ទិន្នន័យរបស់ក្រុមហ៊ុនស្រាវជ្រាវ EV Rho Motion បានបង្ហាញឱ្យដឹងថា ការលក់រថយន្តអគ្គិសនី និងរថយន្ត Hybrid ទូទាំងពិភពលោកមានចំនួនប្រមាណ៥,៦លានគ្រឿង នៅ៤ខែ ឆ្នាំនេះ មានការកើនឡើងជាង២៩% បើធៀបនឹងរយៈពេលដូចគ្នាកាលពីឆ្នាំមុន។ គ្រាន់តែនៅក្នុងពេញមួយខែមេសា ការលក់រថយន្តសម្រេចបានរហូតដល់១,៥លានគ្រឿង។ កំណើននៃការលក់រថយន្តអគ្គិសនីនេះ ត្រូវបានជំរុញជាចម្បងដោយសារការកើនឡើងតម្រូវការប្រើប្រាស់រថយន្តអគ្គិសនីនៅប្រទេសចិន និងអឺរ៉ុប ខណៈតម្រូវនៅអាម៉េរិក បានបង្ហាញពីនិន្នាការកំណើនធ្លាក់ចុះ។
លោក ឆាល ឡេស្ទ័រ (Charles Lester) អ្នកគ្រប់គ្រងទិន្នន័យរបស់ក្រុមហ៊ុន Rho Motion បាននិយាយនៅក្នុងសេចក្តីប្រកាសព័ត៌មានមួយថា ការដាក់គំនាបពន្ធរបស់អាម៉េរិក លើប្រទេសផ្សេងៗវាបានជះឥទ្ធិពលអវិជ្ជមានដល់កំណើនក្នុងឧស្សាហកម្មផលិតរថយន្តអគ្គិសនី ប៉ុន្តែក្រុមហ៊ុនផលិតរថយន្តអគ្គិសនីក្នុងស្រុកនៅប្រទេសចិន និងសហភាពអឺរ៉ុប នៅតែបន្តដំណើរការល្អ និងបង្កើនចំណែកទីផ្សារកាន់តែធំ។
លោកបានបន្តទៀតថា ការលក់រថយន្តអគ្គិសនីតាំងពីដើមឆ្នាំរហូតមកដល់ពេលនេះ អឺរ៉ុបជាទីផ្សាររថយន្តអគ្គិសនីដ៏ធំមួយ ដោយសារពលរដ្ឋអឺរ៉ុបភាគច្រើនដាក់គោលដៅកាត់បន្ថយការបំភាយឧស្ម័នការបូនិចតិចឱ្យបានតិចបំផុត សម្រាប់សកម្មភាពប្រចាំរបស់ពួកគេ។
ចាប់ពីខែមករា ដល់ខែមេសា ការលក់រថយន្តអគ្គិសនីនៅចិន មានការកើនឡើង៣៥% អឺរ៉ុបមានកើនឡើង ២៥% ចំណែកសហរដ្ឋអាម៉េរិកកើនឡើងតែ៥% ប៉ុណ្ណោះ ខណៈនៅផ្នែកផ្សេងៗនៃពិភពលោកកើនឡើង ៣៧%៕
ដោយៈ សរ សុជាតិ
