អ្នកជំនាញព្រមានថា លុយថៃ កញ្ជ្រោលឡើងថ្លៃខ្លាំងពេក នឹងធ្វើឱ្យការនាំចេញ និងវិស័យទេសចរណ៍ថៃ ដាំក្បាលចុះនៅឆ្នាំ២០២៦

លោក ថាណាកន កាសេតសុវណ្ណ (Thanakorn Kasetsuwan) ប្រធានក្រុមប្រឹក្សាជាតិនៃក្រុមហ៊ុនដឹកជញ្ជូនទំនិញតាមកប៉ាល់ថៃ (TNSC) បានព្រមានធ្ងន់ៗថា លុយបាតថៃ កញ្ជ្រោលឡើងថ្លៃខ្លាំងពេកនឹងធ្វើឱ្យការនាំចេញ និងវិស័យទេសចរណ៍ថៃ ដាំក្បាលចុះនៅឆ្នាំ២០២៦។ លោកបានគូសបញ្ជាក់ថា ការនាំចេញរបស់ប្រទេសថៃ នៅឆ្នាំ២០២៦ នឹងជួបបញ្ហាប្រឈមជាច្រើនរួមមាន លុយបាតឡើងថ្លៃខ្លាំងពេក ការបញ្ជាទិញធ្លាក់ចុះ និងភាពមិនប្រាកដប្រជាជុំវិញពន្ធគយបដិការរបស់សហរដ្ឋអាម៉េរិក និងស្ថានភាពពាណិជ្ជកម្មពិភពលោក។

លុយបាតថៃ បានហក់ឡើងថ្លៃខ្លាំង ដោយ១ដុល្លារអាម៉េរិក ប្ដូរបានត្រឹមតែជិត៣១បាត ប៉ុណ្ណោះ ហើយលុយបាតអាចនឹងឡើងថ្លៃបន្ថែមទៀត ហើយជាលទ្ធផលនឹងធ្វើឱ្យធ្លាក់ចុះប្រាក់ចំណូលពីការនាំចេញនៅពេលប្តូរទៅជាលុយបាត។ ការបញ្ជាទិញថ្មីៗសម្រាប់ឆ្នាំ២០២៦ ក៏នឹងធ្លាក់ចុះដែរ ជាពិសេសការបញ្ជាទិញអង្ករ និងកៅស៊ូ ដែលកំពុងបង្ហាញពីការធ្លាក់ចុះរួចទៅហើយ។ ទោះជាយ៉ាងណាផលិតផលនានាដែលភ្ជាប់ទៅនឹងខ្សែច្រវាក់ផ្គត់ផ្គង់ជាសកលដូចជាគ្រឿងបន្លាស់រថយន្ត គ្រឿងអេឡិចត្រូនិច និងអាហារកែច្នៃជាដើម នៅតែមានសក្តានុពលសម្រេចបានកំណើន។

លុយបាតឡើងថ្លៃ ក៏កំពុងបង្កការព្រួយបារម្ភដល់វិស័យទេសចរណ៍របស់ថៃ ផងដែរ។ សមាគមភ្នាក់ងារទេសចរណ៍ថៃ បានព្រមានថា លុយបាតឡើងថ្លៃខ្លាំងពេកអាចធ្វើឱ្យទំនិញនាំចេញពីប្រទេសថៃ មានតម្លៃថ្លៃជាងទំនិញពីបណ្ដាប្រទេសជាគូប្រជែងដូចជា ជប៉ុន និងវៀតណាម ជាដើម ដែលធ្វើឱ្យប៉ះពាល់ដល់ការប្រកួតប្រជែងហៀរចូលដល់ឆ្នាំ២០២៦។ ទោះជាយ៉ាងណា ប្រទេសថៃ នៅតែរំពឹងថា នឹងទទួលបានភ្ញៀវទេសចរបរទេសប្រមាណ៣៩លាននាក់នៅឆ្នាំ២០២៦ ដែលនាំមុខដោយភ្ញៀវទេសចរចិន ក្នុងចំនួនជិត៩លាននាក់៕

ដោយ: តែម សុខុម