លោក ត្រាំ អះអាងពីការរកបានអ្នកមានលុយចង់ទិញ TikTok តែសុំលាក់អត្តសញ្ញាណសិន

នៅក្នុងបទសម្ភាសជាមួយសារព័ត៌មាន Fox News កាលពីពេលថ្មីៗ លោក ដូណាល់ ត្រាំ បាននិយាយថា លោកមានបញ្ជីឈ្មោះអ្នកមានទ្រព្យសម្បត្តិជាច្រើន ដែលកំពុងត្រៀមខ្លួនដើម្បីទិញយកកម្មវិធី TikTok របស់ប្រទេសចិន ហើយលោកអាចនឹងបង្ហាញអត្តសញ្ញាណមហាសេដ្ឋីទាំងនេះនៅរង្វង់២សប្ដាហ៍ខាងមុខនេះ។

លោក ត្រាំ បានសង្កត់ធ្ងន់ថា កិច្ចព្រមព្រៀងទិញលក់កម្មវិធី TikTok ទាមទារឱ្យមានការយល់ព្រមពីទីក្រុងប៉េកាំង បើមិនដូច្នេះទេនឹងមិនអាចសម្រេចបានឡើយ។ ប៉ុន្តែលោក ត្រាំ បានគិតថា ប្រធានាធិបតីចិនលោក ស៊ី ជីនពីង ប្រហែលជានឹងយល់ព្រមចំពោះកិច្ចព្រមព្រៀងនេះ។ ការលើកឡើងរបស់លោក ត្រាំ នេះធ្វើឡើងចំពេលអាម៉េរិកកំពុងពិភាក្សាពីលទ្ធភាពនៃការផ្អាកការយកពន្ធបដិការ ដែលអាម៉េរិកបានដាក់លើប្រទេសចិន។

ជោគវាសនារបស់កម្មវិធីវីដេអូខ្លី Tiktok នៅលើទឹកដីសហរដ្ឋអាម៉េរិក បានស្ថិតក្នុងភាពមិនច្បាស់លាស់តាំងពីការអនុម័តច្បាប់នៅឆ្នាំ២០២៤ ដើម្បីហាមឃាត់ការប្រើកម្មវិធីនេះនៅលើទឹកដីអាម៉េរិក ក្រោមហេតុផលព្រួយបារម្ភពីបញ្ហាសន្តិសុខជាតិ។

កាលពីដើមខែមិថុនា នេះ លោក ត្រាំ បានពន្យារពេលឱសានវាទសម្រាប់ក្រុមហ៊ុន ByteDance ដើម្បីដកខ្លួនចេញពីកម្មវិធីនេះនៅលើទឹកដីអាម៉េរិក ហើយនេះគឺជាការពន្យារពេលបន្ថែមលើកទីបីរបស់លោក ត្រាំ ចាប់តាំងពីតុលាការកំពូលបានតម្កល់ទុកច្បាប់ហាមឃាត់កម្មវិធី TikTok ឱ្យនៅដដែលនៅប៉ុន្មានថ្ងៃមុនការឡើងកាន់តំណែងប្រធានាធិបតីរបស់លោក ត្រាំ ក្នុងខែមករា ខណៈថ្ងៃផុតកំណត់ថ្មីគឺនៅថ្ងៃទី១៧ ខែកញ្ញា៕

ដោយ៖ សុខ មង្គល