ការស្ទង់មតិ តាម រយៈ ការ ផ្ញើ សារ តាម អ៊ីមែល ពីខែមីនាដល់ខែមេសា បាន បង្ហាញ ថា ខណៈដែលសាធារណជនជប៉ុនមើលឃើញពីតម្រូវការក្នុងការបង្កើនសមត្ថភាពការពារជាតិ ក្នុង កម្រិតមួយកាន់តែខ្ពស់ ដោយសារតែបរិយាកាសសន្តិសុខកាន់តែយ៉ាប់យ៉ឺន នោះ ជប៉ុន មាន ការស្ទាក់ ស្ទើរក្នុងការបង្កើនការចំណាយលើវិស័យការពារជាតិដ៏សន្ធឹកសន្ធាប់ ឬ ក៏ ផ្តល់ ហិរញ្ញ ប្បទានដល់ផែនការនោះ តាម រយៈ ការ ដំឡើង ពន្ធ ។
ការស្ទង់មតិដែលផ្តោតលើបញ្ហាសន្តិសុខជាតិបានកំណត់គោលដៅបុរសនិងស្ត្រីចំនួន ៣ ពាន់នាក់ នៅក្នុងប្រទេសជប៉ុន ដែលមានអាយុចាប់ពី ១៨ ឆ្នាំឡើងទៅ ក្នុងនោះអ្នកចូលរួមឆ្លើយ ១៩៥៩ នាក់ ត្រូវបានចាត់ទុកថាមានសុពលភាព។
នៅក្នុងការស្ទង់មតិ នេះ គឺ មានតែ ចំនួន ១៩ % ប៉ុណ្ណោះដែល បង្ហាញពីការគាំទ្រចំពោះការ អំពាវនាវរបស់នាយករដ្ឋមន្ត្រីជប៉ុន លោក ហ្វូមីអូ គីស៊ីដា សុំ ឱ្យ ផ្តល់ហិរញ្ញប្បទានមួយ ផ្នែក នៃការចំណាយ លើវិស័យការពារជាតិ តាម រយៈ ការ បង់ ពន្ធ ។ កន្លងទៅ រដ្ឋាភិបាល ជប៉ុន បាន សម្រេចកាល ពី ខែធ្នូ បង្កើនការ ចំណាយ លើវិស័យការពារជាតិ ឱ្យ បាន ជាង ៥០ % គឺ ឡើង ដល់ ៣១៩ ប៊ីលានដុល្លារ ក្នុងរយៈពេល ប្រាំ ឆ្នាំ ទៅមុខ ចាប់ពីឆ្នាំ សារពើពន្ធ ២០២៣ តទៅ ។
ជាការផ្លាស់ប្តូរដ៏សំខាន់នៅក្នុងគោលនយោបាយសន្តិសុខសម្រាប់ប្រទេសជប៉ុន ដែល ប្រកាន់ ភ្ជាប់តាម រដ្ឋធម្មនុញ្ញសន្តិភាពនិយម ក្រោយពីសង្គ្រាម រដ្ឋាភិបាល ជប៉ុន បានកំណត់គោលដៅបង្កើន ថវិកាការពារជាតិប្រចាំឆ្នាំនិងការចំណាយពាក់ព័ន្ធផ្សេង ទៀត ឱ្យ បាន ២% នៃផលិតផលក្នុងស្រុកសរុប ត្រឹម ឆ្នាំ សារពើពន្ធ ២០២៧ ។
យោងតាមលទ្ធផលនៃការស្ទង់មតិ មាន ជិត ៦០ % នៃអ្នកចូលរួមឆ្លើយសំណួរ បាននិយាយថា ផែនការកសាងវិស័យ ការពារជាតិរយៈពេល ៥ ឆ្នាំ គឺ «មិន សមរម្យ» នោះ ទេ ខណៈដែល ៨៨ % ទៀត បាននិយាយថា ការពន្យល់បកស្រាយ របស់ លោក គីស៊ីដា ទាក់ ទង នឹងការពង្រឹងវិស័យ ការពារជាតិរបស់ជប៉ុន នេះ គឺ « មិន គ្រប់គ្រាន់ ទេ » ។
ពាក់ ព័ន្ធ នឹង លទ្ធភាពដែល ប្រទេស ចិន អាច ចាត់វិធានការយោធាក្នុង បំណង បង្រួបបង្រួម ជាមួយតៃវ៉ាន់ នោះ អ្នកឆ្លើយតប ក្នុង ការ ស្ទង់ មតិ ចំនួន ៥៣% បាននិយាយថា ពួកគេមាន «ការព្រួយបារម្ភយ៉ាងខ្លាំង » ហើយចំនួន ៣៦% បាននិយាយថា ពួកគេ ក៏ មាន ការ ព្រួយ បារម្ភ ខ្លះៗ ដែរ ។
អត្ថបទគួរអាន
នៅពេលសួរថា តើ ជប៉ុន គួរ តែ ឆ្លើយតប យ៉ាង ណា ប្រសិន បើ មាន ការ វាយ ប្រហារ ទៅ លើ តៃវ៉ាន់ មែន នោះ មានអ្នកចូលរួមក្នុងការស្ទង់មតិចំនួន ៥៦% ដែល ជាក្រុម ធំជាងគេ បំផុត ចង់ឱ្យ ជប៉ុនធ្វើកិច្ចខិតខំផ្នែក ការទូតនិងចាត់វិធានការមិនមែនយោធា ដូចជាការដាក់ទណ្ឌកម្មសេដ្ឋកិច្ចជាដើម។
ចំណែក ក្រុមធំបំផុត ទី២ដែល មាន ចំនួន ៣៣% នោះ បាន និយាយថា ជប៉ុនក្នុងនាមជាសម្ព័ន្ធមិត្តសន្តិសុខដ៏សំខាន់របស់សហរដ្ឋអាមេរិក គួរតែផ្តល់ការគាំទ្រ ផ្នែកភស្តុភារ ដល់សហរដ្ឋអាមេរិក ដែល អាច បោះ ជំហាន ចូល ជួយ ការ ពារ កោះ តៃវ៉ាន់ ប្រឆាំង នឹងការឈ្លានពានរបស់ប្រទេស ចិន។
ក្នុងចំណោមអ្នកឆ្លើយសំណួរ មាន ៦១ ភាគរយ ដែលបាននិយាយថា ពួកគេគាំទ្រការសម្រេចចិត្តរបស់ប្រទេសជប៉ុនក្នុងការទទួលបាននូវអ្វីដែលហៅថាជាសមត្ថភាពវាយបកដែលអាចវាយប្រហារគោលដៅនៅក្នុងទឹកដីរបស់សត្រូវ។ ប៉ុន្តែ ៣៦ ភាគរយបានប្រឆាំងនឹងការទទួលបានបច្ចេកវិទ្យានេះ។
ភាគច្រើនដែលយល់ព្រមឱ្យជប៉ុនបង្កើតសមត្ថភាពថ្មីនេះ ទំនងជាតំណាងឱ្យអ្នកដែលទទួលស្គាល់ថាបរិយាកាសសន្តិសុខគឺកាន់តែធ្ងន់ធ្ងរ ចំពេលមានកំណើនឥទ្ធិពលយោធាចិន ការអភិវឌ្ឍន៍មីស៊ីលនិងនុយក្លេអ៊ែររបស់កូរ៉េខាងជើង និងសង្គ្រាមរបស់រុស្ស៊ីលើអ៊ុយក្រែន។
ជិត ៦០ ភាគរយនៃអ្នកឆ្លើយសំណួរ បាននិយាយថា ការណ៍ដែលជប៉ុនមានសមត្ថភាពវាយបកនឹងរួមចំណែកដល់ការប្រណាំងប្រជែងសព្វាវុធជាមួយប្រទេសជិតខាង ហើយ ៥៣ ភាគរយបាននិយាយថា ការទទួលបានសមត្ថភាពវាយបកនឹងធ្វើឱ្យគោលនយោបាយដែលមានទិសដៅត្រឹមតែការពារខ្លួនរបស់ជប៉ុនលែងមានខ្លឹមសារ៕
អត្ថបទ៖ សុខ ជា
