ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា បើទោះបីជាតម្លៃស្រូវរបស់កម្ពុជា នៅឆ្នាំ២០២៤នេះ ហាក់មានការធ្លាក់ចុះបន្តិច បើធៀបនឹងតម្លៃកាលពីឆ្នាំ២០២៣ ក៏ពិតមែន ប៉ុន្តែតម្លៃស្រូវឆ្នាំនេះនៅតែស្ថិតក្នុងតម្លៃមួយដែលអាចឱ្យកសិករទទួលបានប្រាក់ចំណេញ។ បើតាមមន្រ្តីជាន់ខ្ពស់រូបនេះ តម្លៃស្រូវនៅឆ្នាំនេះជាមធ្យមស្ថិតក្នុងរង្វង់លើសពី១,០០០រៀល ក្នុង១គីឡូក្រាម ដោយប្រភេទស្រូវក្រអូបផ្ការំដួល មានតម្លៃចន្លោះពី ១,៣០០រៀល ទៅ១,៤០០រៀល ក្នុង១គីឡូក្រាម, ប្រភេទស្រូវ OM មានតម្លៃប្រមាណ១,០៥០រៀលក្នុង១គីឡូក្រាម និងប្រភេទស្រូវអង្ករស ដូចជាស្រូវនាងអំ នាងអុក ឬក្រសាំងទាបជាដើម ស្ថិតក្នុងរង្វង់ ៩០០ ទៅ ១,០០០ រៀលក្នុង១គីឡូក្រាម។
ឯកឧត្តម ឃឹម ហ្វីណង់ បានសង្កត់ធ្ងន់ថា តម្លៃស្រូវនៅឆ្នាំ២០២៣ បានហក់ឡើងខ្ពស់អាចជាករណីពិសេស ដោយសារឥណ្ឌា ដែលជាប្រទេសនាំចេញអង្ករធំជាងគេលើពិភពលោកបានបិទការនាំចេញអង្កររបស់ខ្លួន ដែលបានជំរុញឱ្យតម្លៃស្រូវកម្ពុជា ហក់ឡើងប្រមាណ២០% ទៅ ៣០% នាពេលនោះ។
ជាមួយគ្នានេះ លោកឧកញ៉ា ភួ ពុយ ប្រធានក្រុមហ៊ុនបៃតងកម្ពុជា បានឱ្យដឹងថា តម្លៃស្រូវដែលក្រុមហ៊ុនលោកឧកញ៉ាបានទិញពីកសិករនាពេលបច្ចុប្បន្ននេះ គឺ១,៤០០រៀលក្នុង១គីឡូក្រាម សម្រាប់ស្រូវផ្ការំដួល ហើយតម្លៃនេះហាក់មានភាពល្អប្រសើរបើធៀបនឹងឆ្នាំមុន ដោយសារទិន្នផលស្រូវនៅឆ្នាំនេះមានគុណភាពល្អ គួរផ្សំការនាំចេញអង្ករកម្ពុជាទៅទីផ្សារអន្តរជាតិ នៅឆ្នាំនេះ ក៏ទទួលបានតម្លៃខ្ពស់។
អត្ថបទគួរអាន
យ៉ាងណាមិញ សម្រាប់តម្លៃស្រូវផ្សេងៗ ក៏មានភាពល្អប្រសើរដូចគ្នាដែរនៅឆ្នាំនេះ។ បើតាមការអះអាងរបស់លោកឧកញ៉ា ភួ ពុយ ការប្រមូលទិញស្រូវពីកសិករបស់ក្រុមហ៊ុនលោក ក៏ដូចជាក្រុមហ៊ុនផ្សេងៗទៀតមានការកើនឡើងពីមួយឆ្នាំទៅមួយឆ្នាំ ដោយសារកសិករបានពង្រីកការដាំដុះរបស់ខ្លួន បន្ទាប់ពីទីផ្សារស្រូវអង្កររបស់កម្ពុជា មានការរីកចម្រើនជាបន្តបន្ទាប់។
ទន្ទឹមនឹងនេះ ឯកឧត្តម ឃឹម ហ្វីណង់ លើកទឹកចិត្តឱ្យប្រជាកសិករជ្រើសរើសពូជស្រូវក្នុងស្រុកសម្រាប់ដាំដុះ ដូចជាប្រភេទផ្ការំដួល និងសែនក្រអូបជាដើម ដ្បិតថា ពូជស្រូវប្រភេទនេះមានការទទួលស្គាល់ពីទីផ្សារអន្តរជាតិ ហើយការដាំប្រភេទស្រូវទាំងនេះ ក៏មានការគាំទ្រ និងធានាតម្លៃពីក្រសួងផងដែរ នៅពេលមានបញ្ហាធ្លាក់ថ្លៃណាមួយកើតឡើង ជាពិសេសការធានាទីផ្សារតាមរយៈការចងក្រងជាសហគមន៍កសិកម្មទំនើបជាដើម។
បើតាមឯកឧត្តម ឃឹម ហ្វីណង់ នៅឆ្នាំ២០២៤នេះ ការផលិតស្រូវនៅកម្ពុជា ហាក់ទទួលបានទិន្នផលច្រើនជាងឆ្នាំកន្លងទៅ ដោយសារនៅឆ្នាំនេះប្រជាកសិករនាំគ្នាសម្រុកធ្វើស្រូវប្រាំងច្រើន ដែលរំពឹងថាបរិមាណផលជារួមនៃផលិតកម្មស្រូវកម្ពុជា អាចឈានដល់ប្រមាណ១៣លានតោន នៅពេញមួយឆ្នាំ២០២៤នេះ ដែលជាបរិមាណច្រើនបំផុតមិនធ្លាប់មាន។ ទោះបីជាបរិមាណស្រូវនៅឆ្នាំនេះមានចំនួនច្រើនក៏ពិតមែន តែមន្រ្តីជាន់ខ្ពស់រូបនេះអះអាងថា ទីផ្សារស្រូវឆ្នាំនេះនៅតែស្រូបយកដោយរលូន ដោយគ្មានការចាល់ស្តុក ឬជាប់គាំងទីផ្សារនោះឡើយ៕
