តម្លៃមាសបានធ្លាក់ចុះយ៉ាងគំហុក ក្រោយអ្នកវិនិយោគសម្រុកលក់មាសចេញ

តម្លៃមាសបានធ្លាក់ចុះ០,៣%មកនៅត្រឹមតម្លៃ៣,០២៧ដុល្លារក្នុងមួយអោននៅក្នុងការជួញដូរនៅថ្ងៃចន្ទ ដើមសប្តាហ៍នេះ បន្ទាប់ពីបានធ្លាក់ចុះជាង១%នៅក្នុងការជួញដូរកាលពីលើកមុនដែលជាការធ្លាក់ចុះដល់កម្រិតទាបបំផុតចាប់តាំងពីថ្ងៃទី១៣ ខែមីនា មក។ សន្ទស្សន៍តម្លៃមាសនាពេលអនាគតនៅសហរដ្ឋអាម៉េរិកបានកើនឡើង០,៤% ដោយឡើងដល់តម្លៃ៣,០៤៧ដុល្លារក្នុងមួយអោន។

តម្លៃមាសបានធ្លាក់ចុះជាង៣%កាលពីថ្ងៃសុក្រ បន្ទាប់ពីការប្រកាសដាក់ចេញវិធានការយកពន្ធច្រើនជាងការរំពឹងទុករបស់ប្រធានាធិបតីអាម៉េរិកលោក ដូណាល់ ត្រាំ ដែលបានបង្កភាពភ្ញាក់ផ្អើលពាសពេញទីផ្សារពិភពលោក។

ការធ្លាក់ចុះតម្លៃមាស ដែលជាវត្ថុជួញដូរមានតម្លៃមានសុវត្ថិភាពបំផុតក្នុងស្ថានភាពសេដ្ឋកិច្ចមិនច្បាស់លាស់នេះ ត្រូវបានក្រុមឈ្មួញប៉ាន់ស្មានថា គឺដោយសារក្រុមវិនិយោគិនសម្រុកលក់មាសចេញ ដើម្បីយកចំណេញ និងទប់ទល់នឹងការខាតបង់ ឬក៏ទូទាត់ដោះដូរជាមួយនឹងទ្រព្យសម្បត្តិផ្សេងទៀត៕

អត្ថបទ៖ សុខ មង្គល