បើតាមការគូសបញ្ជាក់របស់ឯកឧត្តម នួន ផារ័ត្ន អភិបាលខេត្តកំពង់ធំ គម្រោងនេះមិនមែនផ្តោតលើការកែច្នៃគ្រាប់ស្វាយចន្ទីនោះទេ តែជាគម្រោងសម្រាប់ការកែច្នៃកសិផលនានា និងជាគម្រោងអមជាមួយគម្រោងធំ នៃសួនឧស្សាហកម្មកែច្នៃគ្រាប់ស្វាយចន្ទី ដែលមានការគាំទ្រពីសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដើម្បីអភិវឌ្ឍសេដ្ឋកិច្ចខេត្តសំដៅលើកកម្ពស់ជីវភាពរបស់ប្រជាពលរដ្ឋឱ្យកាន់តែប្រសើរឡើងបន្ថែមទៀត តាមរយៈការបង្កើនតម្លៃកសិផល ទីផ្សារ និងបង្កើតឱកាសការងារជូនប្រជាពលរដ្ឋក្នុងខេត្តកំពង់ធំ។
ជាមួយគ្នានេះ លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ នៃឧត្តមក្រុមប្រឹក្សាសេដ្ឋកិច្ចជាតិបានចាត់ទុកការបង្កើតសួនកសិឧស្សាហកម្មនេះ គឺជាផ្នែកមួយក្នុងការជួយកសាងសេដ្ឋកិច្ចខេត្តកំពង់ធំ ឱ្យកាន់តែមានសេដ្ឋកិច្ចរឹងមាំ និងយូរអង្វែង។ លើសពីនេះ វានឹងជួយបង្កើនតម្លៃកសិផល និងបង្កើតឱកាសការងារជូនប្រជាពលរដ្ឋក្នុងខេត្តផងដែរ។ ជាការកត់សម្គាល់របស់អ្នកជំនាញរូបនេះ មានកសិផលកម្ពុជា មិនទាន់កែច្នៃជាច្រើនត្រូវបាននាំចេញទៅលក់នៅតាមបណ្តាប្រទេសជិតខាង ហើយប្រទេសទាំងនោះយកទៅកែច្នៃជាផលិតផលមានតម្លៃជាងកសិផលដើម។ សូមគូសបញ្ជាក់ថា ខេត្តកំពង់ធំ ក្រោមការដឹកនាំរបស់ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណ:រដ្ឋមន្ត្រី និងជាប្រធានក្រុមការងារចុះជួយខេត្តកំពង់ធំ បានជំរុញយ៉ាងសកម្មនូវដំណើរការអភិវឌ្ឍសេដ្ឋកិច្ច-សង្គម តាមរយៈការពង្រឹងហេដ្ឋារចនាសម្ព័ន្ធ ការលើកកម្ពស់វិស័យកសិកម្ម ឧស្សាហកម្ម និងទេសចរណ៍ ព្រមទាំងការកែលម្អសេវាសាធារណៈឲ្យកាន់តែមានប្រសិទ្ធភាព។
ក្រោមការដឹកនាំរបស់ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត គឺបានផ្តោតសំខាន់លើការទាក់ទាញវិនិយោគ ការបង្កើតការងារសម្រាប់ប្រជាពលរដ្ឋមូលដ្ឋាន ការកាត់បន្ថយភាពក្រីក្រ និងការលើកកម្ពស់គុណភាពជីវភាពរស់នៅរបស់ប្រជាជន។ ជាមួយគ្នានេះ ការគ្រប់គ្រងរដ្ឋបាល ការអនុវត្តច្បាប់ សន្តិសុខ សុវត្ថិភាព និងសណ្ដាប់ធ្នាប់សង្គម ក៏ត្រូវបានពង្រឹងដើម្បីធានាស្ថិរភាព និងការអភិវឌ្ឍប្រកបដោយចីរភាពក្នុងខេត្តកំពង់ធំ៕
