នៅក្នុងលិខិតអញ្ជើញឱ្យចូលរួមកិច្ចប្រជុំ ដែលផ្ញើទៅកាន់មេដឹកនាំសហភាពអឺរ៉ុប និងត្រូវបាន ចេញផ្សាយកាលពីថ្ងៃទី២ ខែតុលា ប្រធានក្រុមប្រឹក្សាអឺរ៉ុបលោក ឆាល មីឆេល (Charles Michel) បានអំពាវនាវឱ្យមានការឆ្លើយតបយ៉ាងម៉ឺងម៉ាត់របស់សហភាពអឺរ៉ុបចំពោះស្ថានការណ៍វិវត្តថ្មីៗនៅអ៊ុយក្រែន រួមទាំងការបញ្ហាទាក់ទងនឹងការប្រកាសកាត់បញ្ចូលតំបន់ចំនួនបួននៃទឹកដីអ៊ុយក្រែនកាលពីសប្តាហ៍មុន។
ត្រូវបានស្រង់សំដីដោយរ៉យទ័រ លោក ឆាល មីឆេលថ្លែងថា៖ នៅក្នុងកិច្ចប្រជុំរបស់EU យើងនឹងពិភាក្សាអំពីការបន្តផ្តល់ការគាំទ្រផ្នែកសេដ្ឋកិច្ច យោធា នយោបាយ និងហិរញ្ញវត្ថុដ៏រឹងមាំដល់អ៊ុយក្រែន ឱ្យបានយូរអង្វែងតាមដែលទីក្រុងកៀវត្រូវការ។
ក្រៅពីនោះ កិច្ចប្រជុំដែលនឹងធ្វើឡើងនៅសាធារណរដ្ឋឆេក ក៏នឹងរិះរកគំនិតបន្ថែមសម្រាប់ប្លុកទាំង២៧ប្រទេស អំពីជំហានបន្ទាប់ដែលគេគួរតែអនុវត្ត ដើម្បីដោះស្រាយការកើនឡើងនៃតម្លៃថាមពល។ ប្រធានក្រុមប្រឹក្សាអឺរ៉ុបបានឱ្យទៀតថា គោលបំណងចម្បងរបស់អឺរ៉ុប គឺដើម្បីធានាសុវត្ថិភាពនៃការផ្គត់ផ្គង់ថាមពល និងដែលមានតម្លៃសមរម្យសម្រាប់ក្រុមគ្រួសារ និងអាជីវកម្មនៅអឺរ៉ុប ស្របពេលដែលរដូវត្រជាក់ខិតជិតមកដល់។
គួររំឭកថា កាលពីចុងសប្តាហ៍មុននេះ រដ្ឋមន្ត្រីក្រសួងថាមពលអឺរ៉ុប បានជួបប្រជុំគ្នាដើម្បីរិះរកមធ្យោបាយ ទប់តម្លៃថាមពល ជួយប្រជាពលរដ្ឋ និងក្រុមហ៊ុនសហគ្រាសកុំឱ្យធ្លាក់ក្នុងវិបត្តិ។ ហើយដែលនៅទីបំផុ សមាជិកអឺរ៉ុបទាំង២៧ប្រទេសបានព្រមព្រៀងគ្នា លើសំណើរបស់គណៈកម្មការអឺរ៉ុប ដែលគ្រោងកាត់យកប្រាក់ចំណេញរបស់ក្រុមហ៊ុនផលិតថាមពល មកប៉ះប៉ូវសម្រាប់ការចំណាយរបស់អ្នកប្រើប្រាស់វិញ និងគ្រោងបន្ថយតម្រូវការផ្នែកថាមពលផងដែរ។ ជាក់ស្តែង ក្រុមហ៊ុនចម្រាញ់ប្រេង ឬក្រុមហ៊ុនលក់ថាមពល ធ្យូងថ្ម និងហ្កាស ដែលមានប្រាក់ចំណេញកើនឡើងលើសមធ្យមភាគ នៃប្រាក់ចំណេញក្នុងរយៈពេលបួនឆ្នាំចុងក្រោយ ត្រូវបង់វិភាគទានជូនរដ្ឋ។ វិភាគទាននេះត្រូវអនុវត្តបណ្តោះអាសន្ន ដែលមានទម្រង់ជាពន្ធកំរិត៣៣% សម្រាប់យកទៅជួយសម្រាលការចំណាយផ្នែកថាមពលរបស់ពលរដ្ឋ និងក្រុមហ៊ុនខ្នាតតូចនិងមធ្យម។
សូមជម្រាបដែរថា បើតាមការប៉ាន់ស្មានសហភាពអឺរ៉ុបក៏នឹងជជែកគ្នាពីការការពារហេដ្ឋារចនាសម្ព័ន្ធសំខាន់ៗរបស់ពួកគេ ដោយសារតែមានករណី បែកធ្លាយបំពង់បង្ហូរ Nord Stream ក្រោមសមុទ្របាល់ទិក ដែលជាបំពង់នាំយកឧស្ម័នពីប្រទេសរុស្ស៊ីទៅកាន់អឺរ៉ុបផងដែរ៕
