ថ្លែងក្នុងពិធីប្រកាសលទ្ធផលទូតសុឆន្ទៈផ្សារភាគហ៊ុន កាលពីពេលថ្មីៗនេះ ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា បានកត់សម្គាល់ឃើញថា វិនិយោគិនក្នុងវិស័យផ្សារមូលបត្រនៅកម្ពុជា មានកំណើនខ្លាំងគួរឲ្យកត់សម្គាល់ នៅរយៈពេលប៉ុន្មានខែចុងក្រោយនេះ។ បើតាមឯកឧត្តម ហុង សុហួរ គិតមកដល់ពេលនេះ វិនិយោគិនក្នុងវិស័យផ្សារមូលបត្រកម្ពុជា មានវិនិយោគិនសរុបជាង ៣ម៉ឺន៤ពាន់នាក់ ខណៈជាមធ្យមនៃវិនិយោគិនថ្មីមានចំនួនប្រមាណ១ពាន់នាក់។
យ៉ាងណាក៏ដោយ ថ្នាក់ដឹកនាំផ្សារមូលបត្រកម្ពុជារូបនេះ បានបង្ហាញក្ដីរំពឹងថា នៅឆ្នាំ២០២៣នេះ វិស័យផ្សារមូលបត្រកម្ពុជា នៅតែបន្តទទួលបានការចាប់អារម្មណ៍ពីសាធារណៈជន ក៏ដូចជា វិនិយោគិន បន្ថែមទៀត ជាពិសេសនឹងទទួលបានការស្នើសុំចុះបញ្ជីបន្ថែមទៀត ហើយចំនួនវិនិយោគិននឹងបន្តកើនដល់ចំនួន ៥ម៉ឺននាក់ក្នុងមួយថ្ងៃនៅត្រឹមដំណាច់ឆ្នាំ២០២៣នេះ។
អត្ថបទគួរអាន
ទាក់ទិននឹងស្ថានភាពមិនច្បាស់លាស់របស់ពិភពលោក ដូចជា វិបត្តិសង្រ្គាមរវាងរុស្សី-អ៊ុយក្រែន ក៏ដូចជា ការដួលរលំរបស់ធនាគារធំៗពីរ គឺ Silicon Valley Bank និង Signature Bank នៅសហរដ្ឋអាមេរិក នាពេលថ្មីៗ កន្លងកមក ឯកឧត្តម ហុង សុហួរ ក៏បានកត់សម្គាល់ឃើញថា បើទោះតម្លៃភាគហ៊ុនមានការធ្លាក់ចុះក៏ពិតមែន ប៉ុន្ដែមិនទាន់មានសញ្ញាណាមួយបង្ហាញថា ស្ថានភាពហិរញ្ញវត្ថុរបស់ក្រុមហ៊ុនជួញដូរមានការធ្លាក់ចុះនោះទេ។ ដូច្នេះ កត្តាទាំងនេះ ហើយទើបធ្វើឲ្យថ្នាក់ដឹកនាំផ្សារមូលបត្ររូបនេះ មានក្ដីរំពឹងខ្ពស់ចំពោះវិស័យផ្សារមូលបត្រកម្ពុជា នាឆ្នាំ២០២៣នេះ និងឆ្នាំបន្តបន្ទាប់។
បើតាមការគូសបញ្ជាក់របស់ឯកឧត្តម ហុង សុហួរ បច្ចុប្បន្នមានក្រុមហ៊ុនចំនួន១៨បានចុះបញ្ជីបោះផ្សាយលក់ភាគហ៊ុននៅផ្សារមូលបត្រកម្ពុជា ក្នុងនោះ៩ក្រុមហ៊ុនបានបោះផ្សាយលក់មូលបត្រកម្មសិទ្ធិ និង៩ក្រុមហ៊ុនបោះផ្សាយលក់សញ្ញាបណ្ណ ឬមូលបត្របំណុល។ ក្រុមហ៊ុនទាំងនេះប្រមូលទុនវិនិយោគបានប្រមាណ៣១៧លានដុល្លារអាមេរិកក្នុងមួយឆ្នាំ។ នៅឆ្នាំ២០២២ កន្លងទៅ ការជួញដូរភាគហ៊ុនមានជាមធ្យម៥០ម៉ឺនដុល្លារក្នុង១ថ្ងៃ៕
