ថៃបើកឲ្យជនបរទេសចាក់វ៉ាក់សាំងរួច អាចចូលប្រទេសខ្លួនឡើងវិញ ដោយមិនចាំបាច់ធ្វើចត្តាឡីស័ក

ការបើកឲ្យអ្នកដំណើរបរទេស ដែលបានចាក់វ៉ាក់សាំងរួច ក្រោមផែនការដែលថៃឲ្យឈ្មោះថា« Test & Go» ដែលនឹងអនុញ្ញាតឲ្យចូលទៅកាន់ទឹកដីថៃបានឡើងវិញនេះ នឹងអនុវត្តចាប់ពីថ្ងៃទី០១ ខែកុម្ភៈតទៅ។ គោលការណ៍នេះតម្រូវឱ្យអ្នកដំណើរទាំងអស់ធ្វើតេស្តនៅពេលមកដល់ប្រទេសថៃ ហើយនឹងធ្វើតេស្តម្ដងទៀតនៅប្រាំថ្ងៃបន្ទាប់ពីធ្វើតេស្តលើកដំបូង។

ទន្ទឹមនឹងនេះ អាជ្ញាធរថៃក៏បានបន្ថែម ម៉ោងពេលដល់ភោជនីយដ្ឋាន ដែលនឹងអនុញ្ញាតឱ្យលក់គ្រឿងស្រវឹងរហូតដល់ម៉ោង ១១យប់ផងដែរ ប៉ុន្តែសម្រាប់ បារ និងក្លឹបរាត្រីវិញគឺនៅបន្តបិទដដែល។

ជុំវិញការផ្លាស់ប្តូរផែនការនេះ ថៃមានគោលបំណងស្តារឡើងវិញនូវវិស័យទេសចរណ៍ដែលត្រូវបានរងគ្រោះយ៉ាងដំណំដោយជំងឺរាតត្បាតកូវីដ១៩ ក្រោយការបិទជើងមេឃរាំងខ្ទប់អ្នកដំណើរពីបរទេសអស់ពេលយ៉ាងយូរ គួបផ្សំនឹងតម្រូវការចត្តាឡីស័កយ៉ាងតឹងរ៉ឹងរបស់ថៃផងដែរ។

កាលពីឆ្នាំ ២០២១ ទេសចរណ៍ដែលបានធ្វើដំណើរទៅកាន់ប្រទេសថៃ ដែលជាគោលដៅទេសចរណ៍ដ៏ពេញនិយមបំផុតមួយរបស់អាស៊ីមានតែប្រហែល ០.៥ភាគរយប៉ុណ្ណោះ នៃតួលេខមុនការជំងឺរាតត្បាតសលក ចំនួនដល់ទៅជិត៤០លាននាក់កាលពីឆ្នាំ២០១៩ ។

សូមជម្រាបថា នៅក្នុងថ្ងៃទី ២០ខែមករា ប្រទេសថៃបានរាយការណ៍ពីករណីឆ្លងថ្មីចំនួនជាង ៨ពាន់នាក់ និងករណីស្លាប់ថ្មីចំនួន ១៩នាក់ ដែលធ្វើឱ្យករណីឆ្លងសរុបកើនដល់ជាង ២លាន ៣សែននាក់ និងអ្នកស្លាប់ជិត ២ម៉ឺន ២ពាន់នាក់៕