ក្រុមហ៊ុន Gemdale ដែលជាអ្នកអភិវឌ្ឍន៍អចលនទ្រព្យមួយនៅប្រទេសចិន អាចគេចផុតពីការខកខានសងបំណុលបានម្ដងហើយចាប់តាំងពីខែវិច្ឆិកាមកក្រុមហ៊ុននេះបានចុះបញ្ជីគម្រោងជាច្រើននៅតាមទីក្រុងធំៗ ដើម្បីលក់ទ្រព្យសកម្មរបស់ខ្លួនដោយសារព្រួយបារម្ភអំពីនិរន្តរភាពហិរញ្ញវត្ថុកាន់ខ្លាំងឡើង។ នេះបើតាមសារព័ត៌មាន Caixin ដែលទទួលបានពីប្រភពជាច្រើន។
ប្រភពដែលដឹងពីបញ្ហានេះបាននិយាយថា ក្រុមហ៊ុន Gemdale ដែលជួញដូរនៅក្រុងសៀងហៃ កំពុងពិភាក្សាជាមួយនឹងម្ចាស់ភាគហ៊ុនធំទីពីររបស់ខ្លួន គឺក្រុមហ៊ុន Futian Investment Holdings ដែលគ្រប់គ្រងដោយរដ្ឋទាក់ទងនឹងការលក់ភាគហ៊ុនរបស់ខ្លួននៅក្នុងគម្រោងលំនៅឋានប្រណីតនៅកណ្តាលទីក្រុង Shenzhen ប៉ុន្តែភាគីទាំងពីរមិនទាន់ព្រមព្រៀងគ្នាពីតម្លៃនៅឡើយទេ ខណៈពួកគេកំពុងចរចាគ្នា។
សារព័ត៌មាន Caixin បាននិយាយថា ជាងនេះទៅទៀត ក្រុមហ៊ុន Gemdale កំពុងស្វែងរកអ្នកទិញទ្រព្យសម្បត្តិការិយាល័យ និងឧទ្យានឧស្សាហកម្មរបស់ខ្លួននៅទីក្រុងស៊ាងហៃផងដែរ ហើយថា ពេលនេះអាទិភាព គឺត្រូវពន្លឿនការលក់យករួចខ្លួនដោយមិនគិតពីប្រាក់ចំណេញនោះទេ បើទោះជាវាមានន័យថា ជាការលក់ដោយបញ្ចុះតម្លៃយ៉ាងណាក៏ដោយ។
ទីភ្នាក់ងារវាយតម្លៃ Ratingdog ដែលមានមូលដ្ឋាននៅទីក្រុងហ្សិនជិន បានប៉ាន់ប្រមាណថា ប្រសិនបើការលក់របស់ក្រុមហ៊ុន Gemdale ធ្លាក់ចុះ៣០% នៅរវាងឆមាសទីពីរ ឆ្នាំ២០២៣ និងឆមាសទីមួយឆ្នាំ២០២៤ ធៀបនឹងឆ្នាំ២០២២ នោះក្រុមហ៊ុននេះនឹងប្រឈមមុខនឹងកង្វះខាតប្រាក់ ដើម្បីសងបំណុលជាង៦៣៥លានដុល្លារ នៅក្នុងរយៈពេលមួយឆ្នាំទៀត។
អត្ថបទគួរអាន
បើតាមក្រុមហ៊ុនផ្តល់ទិន្នន័យ Dealing Matrix បានបង្ហាញថា ក្រុមហ៊ុន Gemdale មានមូលបត្របំណុលក្នុងស្រុកចំនួន១៧ ដែលមានតម្លៃសរុបជាង៣ពាន់លានដុល្លារ និងមូលបត្របំណុលមួយទៀតក្នុងតម្លៃ៤៨០លានដុល្លារអាម៉េរិក។
ទន្ទឹមនឹងនេះ កាលពីថ្ងៃចន្ទ តុលាការក្រុងហុងកុង បានសម្រេចពន្យារពេលសវនាការជម្រះក្ដីទាក់ទិននឹងការរំលាយក្រុមហ៊ុន China Evergrande Group រហូតដល់ថ្ងៃទី២៩ ខែមករា ឆ្នាំ២០២៤ ដោយសារចៅក្រមបានស្នើសុំឱ្យអ្នកអភិវឌ្ឍន៍ ដែលកំពុងជួបវិបត្តិមួយនេះពិភាក្សាជាមួយនឹងអាជ្ញាធរពាក់ព័ន្ធ ស្ដីពីលក្ខខណ្ឌនៃការរៀបចំរចនាសម្ព័ន្ធបំណុលជាថ្មី។
ក្រុមហ៊ុន Evergrande ដែលជាអ្នកអភិវឌ្ឍន៍អចលនទ្រព្យបានជំពាក់បំណុលច្រើនជាងគេបំផុតនៅលើពិភពលោករហូតដល់ជាង៣០០ពាន់លានដុល្លារអាម៉េរិកនោះបានខកខានសងបំណុលនៅក្រៅប្រទេសនៅចុងឆ្នាំ២០២១ ហើយបានក្លាយជាអ្នកប្រកាសអាសន្នពីវិបត្តិបំណុល ដែលបានលេបត្របាក់វិស័យអចលនទ្រព្យរបស់ចិនចាប់តាំងពីពេលនោះមក។
សវនាការជម្រះក្តីពីការរំលាយក្រុមហ៊ុននេះ បានបន្តនៅក្នុងតុលាការហុងកុងកាលពីថ្ងៃចន្ទ ចំពេលមានភាពមិនប្រាកដប្រជាអំពីថា តើក្រុមហ៊ុនអភិវឌ្ឍន៍មួយនេះនឹងអាចដាក់សំណើររៀបចំរចនាសម្ព័ន្ធបំណុល«ជាក់ស្តែង»ដូចដែលបានបញ្ជាដោយតុលាការកាលពីខែតុលាដែរឬយ៉ាងណា៕
អត្ថបទ៖ សុខ ជា
None
