ធនាគារយក្សអាម៉េរិក Goldman Sachs រំពឹងថា ការផ្គត់ផ្គង់ប្រេងឆៅនឹងកើនលើសតម្រូវការជាក់ស្ដែងរហូតដល់ទៅប្រមាណ ១,៨លានបារ៉ែលក្នុងមួយថ្ងៃនៅត្រឹមចុងឆ្នាំ២០២៦ ដោយអតុល្យភាពរវាងការផ្គត់ផ្គង់ និងតម្រូវការជាក់ស្ដែងនេះ បានចាប់ផ្តើមកើតមានបណ្ដើរៗហើយនៅក្នុងឆ្នាំ២០២៥នេះ។
ទីភ្នាក់ងារថាមពលអន្តរជាតិ (IEA) បានគាំទ្រការព្យាកររបស់ធនាគារ Goldman Sachs ហើយបានព្យាករផ្ទាល់ខ្លួនថា ការផ្គត់ផ្គង់ប្រេងឆៅនៅទូទាំងពិភពលោកនឹងកើនឡើងជាង ២លានបារ៉ែលក្នុងមួយថ្ងៃក្នុងឆ្នាំ២០២៥ នេះ ខណៈដែលតម្រូវការនឹងកើនឡើងត្រឹមតែ ៧០ម៉ឺនបារ៉ែលក្នុងមួយថ្ងៃ។ ដូចនេះមានន័យថា ការផ្គត់ផ្គង់នឹងលើសតម្រូវការជាក់ស្ដែងរហូតដល់ទៅប្រមាណ ១,៤លានបារ៉ែលក្នុងមួយថ្ងៃ ដែលនិន្នាការនេះអាចនឹងបន្តរហូតដល់ឆ្នាំ២០២៦។
ទោះបីជាមានការព្យាកររយៈពេលវែងថា ប្រេងឆៅនឹងធ្លាក់ថ្លៃខ្លាំងយ៉ាងណាក្ដី ក៏តម្លៃប្រេងឆៅជាក់ស្ដែងបានកើនឡើងនៅសប្តាហ៍នេះ។ ជាក់ស្ដែង ប្រេងឆៅនៅលើទីផ្សារអន្តរជាតិត្រូវបានជួញដូរក្នុងតម្លៃ៦៧,៣២ដុល្លារក្នុងមួយបារ៉ែល ហើយប្រេងឆៅនៅទីផ្សារអាម៉េរិកត្រូវបានជួញដូរក្នុងតម្លៃ ៦៣,៣២ដុល្លារក្នុងមួយបារ៉ែល។ ការឡើងថ្លៃនេះ ក៏ដោយសារតែការព្រួយបារម្ភអំពីពន្ធគយបដិការថ្មីដែលសហរដ្ឋអាម៉េរិក ដាក់លើប្រទេសឥណ្ឌា ដែលអាចធ្វើឱ្យរាំងស្ទះដល់ការធ្វើចរាចរប្រេង និងដោយសារមានសញ្ញាបង្ហាញពីតម្រូវការប្រេងកើនឡើងនៅក្នុងប្រទេសចិន ដែលជាប្រទេសនាំចូលកំពូលរបស់ពិភពលោក។
ជាការកត់សម្គាល់ ការនាំចូលប្រេងឆៅរបស់មហាយក្សចិនបានកើនឡើងខ្លាំង ទោះបីជាតម្រូវការជាក់ស្ដែងប្រចាំឆ្នាំនៅតែមានភាពទន់ខ្សោយយ៉ាងណាក៏ដោយ។
ក្រុមអ្នកវិភាគបានលើកឡើងថា ប្រសិនបើពន្ធគយបដិការថ្មីរបស់សហរដ្ឋអាម៉េរិក ធ្វើឱ្យឥណ្ឌា ពិបាកនឹងទិញប្រេងឆៅពីរុស្ស៊ី ប្រាកដណាស់តម្លៃប្រេងឆៅនឹងហក់ឡើងជាបណ្ដោះអាសន្ន។ ទោះជាយ៉ាងណា ធនាគារយក្សអាម៉េរិក Goldman Sachs និងទីភ្នាក់ងារថាមពលអន្តរជាតិ (IEA) បានសង្កត់ធ្ងន់ថា ការផ្គត់ផ្គង់លើសពីតម្រូវការជាក់ស្ដែងនឹងជំរុញឱ្យតម្លៃប្រេងឆៅធ្លាក់ចុះក្នុងរយៈពេលវែង៕
ដោយ: តែម សុខុម
