លោកបណ្ឌិត ឈត ប៊ុនថង អ្នកតាមដានហេតុការណ៍សង្គម យល់ឃើញថា ដើម្បីធ្វើឱ្យការបង្ក្រាបការឆបោកតាមប្រព័ន្ធអនឡាញមានប្រសិទ្ធភាព គឺទាមទារឱ្យមានយន្តការត្រួតពិនិត្យពីថ្នាក់លើ និងភាពស្មោះត្រង់របស់អ្នកអនុវត្តនៅថ្នាក់ក្រោម។ អ្នកជំនាញរូបនេះបានសង្កត់ធ្ងន់ថា អ្នកអនុវត្តច្បាប់ត្រូវចៀសវាងឱ្យផុតពីអំពើពុករលួយ បក្ខពួកនិយម និងសំណូក ឬផលប្រយោជន៍ក្រុមឧក្រិដ្ឋជន។ អ្នកជំនាញរូបនេះជឿជាក់ថា ប្រសិនបើកម្ពុជា អាចបង្រ្កាបបទល្មើសឆបោកតាមប្រព័ន្ធអនឡាញបានទាំងស្រុង នោះវានឹងក្លាយជាមេដែកក្នុងការទាក់ទាញទឹកចិត្តរបស់វិនិយោគិនបរទេស និងធ្វើឱ្យវិស័យទេសចរណ៍កាន់តែមានភាពរស់រវើក។ ទន្ទឹមនឹងនេះអ្នកជំនាញរូបនេះស្នើឱ្យរាជរដ្ឋាភិបាលបង្ក្រាបបទល្មើសនេះឱ្យដល់ឬសគល់ ដើម្បីលុបបំបាត់បញ្ហាដែលជាក្តីកង្វល់រួមនេះ។
ជាមួយគ្នានេះ លោកបណ្ឌិត ប៉ា ចាន់រឿន ប្រធានវិទ្យាស្ថានប្រជាធិបតេយ្យកម្ពុជា យល់ឃើញថា ការដាក់ចេញវិធានការទប់ស្កាត់ និងបង្រ្កាបឧក្រិដ្ឋកម្មឆបោកតាមប្រព័ន្ធបច្ចេកវិទ្យារបស់រាជរដ្ឋាភិបាល វាជាជំហានមួយដ៏ល្អ តែយ៉ាងណាដើម្បីអាចអនុវត្តប្រកបដោយប្រសិទ្ធភាពលុះត្រាតែរដ្ឋត្រូវលុបបំបាត់អំពើពុករលួយធ្វើយ៉ាងណាឱ្យថ្នាក់លើនឹងថ្នាក់ក្រោយអនុវត្តស្របតាមគោលការណ៍ ដែលបានដាក់ចេញដោយរដ្ឋាភិបាល។ បន្ថែមលើនេះ ទាមទារឱ្យរដ្ឋាភិបាលត្រូវមានប្រព័ន្ធត្រួតពិនិត្យ និងវាយតម្លៃ ជុំវិញសកម្មភាពបង្រ្កាបរបស់អ្នកអនុវត្ត ត្បិតបញ្ហាឧក្រិដ្ឋកម្មឆបោកតាមប្រព័ន្ធបច្ចេកវិទ្យាកំពុងធ្វើឱ្យប៉ះពាល់ដល់កេរ្តិ៍ឈ្មោះ និងពលរដ្ឋទទួលរងការរើសអើង។ សម្រាប់អ្នកជំនាញរូបនេះ កម្ពុជា ត្រូវតែបង្ហាញសកម្មភាពបង្ក្រាបឱ្យបានខ្លាំងក្លាបំផុត ដើម្បីកុំឱ្យប្រទេសជិតខាង ដូចជាថៃ ជាដើម យកបញ្ហានេះមកធ្វើជាលេសក្នុងការឈ្លានពានកម្ពុជា ឬធ្វើឱ្យអន្តរជាតិ មើលរំលងការរំលោភបំពានណាមួយមកលើកម្ពុជា។
គួររំលឹកថា ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បានអះអាងថា រាជរដ្ឋាភិបាល បានកំណត់យកការប្រយុទ្ធប្រឆាំងនឹងឧក្រិដ្ឋកម្មឆបោកតាមប្រព័ន្ធអនឡាញ ជាកិច្ចការអាទិភាពបំផុតក្នុងរបៀបវារៈនយោបាយ ដើម្បីធានាសុវត្ថិភាពសង្គម និងការអភិវឌ្ឍន៍ជាតិប្រកបដោយចីរភាព៕
អត្ថបទ៖ ជា ម៉ារ៉ា
