តម្លៃមាសនៅលើទីផ្សារអន្តរជាតិបានបំបែកកំណត់ត្រាជាថ្មីហក់ឡើងដល់ជាង៣,៦៧០ដុល្លារក្នុងមួយតម្លឹង

ទន្ទឹមនេះ ធនាគារ ANZ ដែលជាធនាគារធំបំផុតមួយនៅប្រទេសអូស្ត្រាលីបានព្យាករថា មាសអាចនឹងហក់ឡើងដល់៣,២០០ដុល្លារអាម៉េរិកក្នុងមួយអោន ឬ៣,៩០០ដុល្លារអាម៉េរិកក្នុងមួយតម្លឹងនៅក្នុងរយៈពេល៦ខែខាងមុខ។ នេះបើយោងតាមការចុះផ្សាយរបស់ទីភ្នាក់ងារព័ត៌មានធំៗជាច្រើន។

មាសនៅលើទីផ្សារអន្តរជាតិបានសាងកំណត់ត្រាថ្មីគួរឱ្យភ្ញាក់ផ្អើលកាលពីថ្ងៃសុក្រ សប្តាហ៍មុន ក្រោយហក់ឡើងលើស៣ពាន់ដុល្លារអាម៉េរិកក្នុងមួយអោន ឬលើស៣,៦០០ដុល្លារអាម៉េរិកក្នុងមួយតម្លឹង។ បន្ទាប់មកនៅថ្ងៃទី១៨ ខែមីនា ហាងឆេងមាស ជាពិសេសនៅសហរដ្ឋអាម៉េរិកបានបំបែកកំណត់ត្រាជាថ្មីហក់ឡើងលើស៣ពាន់លានដុល្លារអាម៉េរិកក្នុងមួយអោន ឬ៣,៦៧៣ដុល្លារអាម៉េរិកក្នុងមួយតម្លឹង។

មាសដែលជាទ្រព្យសកម្មដ៏មានសុវត្ថិភាពបំផុតតាំងពីបរមបុរាណមក បានហក់ឡើងថ្លៃខ្លាំងគួរឱ្យភ្ញាក់ផ្អើលរហូតដល់ទៅជាង១៤%នៅដើមឆ្នាំ២០២៥ នេះ។ ចាប់តាំងពីប្រធានាធិបតីអាម៉េរិកលោក ដូណាល់ ត្រាំ ចូលកាន់តំណែងជាផ្លូវការនៅថ្ងៃទី២០ ខែមករា ឆ្នាំនេះ ហាងឆេងមាសបានហក់ឡើងឈានដល់កម្រិតបំបែកកំណត់ត្រាជាបន្តបន្ទាប់រហូតដល់ទៅ១៤ដង ហើយកត្តាចម្បងនៃការហក់ឡើងថ្លៃឥតឈប់ឈរនេះ គឺដោយសារសង្គ្រាមពាណិជ្ជកម្ម និងភាពមិនប្រាកដប្រជានៅទូទាំងពិភពលោក។

លោក ដូណាល់ ត្រាំ បានប្រកាសដំឡើងពន្ធគយជាបន្តបន្ទាប់ រួមទាំងពន្ធ២៥%លើដែកថែប និងអាលុយមីញ៉ូម ដែលបានចូលជាធរមានកាលពីខែកុម្ភៈ រួមជាមួយការដំឡើងពន្ធផ្សេងៗទៀត ដែលនឹងចូលជាធរមាននៅថ្ងៃទី២ ខែមេសា ផងដែរ។

លោក អេតវើដ ម៊ែរ (Edward Meir) អ្នកវិភាគនៅក្រុមហ៊ុនហិរញ្ញវត្ថុ Marex ដែលមានមូលដ្ឋាននៅប្រទេសអង់គ្លេសបានលើកឡើងថា មាសកំពុងហក់ឡើងថ្លៃខ្ពស់ដោយសារតែប្រាក់ដុល្លារអាម៉េរិកធ្លាក់ថ្លៃ និងភាពមិនប្រាកដប្រជាផ្នែកពន្ធគយដែលកំពុងបន្តកើតមាន។

ទន្ទឹមនេះ ធនាគារ ANZ ដែលជាធនាគារធំបំផុតមួយនៅប្រទេសអូស្ត្រាលីបានដំឡើងការព្យាកររយៈពេលខ្លីរបស់ខ្លួនថា មាសអាចនឹងហក់ឡើងដល់៣,១០០ដុល្លារអាម៉េរិកក្នុងមួយអោន ឬ៣,៧៨០ដុល្លារអាម៉េរិកក្នុងមួយតម្លឹង។ ធនាគារនេះបានព្យាករបន្ថែមទៀតថា មាសអាចនឹងហក់ឡើងដល់៣,២០០ដុល្លារអាម៉េរិកក្នុងមួយអោន ឬ៣,៩០០ដុល្លារអាម៉េរិកក្នុងមួយតម្លឹងនៅក្នុងរយៈពេល៦ខែខាងមុខ៕

ដោយ: តែម សុខុម