នៅក្រោមច្បាប់ស្ដីពីថវិកាចំណាយសម្រាប់អាកាសធាតុ និងថាមពលសរុប ៤៣០ ពាន់លានដុល្លារ ដែលព្រឹទ្ធសភាអាមេរិកបានអនុម័តកាលពីថ្ងៃអាទិត្យនោះ សភាអាមេរិកនឹងសម្រេចមិនយកពន្ធចំនួន៧ពាន់៥រយដុល្លារ ចំពោះអ្នកទិញរថយន្តអគ្គិសនី ប៉ុន្តែ រដ្ឋាភិបាលអាមេរិកក៏បានដាក់ការរឹតបន្តឹងមួយចំនួន រួមទាំងការរារាំងយានយន្ត ដែលមិនបានដំឡើងនៅអាមេរិកខាងជើង មិនឱ្យទទួលបានការលើការលើកលែងពន្ធនេះឡើយ។
ការដាក់បម្រាម ដោយមិនអនុញ្ញាតឲ្យយានយន្តដែលបានដំឡើងនៅខាងក្រៅអាមេរិកខាងជើង ទទួលបានការលើកលែងពន្ធនេះ នឹងចូលជាធរមានភ្លាមៗ នៅពេលដែលប្រធានាធិបតីអាមេរិកលោក Joe Biden ចុះហត្ថលេខាលើច្បាប់នេះ។
ច្បាប់ដែលបានស្នើឡើងរបស់អាមេរិកនេះក៏បានរួមបញ្ចូលទាំងបទប្បញ្ញត្តិមួយចំនួនក្នុងបំណងរារាំងការប្រើប្រាស់សមាសធាតុអាគុយ ឬក៏សារធាតុរ៉ែសំខាន់ៗ ដែលមានប្រភពមកពីប្រទេសចិនផងដែរ។
លោកស្រី មីរឿម ហ្កាស៊ី ហ្វឺរឺ (Miriam Garcia Ferrer) អ្នកនាំពាក្យគណៈកម្មការអឺរ៉ុបបាននិយាយរិះគន់ចំពោះសំណើច្បាប់ថ្មីរបស់សហរដ្ឋអាមេរិកនេះ ដោយបានលើកឡើងថា វាមានលក្ខណៈរើសអើងតែម្ដង ទៅលើក្រុមហ៊ុនផលិតយានយន្ដបរទេស ដែលមាននាក់ទំនងងជាមួយផលិតករអាមេរិក។ អ្នកនាំពាក្យគណៈកម្មការអឺរ៉ុប គូសបញ្ជាក់ទៀតថា ពិតណាស់ សំណើច្បាប់ថ្មីរបស់អាមេរិកនេះ គឺមិនស្របតាមច្បាប់របស់អង្គការពាណិជ្ជកម្មពិភពលោក (WTO) នោះទេ។
ទោះយ៉ាងណា មន្ត្រីជាន់ខ្ពស់របស់សហភាពអឺរ៉ុបដដែលនេះ បានបន្ថែមថា សហភាពអឺរ៉ុបបានយល់ព្រមជាមួយទីក្រុងវ៉ាស៊ីនតោនថា ការលើកលែងពន្ធ គឺជាការលើកទឹកចិត្តដ៏សំខាន់មួយ ដើម្បីជំរុញតម្រូវការយានយន្ដអគ្គិសនី និងជំរុញការផ្លាស់ប្តូរទៅកាន់ការដឹកជញ្ជូនប្រកបដោយនិរន្តរភាព និងការកាត់បន្ថយការបំភាយឧស្ម័នផ្ទះកញ្ចក់។ ប៉ុន្តែពួកសហភាពអឺរ៉ុបចង់បានការធានាថា វិធានការដែលបានដាក់ចេញនេះ គឺយុត្តិធម៌និងគ្មានការរើសអើងដូច្នេះហើយពួកគេបានបន្តជំរុញឱ្យសហរដ្ឋអាមេរិក ដកការរើសអើងទាំងនេះចេញពីច្បាប់នេះវិញ ហើយធានាថាច្បាប់នេះ គឺអនុលោមទៅតាមច្បាប់របស់អង្គការ WTO ទាំងស្រុង។
អត្ថបទគួរអាន
ប្រទេសកូរ៉េខាងត្បូងឯណោះវិញ ដែលមានក្រុមហ៊ុនផលិតរថយន្ដធំៗជាច្រើនដែរនោះ ក៏បានលើកឡើងដែរថា កូរ៉េខាងត្បូងបានសម្តែងការព្រួយបារម្ភចំពោះសេចក្ដីព្រាងច្បាប់របស់អាមេរិកនេះថា អាចរំលោភលើច្បាប់អង្គការពាណិជ្ជកម្មពិភពលោកនិងកិច្ចព្រមព្រៀងពាណិជ្ជកម្មសេរីទ្វេភាគី។ ក្រសួងពាណិជ្ជកម្មកូរ៉េខាងត្បូងបាននិយាយក្នុងសេចក្តីថ្លែងការណ៍មួយដោយបានស្នើសុំឱ្យអាជ្ញាធរពាណិជ្ជកម្មសហរដ្ឋអាមេរិកបន្ធូរបន្ថយនូវលក្ខខណ្ឌតម្រូវ សម្រាប់ការនាំចូលសមាសធាតុអាគុយរថយន្ត និងតម្រូវការដំឡើងយានយន្តចុងក្រោយផងដែរ។
ក្រសួងពាណិជ្ជកម្មកូរ៉េខាងត្បូង ថ្មីៗនេះ បានបើកកិច្ចប្រជុំជាមួយក្រុមហ៊ុនផលិតរថយន្ត Hyundai Motor Co ក្រុមហ៊ុនផលិតអាគុយ LG Energy Solution ក្រុមហ៊ុន Samsung SDI និងក្រុមហ៊ុន SK ហើយក្រុមហ៊ុនទាំងនេះបានស្នើសុំឱ្យទីក្រុងសេអ៊ូលគាំទ្រពួកគេ ដើម្បីកុំឱ្យពួកគេជួបវិបត្តិនៃការប្រកួតប្រជែងនៅទីផ្សារអាមេរិកដោយសារតែច្បាប់មួយនេះ។
សូមរំលឹកថា ក្រុមហ៊ុន Hyundai ថ្មីៗនេះបានប្រកាសការវិនិយោគចំនួន ១០ ពាន់លានដុល្លារក្នុងការផលិតរថយន្តរួមទាំងការផលិតរថយន្តអគ្គិសនីនៅក្នុងរដ្ឋ Alabama និងរដ្ឋ Georgia សហរដ្ឋអាមេរិកផងដែរ៕
