នេះជាគ្រោះមហន្តរាយធម្មជាតិ ធ្ងន់ធ្ងរបំផុតមិនធ្លាប់មានក្នុងប្រវត្តិសាស្រ្តសម្រាប់ប្រទេសក្បែរខាងកម្ពុជា មួយនេះ ដោយវាបានធ្វើឱ្យប៉ះពាល់ដល់ប្រជាពលរដ្ឋជាង៣លាននាក់ ដែលស្មើនឹង៣២% នៃប្រជាជនសរុបនៅក្នុងតំបន់ដែលរងគ្រោះ។
សារព័ត៌មាន Khaosod English របស់ថៃ បានរាយការណ៍ថា គ្រោះទឹកជំនន់ដែលបានពន្លិចខេត្តមួយចំនួននៅភាគខាងត្បូង ប្រទេសថៃ បានធ្វើឱ្យថៃ ខាតបង់សេដ្ឋកិច្ចជាង៤,៣ពាន់លានដុល្លារ និងបានធ្វើឱ្យប៉ះពាល់ធ្ងន់ធ្ងរដល់ជីវភាពពលរដ្ឋថៃ ជាង៣លាននាក់ ឬប្រមាណ៣២% នៃប្រជាជនសរុបនៅក្នុងតំបន់រងការប្រឈម។ បញ្ហានេះបានធ្វើឱ្យនាយករដ្ឋមន្ត្រីជិតខ្ទាតចេញពីតំណែងរបស់ថៃ អានុទីន ឆានវីរៈគុល ក្លាយជាផ្ទាំងស៊ីបសម្រាប់ការរិះគន់របស់ពលរដ្ឋថៃ។ យ៉ាងណាមិញ លោក អានុទីន បានដាក់ចេញផែនការស្តារតំបន់រងប៉ះពាល់ ដើម្បីទប់ការរិះគន់របស់ប្រជាពលរដ្ឋ ដែលកំពុងធ្លាក់មកដូចទឹកបាក់ទំនប់។
ជាក់ស្តែងកាលថ្ងៃទី២៧ ខែវិច្ឆិកា ឆ្នាំ២០២៥ លោក អានុទីន ដែលជារដ្ឋមន្ត្រីក្រសួងមហាផ្ទៃផងនោះ បានបង្កើតមជ្ឈមណ្ឌលប្រតិបត្តិការបន្ទាន់មួយនៅវិមានរដ្ឋាភិបាល ដើម្បីគ្រប់គ្រងកិច្ចខិតខំប្រឹងប្រែងសង្គ្រោះ និងរក្សាការទំនាក់ទំនងដោយផ្ទាល់ជាមួយក្រុមឆ្លើយតបនៅក្នុងតំបន់។
សាស្ត្រាចារ្យរបស់ថៃម្នាក់ លោក អាត ពិសានវ៉ានិច (Aat Pisanwanich) អ្នកជំនាញកិច្ចការអាស៊ាន និងសេដ្ឋកិច្ចអន្តរជាតិ បានអះអាងថា តំបន់នៅភាគខាងត្បូង ដែលកំពុងរងការវាយប្រហារពីទឹកជំនន់ គឺជាជន្ទល់ដ៏សំខាន់មួយសម្រាប់ទ្រទ្រង់សេដ្ឋកិច្ចថៃ ពោលគឺមានទំហំប្រមាណ៨% នៃផលិតផលក្នុងស្រុកសរុបរបស់ប្រទេសថៃ។
ជាមួយគ្នានេះ លោក ផុងពុល ចាងស៊ីរីវ៉ាថាមរ៉ុង (Thongpol Jangsiriwatthamrong) ប្រធានសភាពាណិជ្ជកម្មខេត្តសុងក្លា បានអះអាងថា សក្តានុពលផលិតកម្មនៅក្នុងខេត្តនេះ បានរងគ្រោះយ៉ាងខ្លាំងពីគ្រោះទឹកជំនន់ ហើយពលរដ្ឋក៏បានរងគ្រោះខ្លាំងផងដែរ ដោយក្រៅពីប៉ះពាល់ដល់មុខរបរ ពួកគេបានជួបបញ្ហាបាត់បង់ទ្រព្យសម្បត្តិ និងខូចខាតផ្ទះសម្បែង។ លោកបានបន្តថា ផលប៉ះពាល់បឋមនៅតំបន់ហាតយ៉ៃ ដែលជាមជ្ឈមណ្ឌលសេដ្ឋកិច្ចសម្រាប់ខេត្តសុងក្លា តែមួយ បានរងការខូចខាតសេដ្ឋកិច្ចប្រមាណជិត៤០០លានដុល្លារ។
ដោយឡែក លោក ស៊ីធីផុង ស៊ីធីផាប្រាផា (Sitthipong Sitthipatprapah) ប្រធានសមាគមសណ្ឋាគារ ហាតយ៉ៃ - សុងក្លា បានប៉ាន់ប្រមាណថា គ្រោះទឹកជំនន់ដ៏សាហាវនេះបានធ្វើឱ្យឧស្សាហកម្មសណ្ឋាគារក្នុងខេត្តសុងក្លា រងការខូចខាតក្នុងតម្លៃសរុបលើស៣១០លានដុល្លារ ហើយភ្ញៀវទេសចរម៉ាឡេស៊ី និងសិង្ហបុរី ប្រមាណ១,០០០នាក់ កំពុងជាប់គាំងនៅក្នុងសណ្ឋាគារ នៅខាងក្រៅទីក្រុងនៅឡើយ។
ជាមួយគ្នានេះ លោកស្រី ថាផានី គៀតថៃបូល (Thapanee Kiatphaibool) អភិបាលអាជ្ញាធរទេសចរណ៍ថៃ បានអះអាងថា ទីក្រុងហាតយ៉ៃ នៅខេត្តសុងក្លា ជាមជ្ឈមណ្ឌលទេសចរណ៍ដ៏សំខាន់មួយ ដោយក្នុងមួយឆ្នាំៗអាចរកចំណូលបានប្រមាណ១,៥ពាន់លានដុល្លារ ដូច្នេះក្រុមការងាររបស់លោកស្រី កំពុងតាមដានស្ថានការណ៍យ៉ាងយកចិត្តទុកដាក់លើបញ្ហានេះ ខណៈរបាយការណ៍បឋមបានវាយតម្លៃថា វិស័យទេសចរណ៍នៅក្នុងតំបន់នេះ អាចរងការខូចខាតប្រមាណជាង១៥៥លានដុល្លារអាម៉េរិក៕
ដោយៈ សរ សុជាតិ
