តើមានកត្តាអ្វីជំរុញឱ្យប្រាក់ចំណេញរបស់ក្រុមហ៊ុនផលិតចំណីអាហារដ៏ធំរបស់ថៃ CPF កើនជាង៥០០% នៅត្រីមាសទី៣ឆ្នាំនេះ?

ក្រុមហ៊ុនផលិតចំណីអាហារដ៏ធំមួយរបស់ថៃ CPF និងក្រុមហ៊ុនបុត្រសម្ព័ន្ធរបស់ខ្លួន ដែលកំពុងប្រតិបត្តិការនៅតាមប្រទេសចំនួន១៧ និងដឹកជញ្ជូនទៅកាន់ទីផ្សារជាង៥០ នៅទូទាំងពិភពលោកនោះ អាចរកប្រាក់ចំណូលបានរហូតដល់ជាង៤ពាន់លានដុល្លារ នៅក្នុងត្រីមាសទី៣ឆ្នាំនេះ ក្នុងនោះ៦២%បានមកពីប្រតិបត្តិការអន្តរជាតិ និង៣៨% បានមកពីប្រតិបត្តិការក្នុងស្រុក។

តាមរយៈប្រាក់ចំណូលដ៏ច្រើនសន្ធឹកសន្ធាប់នេះបានជួយឱ្យប្រាក់ចំណេញសុទ្ធរបស់ក្រុមហ៊ុននេះកើនឡើងជាង៥០០% ឡើងដល់ជាង២១០លានដុល្លារ នៅក្នុងត្រីមាសទី៣ ឆ្នាំ២០២៤ បន្ទាប់ពីក្រុមហ៊ុននេះបានខាតបង់ជាង៥១លានដុល្លារ កាលពីត្រីមាសទី៣ ឆ្នាំ២០២៣។

ការស្ទុះងើបឡើងវិញនៃប្រាក់ចំណេញសុទ្ធរបស់ក្រុមហ៊ុន CPF គឺដោយសារកម្រិតប្រាក់ចំណេញដុលរបស់ក្រុមហ៊ុនចេះតែមានការកើនឡើន គួបផ្សំការខិតខំប្រឹងប្រែងធ្វើប្រតិបត្តិការរបស់ក្រុមហ៊ុនបណ្តាក់ទុនរួមគ្នា។ កម្រិតប្រាក់ចំណេញដុលរបស់ក្រុមហ៊ុននេះ បានកើនឡើងជាង១៥% នៅក្នុងត្រីមាសទី៣ ឆ្នាំ២០២៤ ដោយបន្តកើនឡើងពីអត្រា១០% ក្នុងពេលដូចគ្នាកាលពីឆ្នាំ២០២៣។ ដំណើរការលក់ដ៏រឹងមាំរបស់ក្រុមហ៊ុននេះត្រូវបានជំរុញដោយការស្ទុះងើបឡើងនៃតម្រូវការទីផ្សារជ្រូកនៅប្រទេសវៀតណាម៕

អត្ថបទ៖ សុខ មង្គល