាប់រហ័សមានសារសំខាន់យ៉ាងណាសម្រាប់ពលរដ្ឋ និងសង្គម?
ស្របមានការប៉ះទង្គិចប្រដាប់អាវុធរវាងកម្ពុជា និងថៃ នៅតំបន់ប្រាសាទតាមាន់ធំ ប្រាសាទតាក្របី និងតំបន់មុំ៣ ការទទួលបានព័ត៌មានត្រឹមត្រូវគ្រប់ជ្រ…
លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ យល់ឃើញថា ក្រោយមានការផ្ទុះអាវុធរវាងកងទ័ពកម្ពុជា និងថៃ ជាថ្មីនៅថ្ងៃទី២៤ ខែកក្កដា ហើយប្រសិនបើភាពតានតឹងនេះនៅតែបន្តអូសបន្លាយនោះ លោកជឿជាក់ថា ទំនាក់ទំនងពាណិជ្ជកម្មរវាងប្រទេសទាំងពីរ នឹងអាចឈានទៅដល់ការបញ្ចប់ទាំងស្រុងនៅពេលខាងមុខនេះ ខណៈបច្ចុប្បន្នកម្ពុជា បានបិទការនាំចូលទំនិញមួយចំនួនពីប្រទេសថៃ និងបិទការនាំចូលទំនិញឆ្លងកាត់ព្រំដែនគោករវាងកម្ពុជា និងថៃ ទាំងអស់រួចមកហើយដែរ។ សម្រាប់អ្នកជំនាញរូបនេះ ប្រសិនបើរាជរដ្ឋាភិបាលកម្ពុជា សម្រេចបិទការនាំចូលទំនិញទាំងស្រុងពីប្រទេសថៃ មែននោះ វាទំនងជាមិនបង្កផលប៉ះពាល់ដល់ការផ្គត់ផ្គង់ទំនិញសម្រាប់ប្រើប្រាស់ក្នុងប្រទេសកម្ពុជា នោះទេ ដ្បិតថា កម្ពុជាបច្ចុប្បន្នជាប្រទេសទីផ្សារសេរី ខណៈកម្ពុជា ក៏មានសមត្ថភាពផលិតទំនិញជាច្រើនដោយខ្លួនឯងផងដែរ។
លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម និងសេដ្ឋកិច្ច បានវាយតម្លៃថា ការផ្ទុះអាវុធរវាងកងទ័ពកម្ពុជា និងថៃ នៅពេលនេះ ទំនងជាមិនអាចអូសបន្លាយក្នុងរយៈពេលយូរនោះទេ ដូច្នេះបញ្ហានេះ ក៏មិនអាចជះឥទ្ធិពលបន្ថែមទៀតទៅលើវិធានការដោះដូរពាណិជ្ជកម្មដែលមានស្រាប់រវាងប្រទេសទាំងពីរនោះដែរ។ តែយ៉ាងណា អ្នកជំនាញរូបនេះបានគូសបញ្ជាក់ថា កម្ពុជានឹងដើរតាមក្រោយសេនារីយោរបស់ថៃ ហើយឆ្លើយតបទៅវិញ ប្រសិនបើថៃ បង្កផលប៉ះពាល់ណាមួយបន្ថែមទៀតដល់ទំនាក់ទំនងសេដ្ឋកិច្ចពាណិជ្ជកម្មរវាងប្រទេសទាំងពីរ។ បើតាមអ្នកជំនាញរូបនេះ ប្រសិនបើមានបញ្ហាណាមួយដែលអាចឈានទៅដល់ការបិទការនាំចេញ នាំចូលទំនិញទាំងស្រុងរវាងប្រទេសទាំងពីរមែននោះ លោកជឿជាក់ថា ភាគីថៃ គឺជាអ្នកដែលរងការខាតបង់ធំរហូតដល់ប្រមាណ៥ពាន់លានដុល្លារក្នុង១ឆ្នាំលើទំនាក់ទំនងពាណិជ្ជកម្មនេះ។
ជាមួយគ្នានេះ លោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព បានវាយតម្លៃថា ទំនាក់ទំនងពាណិជ្ជកម្មរវាងប្រទេសកម្ពុជា និងថៃ គឺស្ថិតក្នុងភាពមិនច្បាស់លាស់នោះទេ នាពេលនេះ និងទៅពេលខាងមុខ ដោយសារឥទ្ធិពលនៃភាពតានតឹងនៅតាមព្រំដែននៃប្រទេសទាំងពីរ។ សម្រាប់អ្នកជំនាញរូបនេះ ការបិទច្រកព្រំដែនកម្ពុជា-ថៃទាំងស្រុងនាពេលកន្លងមក ចង់ ឬមិនចង់វាបានបង្កផលប៉ះពាល់ដល់កិច្ចពាណិជ្ជកម្ម និងជីវភាពរបស់ប្រជាពលរដ្ឋនៃប្រទេសទាំងពីរួចទៅហើយ បើទោះបីជាភាគីថៃ រងការខាតបង់ច្រើនជាងកម្ពុជា ក្តី។ ដូច្នេះលោកយល់ថា ប្រទេសទាំងពីរមិនគួរឈានទៅដល់ការបិទការនាំចេញនាំចូលទំនិញទាំងស្រុងរវាងគ្នានោះទេ ដែលអាចធ្វើឱ្យប៉ះពាល់កាន់តែខ្លាំងដល់ជីវភាពរបស់ប្រជាពលរដ្ឋ។
គួរជម្រាបថា នៅក្នុងរយៈពេល៦ខែ ឆ្នាំ២០២៥នេះ ការដោះដូរពាណិជ្ជកម្មទ្វេភាគីរវាងកម្ពុជា និងថៃ មានទំហំជិត២ពាន់២រយលានដុល្លារ កើនឡើង៧% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះកម្ពុជា នាំចេញទៅថៃ មានទំហំប្រមាណ៤៤៨លានដុល្លារ ខណៈថៃ នាំចូលមកកម្ពុជាវិញ មានទំហំជាង១ពាន់៧រយលានដុល្លារ។ នេះបើតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា៕
