ការដំឡើងពន្ធរបស់លោក ដូណាល់ ត្រាំ លើដែកថែប និងអាលុយមីញ៉ូមអាចប៉ះពាល់ដល់ការនាំចេញរបស់អឺរ៉ុបក្នុងទំហំជិត៣០ពាន់លានដុល្លារ

ប្រភពច្បាស់ការទម្លាយឱ្យដឹងថា រលកទី១ នៃការដំឡើងពន្ធរបស់លោក ដូណាល់ ត្រាំ លើដែកថែប និងអាលុយមីញ៉ូម អាចធ្វើឱ្យប៉ះពាល់ការនាំចេញរបស់អឺរ៉ុប ក្នុងទំហំដល់ទៅជិត៣០ពាន់លានដុល្លារ។ កាលពីអាណត្តិទី១ លោក ដូណាល់ ត្រាំ ក៏ធ្លាប់បានដំឡើងពន្ធលើដែកថែប និងអាលុយមីញ៉ូមរបស់សហភាពអឺរ៉ុបដែរ ប៉ុន្តែលើកនេះ ទំនិញនាំចេញរបស់សហភាពអឺរ៉ុប ដែលរងផលប៉ះពាល់ដោយសារការដំឡើងពន្ធរបស់លោក ដូណាល់ ត្រាំ លើដែកថែប និងអាលុយមីញ៉ូមលើកនេះ គឺមានទំហំធំជាងកាលពីអាណត្តិទី១ ដល់ទៅ៤ដងឯណោះ។

ប្រធានពាណិជ្ជកម្មរបស់សហភាពអឺរ៉ុប លោក ម៉ាកូស សេហ្វកូវិក (Maros Sefcovic) បានពន្យល់ដល់បណ្ដាឯកអគ្គរដ្ឋទូតរបស់សហភាពអឺរ៉ុប កាលពីថ្ងៃសុក្រ សប្ដាហ៍មុន បន្ទាប់ពីលោកបានធ្វើដំណើរទស្សនកិច្ចទៅកាន់ទីក្រុងវ៉ាស៊ីនតោន សហរដ្ឋអាម៉េរិក ដើម្បីជួបជាមួយសមភាគីអាម៉េរិក។

ប្រធានពាណិជ្ជកម្មរបស់សហភាពអឺរ៉ុបរូបនេះ បានព្រមានថា ស្ថានភាពគឺមានភាពប្រែប្រួល ហើយព័ត៌មានលម្អិត និងវិសាលភាពនៃពន្ធគយណាមួយនៅតែអាចមានការប្រែប្រួល។

សូមបញ្ជាក់ថា លោក ដូណាល់ ត្រាំ គ្រោងចាប់ផ្ដើមអនុវត្តការដំឡើងពន្ធ២៥% លើដែកថែប និងអាលុយមីញ៉ូម ចាប់ពីថ្ងៃទី១២ ខែមីនា រួមជាមួយនឹងការរឹតបន្តឹងគោលនយោបាយជាមួយបណ្ដាប្រទេសជាដៃគូពាណិជ្ជកម្មផងដែរ។ ទោះជាយ៉ាងណា គណៈកម្មការអឺរ៉ុប ដែលជាអ្នកគ្រប់គ្រងគោលនយោបាយពាណិជ្ជកម្មរបស់សហភាពអឺរ៉ុប បានបដិសេធមិនធ្វើអត្ថាធិប្បាយទេ ជុំវិញបញ្ហានេះ៕

ដោយ: តែម សុខុម