ទីផ្សារភាគហ៊ុននៅកម្ពុជាមានការរំជើបរំជួលយ៉ាងណាដែរ ក្រោយគោលនយោបាយពន្ធរបស់លោក ត្រាំ ធ្វើឱ្យទីផ្សារហ៊ុននៅអាម៉េរិករងការរង្គោះរង្គើ?

ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃផ្សារមូលបត្រកម្ពុជា បានគូសបញ្ជាក់ថា ការជួញដូរភាគហ៊ុននៅកម្ពុជានៅប៉ុន្មានថ្ងៃកន្លងមកនេះ មានការកើនឡើង និងថយចុះជាធម្មតា ខណៈតម្លៃភាគហ៊ុននៅតាមបណ្ដាប្រទេសមួយចំនួន ក៏មានការកើនឡើង និងធ្លាក់ចុះដូចគ្នាដែរ។ ការណ៍នេះត្រូវបាន ឯកឧត្តម សន្និដ្ឋានថា ការធ្លាក់ចុះតម្លៃភាគហ៊ុនមិនមែនកើតឡើងដោយសារគោលនយោបាយពន្ធគយរបស់លោក ដូណាល់ ត្រាំ ប្រធានាធិបតីសហរដ្ឋអាម៉េរិក ទាំងស្រុងនោះទេ។ ស្ថិតក្នុងស្ថានភាពនេះ អ្នកជំនាញរូបនេះជំរុញឱ្យវិនិយោគិនក្នុងទីផ្សារភាគហ៊ុនត្រូវស្វែងយល់ពីហិរញ្ញវត្ថុរបស់ក្រុមហ៊ុននានាឱ្យបានច្បាស់លាស់មុននឹងសម្រេចចិត្តវិនិយោគ។

ពាក់ព័ន្ធស្ថានភាពទីផ្សារជួញដូរភាគហ៊ុននៅកម្ពុជាត្រូវបានថ្នាក់ដឹកនាំរូបនេះអះអាងថា នៅក្នុងរយៈពេល៣ខែឆ្នាំ២០២៥ នេះ ការវិនិយោគមានសកម្មភាពជាធម្មតា ពោលគឺមិនមានការកើនឡើង ឬថយចុះគួរឱ្យកត់សម្គាល់នោះទេ ដោយសារតែអ្នកវិនិយោគភាគច្រើននៅរង់ចាំមើលការវិវត្តនៃស្ថានភាពម៉ាក្រូសេដ្ឋកិច្ច និងបញ្ហាភូមិសាស្រ្តនយោបាយនៅលើពិភពលោក។

យ៉ាងណាមិញអគ្គនាយកផ្សារមូលបត្រកម្ពុជារូបនេះជឿជាក់ថា បើគ្មានឧបសគ្គ ឬការប្រែប្រួលទេផ្សារមូលបត្រកម្ពុជានឹងទទួលបានក្រុមហ៊ុនមួយចំនួនចុះបញ្ជីបោះផ្សាយលក់មូលបត្រកម្មសិទ្ធិ និងមូលបត្របំណុលនៅឆ្នាំនេះ ដែលនឹងជួយឱ្យវិស័យភាគហ៊ុននៅកម្ពុជាកាន់តែមានភាពរីកចម្រើនបន្ថែមទៀត។ បើតាមថ្នាក់ដឹកនាំរូបនេះ ការកៀរគរទុនពីផ្សារមូលបត្រនៅក្នុងឆ្នាំ២០២៥ នេះ អាចនឹងមានការកើនឡើងប្រមាណ២០០លានដុល្លារបន្ថែមទៀត។

សូមបញ្ជាក់ថា គិតត្រឹមខែកុម្ភៈ ឆ្នាំ២០២៥ មានក្រុមហ៊ុនចំនួន២៤ បានមកចុះបញ្ជីនៅផ្សារមូលបត្រកម្ពុជា ក្នុងនោះក្រុមហ៊ុនចំនួន១១បានចុះបញ្ជីបោះផ្សាយលក់ភាគហ៊ុន និងក្រុមហ៊ុនចំនួន១៣ បានចុះបញ្ជីបោះផ្សាយលក់សញ្ញាបណ្ណ ឬមូលបត្របំណុល ដោយក្រុមហ៊ុនទាំងនេះអាចកៀរគទុនពីទីផ្សារបានប្រមាណ៤៧៥លានដុល្លារ៕

អត្ថបទ៖ បូ ដូឡា,រូបភាព ឯកសារ