មន្ត្រីជាន់ខ្ពស់រូបនេះគូសបញ្ជាក់ថា កម្ពុជាមិនបានផ្តល់អាជ្ញាបណ្ណឲ្យក្រុមហ៊ុនណាមួយ ដើម្បីបើកដំណើរការល្បែងស៊ីសងតាមប្រព័ន្ធអេឡិចត្រូនិកនោះទេ ហើយការបង្ក្រាបបានល្បែងស៊ីសងអនឡាញកន្លងមកពីសំណាក់អាជ្ញាធរមានសមត្ថកិច្ច គឺសុទ្ធសឹងជាការលួចបង្កើតដោយខុសច្បាប់។ យ៉ាងណាក៏ដោយចុះ កម្ពុជារំពឹងថា ការប្រមូលចំណូលពីវិស័យល្បែងពាណិជ្ជកម្មស្របច្បាប់នៅឆ្នាំនេះ នឹងមានភាពល្អប្រសើរជាងឆ្នាំមុនៗ ខណៈបច្ចុប្បន្នមានក្រុមហ៊ុនអាជីវកម្មល្បែងជាង១០០ បានដាក់ពាក្យស្នើសុំអាជ្ញាបណ្ណបន្តប្រតិបត្តិការរបស់ខ្លួន។
ឯកឧត្តម រស់ ភីរុណ អនុប្រធាននាយកដ្ឋានឧស្សាហកម្មនិងហិរញ្ញវត្ថុនៃក្រសួងសេដ្ឋកិច្ចនិងហិរញ្ញវត្ថុបានអះអាងថា កម្ពុជាមិនបានផ្តល់អាជ្ញាបណ្ណឲ្យក្រុមហ៊ុនណាមួយ ដើម្បីបើកអាជីវកម្មល្បែងស៊ីសងតាមប្រព័ន្ធអេឡិចត្រូនិកនៅកម្ពុជានោះទេ។ ទោះយ៉ាងណា យើងសង្កេតសកម្មភាពលេងល្បែងស៊ីសងតាមប្រព័ន្ធអនឡាញត្រូវបានអាជ្ញាធរបង្ក្រាបបានជាបន្តបន្ទាប់។ ពាក់ព័ន្ធបញ្ហានេះឯកឧត្តម រស់ ភីរុណ បានគូសបញ្ជាក់ថា ល្បែងស៊ីសងតាមប្រព័ន្ធអេឡិចត្រូនិក ដែលបាននិងកំពុងដំណើរការសុទ្ធសឹងជាការលួចបង្កើតដោយខុសច្បាប់ពីសំណាក់ជនទុច្ចរិត។
មន្ត្រីជាន់ខ្ពស់រូបនេះ បានសង្កតធ្ងន់ថា សកម្មភាពលួចបង្កើតល្បែងស៊ីសងអនឡាញដោយខុសច្បាប់នេះ បាននិងកំពុងជះឥទ្ធិពលមិនល្អដល់វិស័យល្បែងពាណិជ្ជកម្មស្របច្បាប់នៅកម្ពុជា ដែលជាប្រភពផ្តល់ចំណូលមួយរបស់រដ្ឋ ព្រោះការបង្កើតល្បែងស៊ីសងតាមប្រព័ន្ធអនឡាញខុសច្បាប់ បានទាញទម្លាក់ប្រាក់ចំណូលរបស់ក្រុមហ៊ុនក្នុងវិស័យល្បែងពាណិជ្ជកម្ម ដែលមានអាជ្ញាបណ្ណពាណិជ្ជកម្មត្រឹមត្រូវ។
អត្ថបទគួរអាន
យ៉ាងណាមិញឯកឧត្តម រស់ ភីរុណ សង្ឃឹមថា ចំណូលដែលទទួលបានពីការបង់ពន្ធក្នុងវិស័យល្បែងពាណិជ្ជកម្មស្របច្បាប់នៅឆ្នាំនេះ នឹងមានភាពល្អប្រសើរឡើងវិញ បើធៀបនឹងបីឆ្នាំកន្លងមកដែលក្រុមហ៊ុនរកស៊ីក្នុងវិស័យនេះបានផ្អាកដំណើរស្ទើរទាំងស្រុង ដោយសារវិបត្តិកូវីដ-១៩។ ទោះយ៉ាងណា ឯកឧត្តម អះអាងថា ចំណូលក្នុងវិស័យល្បែងពាណិជ្ជកម្មអាចមានភាពល្អប្រសើរទៅបាន គឺវាអាស្រ័យលើវិស័យទេសចរណ៍មានភាពល្អប្រសើរដែរ ព្រោះចះទេសច្បាប់របស់កម្ពុជាមិនអនុញ្ញាតឲ្យប្រជាពលរដ្ឋលេងល្បែងនោះទេ។
បើតាមការគូសបញ្ជាក់របស់ ឯកឧត្តម រស់ ភីរុណ បច្ចុប្បន្នមានក្រុមហ៊ុនកាស៊ីណូចំនួន ១២៩ក្រុមហ៊ុនហើយ បានដាក់ពាក្យស្នើសុំអាជ្ញាបណ្ណ ដើម្បីបន្តប្រតិបត្តិការរបស់ខ្លួន។ ប៉ុន្តែក្នុងចំណោមក្រុមហ៊ុនដាក់ពាក្យទាំងនេះមិនប្រាកដថា សុទ្ធតែទទួលបានអាជ្ញាបណ្ណទាំងអស់នោះទេ។ ទោះយ៉ាងណាឯកឧត្តមរំពឹងថា ក្រុមហ៊ុនទាំងនេះនឹងទទួលបានជោគជ័យលើត្រួតពិនិត្យវាយតម្លៃពីស្ថាប័នជំនាញក្នុងការបន្តប្រតិបត្តិការរបស់ខ្លួន។ ចំនួនក្រុមហ៊ុនកាស៊ីណូជាង១០០ដែលបានស្នើសុំអាជ្ញាបណ្ណទាំងនេះ នៅមានចំនួនតិចតួចនៅឡើយ បើធៀបក្រុមហ៊ុនដែលទទួលបានអាជ្ញាបណ្ណកន្លងមក ដែលរហូតដល់ជាង២០០ក្រុមហ៊ុន។
បច្ចុប្បន្នមានកាស៊ីណូតិចតួចប៉ុណ្ណោះ បានបើកដំណើរការឡើងវិញ បើទោះបីរាជរដ្ឋាភិបាលបានបើកដំណើរការសកម្មភាពសង្គម និងសេដ្ឋកិច្ចលើគ្រប់វិស័យឡើងវិញ និងលើកលែងវិធានការកូវីដ-១៩ សម្រាប់អ្នកដំណើរចូលមកកម្ពុជាក៏ដោយ។ បើតាមការលើកឡើងរបស់ឯកឧត្តម រស់ ភីរុណ ក្នុងចំណោមក្រុមហ៊ុនជាង១០០ដែលបានដាក់ពាក្យស្នើអាជ្ញាបណ្ណមានក្រុមហ៊ុនប្រហែល២០ប៉ុណ្ណោះ បានបើកដំណើរការឡើងវិញ គិតមកទល់ពេលនេះ។ ឯកឧត្តមជឿជាក់ថា នៅ៥ឆ្នាំខាងមុខចំនួនកាស៊ីណូនៅកម្ពុជាបន្តថយចុះបន្ថែមទៀត ដោយសាររដ្ឋាភិបាលនឹងតម្រូវឲ្យមានការពង្រីកទំហំដើមទុនចុះបញ្ជី លើការវិនិយោគបើកអាជីវកម្មនេះ៕
