អ្នកជំនាញរំពឹងការហាមឃាត់ការនាំចូលសាច់បង្កកនឹងកាន់តែមានប្រសិទ្ធភាព ក្រោយគយរឹតបន្តឹងលក្ខខណ្ឌក្នុងការផ្តល់អាជ្ញាបណ្ណដល់ក្រុមហ៊ុននាំចូល

លោក ស៊្រុន ពៅ ប្រធានសមាគមអ្នកចិញ្ចឹមសត្វកម្ពុជា រំពឹងថា វិធានការហាមឃាត់ការនាំចូលសាច់បង្កកគ្មានគុណភាព និងខុសច្បាប់នឹងកាន់តែមានប្រសិទ្ធភាពបន្ថែមទៀត បន្ទាប់ពីអគ្គនាយកគយ និងរដ្ឋាករ និងអគ្គនាយកដ្ឋានសុខភាពសត្វ និងផលិតកម្មសត្វ រឹតបន្តឹងក្នុងការផ្តល់សិទ្ធដល់ក្រុមហ៊ុននាំចូល​។ ប្រធានសមាគមរូបនេះបានអរគុណដល់អាជ្ញាធរមានសមត្ថកិច្ច ដែលបានបន្តយកចិត្តទុកដាក់ក្នុងការពង្រឹងវិធានការហាមឃាត់ការនាំចូលសាច់បង្កក ព្រោះវិធានការនេះមិនត្រឹមតែជួយលើកកម្ពស់វិស័យចិញ្ចឹមសត្វនៅក្នុងស្រុកប៉ុណ្ណោះ ថែមទាំងជួយការពារសុខភាពអ្នកបរិភោគទៀតផង។

​តែយ៉ាងណាលោក ស៊្រុន ពៅ សង្កេតឃើញថា វិធានការផ្អាកការនាំចូលសាច់បង្កកដំណាក់កាលទី២ ដែលបានដាក់ឱ្យអនុវត្តកាលពីពេលថ្មីៗហាក់មិនសូវមានប្រសិទ្ធភាពខ្ពស់ដូចកាលពីដំណាក់កាលទី១នោះទេ ពោលគឺលោកនៅតែសង្កេតឃើញមានប្រភេទសាច់បង្កកហាមឃាត់ទាំងនោះ បន្តចរាចរដាក់លក់នៅលើទីផ្សារជាហូរហែ ខណៈបច្ចុប្បន្ននេះទោះបីជាស្ថិតនៅក្នុងរដូវកាលបុណ្យទាន និងពិធីមង្គលការក្តី ប៉ុន្តែសាច់ក្នុងស្រុកនៅតែមិនសូវមានតម្រូវការខ្ពស់ ដោយសារឥទ្ធិពលនៃសាច់បង្កក។

​គួរបញ្ជាក់ថា កាលពីពេលថ្មីៗ អគ្គនាយកដា្ឋនសុខភាពសត្វ និងផលិតកម្មសត្វ និងអគ្គនាយកដា្ឋនគយនិងរដ្ឋាករ បានចេញសេចក្តីជូនដំណឹងរួម ស្តីពីយន្តការ និងលក្ខណវិនិច្ឆ័យនៃការផ្ដល់គុណវុឌ្ឍិលើការនាំចូលមុខទំនិញ«សាច់បង្កក» ដើម្បីពង្រឹងប្រសិទ្ធភាពនៃការនាំចូលសាច់បង្កកចូលមកកាន់ទីផ្សារកម្ពុជា។

អគ្គនាយកដ្ឋានទាំងពីរ បានបញ្ជាក់ថា ដើម្បីអាចប្រកបអាជីវកម្មនាំចូលមុខទំនិញសាច់បង្កកបាន គឺក្រុមហ៊ុនត្រូវមានការទទួលស្គាល់ជាមុនជាក្រុមហ៊ុនមានគុណវុឌ្ឍិ ដោយត្រូវដាក់ពាក្យស្នើសុំមកអគ្គនាយកដ្ឋានគយ និងរដ្ឋាករកម្ពុជា ឬអគ្គនាយកដ្ឋានសុខភាពសត្វ និងផលិតកម្មសត្វ ជាពិសេសត្រូវមានកម្មវត្ថុអាជីវកម្មពាក់ព័ន្ធនឹងការនាំចូលសាច់, មានប្រភពផ្គត់ផ្គង់សាច់បង្កកពីក្រៅប្រទេសច្បាស់លាស់, ត្រូវមានឃ្លាំងរក្សាគុណភាពសាច់បង្កកស្របតាមលក្ខណបច្ចេកទេសត្រឹមត្រូវ និងត្រូវធានាអះអាងជាលាយលក្ខណ៍អក្សរថា«នឹងប្រើប្រាស់មធ្យោបាយដឹកជញ្ជូននិងចែកចាយសាច់បង្កកដែលមានលក្ខណៈបច្ចេកទេសសមស្រប»៕