ក្រុមហ៊ុនគ្រប់គ្រងទ្រព្យសកម្មពាណិជ្ជកម្មក្រុងបាងកក(BAM) ដែលជាក្រុមហ៊ុនគ្រប់គ្រងទ្រព្យសកម្មដ៏ធំបំផុតរបស់ថៃបានទម្លាយឱ្យដឹងថា ខ្លួនបានត្រៀមលុយប្រមាណ២៦០លានដុល្លារអាម៉េរិក សម្រាប់ការទិញយកឥណទានមិនដំណើរការ (NPL) ក្នុងឆ្នាំ២០២៥ ដែលស្របតាមថវិកាឆ្នាំ២០២៤ របស់ខ្លួន។ ក្រុមហ៊ុននេះលើកឡើងថា ខ្លួននឹងសម្រិតសម្រាំងក្នុងការទិញយកទ្រព្យសកម្មមិនសូវល្អ (bad asset) ស្របពេលសេដ្ឋកិច្ចពិភពលោកបន្តស្ថិតក្នុងភាពមិនប្រាកដប្រជានៅឡើយ ដែលមួយផ្នែកបានរងផលប៉ះពាល់ដោយសារការវិលត្រលប់ចូលកាន់អំណាចជាថ្មីរបស់អតីតប្រធានាធិបតីអាម៉េរិក លោក ដូណាល់ ត្រាំ។
លោក ប៊ុនឌីត អាណាន់តាម៉ុងគុល (Bundit Anantamongkol) នាយកប្រតិបត្តិក្រុមហ៊ុនគ្រប់គ្រងទ្រព្យសកម្មពាណិជ្ជកម្មក្រុងបាងកក (BAM) បានឱ្យដឹងថា ក្រុមហ៊ុនរបស់លោកនឹងបន្តតាមដានស្ថានការស្ទុះងើបឡើងវិញនៃសេដ្ឋកិច្ចរបស់ប្រទេសថៃ និងវាយតម្លៃផលប៉ះពាល់បណ្ដាលមកពីហានិភ័យភូមិសាស្ត្រនយោបាយ ភាពតានតឹងរវាងសហរដ្ឋអាម៉េរិក និងមហាយក្សចិន ព្រមទាំងគោលនយោបាយជាតិនិយមរបស់លោក ដូណាល់ ត្រាំ ផងដែរ។
នាយកប្រតិបត្តិរូបនេះបានគូសបញ្ជាក់ថា ក្រុមហ៊ុនគ្រប់គ្រងទ្រព្យសកម្មរបស់លោកគ្រោងនឹងទិញយកទ្រព្យសកម្មស្អុយដោយប្រយ័ត្នប្រយែង ដោយផ្តោតលើការគ្រប់គ្រងហានិភ័យដ៏រឹងមាំ ទោះបីជាមានការរំពឹងទុកថា ឥណទានមិនដំណើរការ (NPL) ក្នុងវិស័យធនាគាររបស់ប្រទេសថៃ នឹងកើនឡើងនៅឆ្នាំក្រោយយ៉ាងណាក្ដី។
សូមបញ្ជាក់ថា ក្រុមហ៊ុនគ្រប់គ្រងទ្រព្យសកម្មធំបំផុតរបស់ថៃ មួយនេះ ក៏បានដាក់ចេញផងដែរនូវកម្មវិធីរៀបចំបំណុលឡើងវិញជាច្រើន ដើម្បីជួយសម្រួលឱ្យអតិថិជនរបស់ខ្លួន ដែលរួមមានទាំងអាជីវកម្ម និងបុគ្គលគ្រប់គ្រងបំណុលរបស់ពួកគេឱ្យកាន់តែប្រសើរឡើង៕
ដោយ: តែម សុខុម
