លោក ដូណាល់ ត្រាំ ពន្យារពេលការយកពន្ធ៥០% លើទំនិញអឺរ៉ុប រហូតដល់ដើមខែកក្កដា

ប្រធានាធិបតីអាម៉េរិក លោក ដូណាល់ ត្រាំ កាលពីថ្ងៃសុក្រ សប្តាហ៍មុន បានគំរាមបង្កើនសង្គ្រាមពាណិជ្ជកម្មជាមួយសហភាពអឺរ៉ុប ដោយគ្រោងដាក់ពន្ធរហូតដល់៥០% លើទំនិញនាំចូលពីប្លុកនេះ ដែលគ្រោងអនុវត្តចាប់ពីថ្ងៃទី១ ខែមិថុនា តទៅ បន្ទាប់ពីលោកបានខកចិត្តចំពោះកិច្ចពិភាក្សាពាណិជ្ជកម្មទ្វេភាគី ដែលហាក់ដូចជាគ្មានវឌ្ឍនភាពទៅមុខទាល់តែសោះ។

ប៉ុន្តែពីរថ្ងៃក្រោយមកលោក ត្រាំ ក៏បានបន្ថយការគំរាមកំហែងនេះបន្តិច ដោយបានពន្យារពេលអនុវត្តពន្ធថ្មីលើទំនិញរបស់អឺរ៉ុបរហូតដល់ថ្ងៃទី៩ ខែកក្កដា បន្ទាប់ពីប្រធានគណៈកម្មការអឺរ៉ុប លោកស្រី អ៊ូសូឡា វ៉ុនឌ័រ ឡេយេន បានប្រាប់លោក ត្រាំ តាមទូរសព្ទថា សហភាពអឺរ៉ុបត្រូវការពេលវេលាបន្ថែមទៀត ដើម្បីឈានដល់កិច្ចព្រមព្រៀងល្អមួយ និងបានសុំឱ្យមានការពន្យារពេលអនុវត្តវិធានការពន្ធនេះ។

លោក ត្រាំ បានប្រាប់អ្នកយកព័ត៌មាន កាលពីថ្ងៃអាទិត្យ ថា លោកបានយល់ព្រមតាមសំណើនេះហើយ ក្រោយសហភាពអឺរ៉ុប ប្តេជ្ញារួបរួមគ្នាឱ្យបានឆាប់ ដើម្បីពិនិត្យមើលថាតើពួកគេអាចដោះស្រាយអ្វីមួយបានដែរ ឬទេ។

គួររំលឹកថា កាលពីដើមខែមេសា លោក ត្រាំ បានទុកពេល៩០ថ្ងៃសម្រាប់កិច្ចពិភាក្សាពាណិជ្ជកម្មសម្រាប់សហភាពអឺរ៉ុប និងសហរដ្ឋអាម៉េរិក ដែលនឹងផុតកំណត់នៅថ្ងៃទី៩ ខែកក្កដា ដូចគ្នានឹងថ្ងៃអនុវត្តពន្ធថ្មី៥០% ផងដែរ៕

ដោយ៖ សុខ មង្គល