នៅតាមផ្លូវហាណូយ គេឃើញមានបង្គោលភ្លើងមួយជួរស្ថិតនៅចំកណ្ដាលផ្លូវ ដោយសារការពង្រីកផ្លូវរបស់ក្រសួងសាធារណការនិងដឹកជញ្ជូន។ បង្គោលភ្លើងទាំងនេះ ថ្វីដ្បិតតែជាវត្ថុគ្មានជីវិតក៏ពិតមែន ប៉ុន្ដែ វាគឺជាឃាតករសម្លាប់មនុស្សអស់ជាច្រើនមកហើយ។ វាមិនមែនសម្លាប់មនុស្សដោយការឆក់នឹងខ្សែភ្លើងនោះទេ ប៉ុន្ដែ វាបង្កើតនូវគ្រោះថ្នាក់ចរាចរណ៍ ដោយអ្នកដំណើរបានបើកបុកជាបន្ដបន្ទាប់។
ពលរដ្ឋនិងអ្នកដំណើរបានចាត់ទុកផ្លូវហាណូយនេះ ថាជា«ផ្លូវមរណៈ» និងមានការខឹងសម្បា ព្រមទាំងនាំគ្នាថតបង្ហោះលើហ្វេសប៊ុក ដោយរិះគន់ក្រសួងសាធារណការនិងដឹកជញ្ជូនយ៉ាងចាស់ដៃទៀតផង។
ក្រោយការរិះគន់ ចាប់តាំងពីដើមខែឧសភាមក គេឃើញមានវត្តមានមន្ដ្រីក្រសួងសាធារណការនិងដឹកជញ្ជូន និងអាជ្ញាធរអគ្គិសនីកម្ពុជា បានចុះមករុះរើនិងដកបង្គោលភ្លើងនេះចេញជាបណ្ដើរៗហើយ ខណៈពលរដ្ឋវិញក៏មានការសាទរផងដែរ។
