![តម្លៃមាស](https://cdn.cambonomist.com/media/images/tmlmslngdlchng_1ad22.2e16d0ba.fill-960x540_BG9LHro.jpg)
លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរីធី បានគូសបញ្ជាក់ថា តម្លៃមាសនៅ២សប្ដាហ៍កន្លងមកនេះបានហក់ឡើងខ្ពស់មកវិញ បើធៀបនឹងតម្លៃនៅក្នុងខែមិថុនាកន្លងទៅ។ ជាក់ស្តែង បច្ចុប្បន្នតម្លៃមាសក្នុង១តម្លឹងមានតម្លៃជាង២ពាន់៩រយ៥០ដុល្លារ ខណៈកាលពីអំឡុងខែមិថុនា មាសមានតម្លៃត្រឹមតែ២ពាន់៨រយដុល្លារក្នុង១តម្លឹងប៉ុណ្ណោះ។ បើតាមការអះអាងរបស់អ្នកជំនាញរូបនេះ កត្តាដែលជំរុញឱ្យតម្លៃមាសកើនឡើងនេះ គឺដោយសារវិនិយោគិនធំៗ បានដកលុយមួយចំនួនទៅវិនិយោគលើតម្លៃហាងឆេងមាស និងភាគហ៊ុនវិញ។
ម្យ៉ាងទៀត គឺពាក់ព័ន្ធនឹងព័ត៌មាននៃទិន្នន័យនៃកំណើនអ្នកអត់ការងារធ្វើនៅសហរដ្ឋអាម៉េរិក និងប្រាក់ចំណូលពីការងារមិនមានការកើនឡើង ដែលជាហេតុធ្វើឱ្យកំណើនសេដ្ឋកិច្ចមានការធ្លាក់ចុះ ហើយក៏បានទាញឱ្យតម្លៃប្រាក់ដុល្លារចាប់ផ្ដើមធ្លាក់ចុះផងដែរ ដែលជំរុញឱ្យតម្លៃមាសមានការកើនឡើងមកវិញ។
បើតាម លោក ឡុង សំណាង កត្តាមួយចំនួនទៀតដែលជំរុញឱ្យតម្លៃមាសមានការកើនឡើងដែរនោះ គឺដោយសារបញ្ហាសេដ្ឋកិច្ចសកល តួយ៉ាងប្រទេសមួយចំនួនកំពុងរវល់ជាមួយនឹងការបោះឆ្នោត ជាពិសេសការឃោសនាបោះឆ្នោតនៅសហរដ្ឋអាមេរិក ដែលមានហេតុការមួយចំនួនបានកើនមានលើអតីតប្រធានាធិបតីអាមេរិកលោក ដូ ណាល់ត្រាំ កាលពីពេលថ្មីៗនេះ បានរាំងស្ទះដល់កំណើនសេដ្ឋកិច្ចទាំងមូល និងបានធ្វើឱ្យប្រាក់ដុល្លារអាមេរិកធ្លាក់ចុះ។ មួយវិញទៀត បញ្ហាភាពតានតឹងនៃភូមិសាស្ត្រនយោបាយនៃប្រទេសមហាអំណាចមួយចំនួន ក៏បានជំរុញឱ្យសេដ្ឋកិច្ចសកលគាំងស្ទះ មិនអាចងើបប្រសើរបានលឿនផងដែរ៕