នាពិធីប្រកាសដាក់ឱ្យអនុវត្តជាផ្លូវការប្រព័ន្ធបញ្ជរតែមួយជាតិ នាថ្ងៃទី៧ ខែឧសភា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានគូសបញ្ជាក់ថា ការដាក់ឱ្យអនុវត្តប្រព័ន្ធបញ្ជរតែមួយជាតិនេះ គឺជាការរួមចំណែកមួយដ៏សំខាន់ក្នុងការកែលម្អបរិយាកាសធុរកិច្ច និងការជំរុញសកម្មភាពពាណិជ្ជកម្មនៅកម្ពុជា សំដៅលើកកម្ពស់គុណភាព តម្លាភាព ប្រសិទ្ធភាព និងការជឿទុកចិត្តពីសំណាក់វិនិយោគិន និងធុរជន និងម៉្យាងទៀត គឺជាការបង្ខិតសេវាសាធារណៈទៅជិតអ្នកប្រើប្រាស់តាមរយៈការប្រើប្រាស់ប្រព័ន្ធស្វ័យប្រវត្តិកម្ម និងថ្នាលបច្ចេកវិទ្យាក្នុងការផ្តល់សេវាសាធារណៈ ដើម្បីសម្រួលនីតិវិធី កាត់បន្ថយពេលវេលា និងការចំណាយពាក់ព័ន្ធផ្សេងៗ ។
ជាមួយគ្នានេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការដឹកនាំគម្រោងបញ្ជរតែមួយជាតិ បានគូសបញ្ជាក់ថា ការដាក់ឱ្យអនុវត្តប្រព័ន្ធបញ្ជរតែមួយជាតិ នឹងនាំមកនូវផលប្រយោជន៍ជាច្រើន ទាំងសម្រាប់វិស័យសាធារណៈ និងវិស័យឯកជន។
ប្រព័ន្ធនេះ នឹងអនុញ្ញាតឱ្យអ្នកនាំចេញនាំចូលទំនិញអាចដាក់ស្នើសុំឯកសារតម្រូវផ្សេងៗ ពាក់ព័ន្ធនឹងការនាំចេញនាំចូលទំនិញទៅគ្រប់ក្រសួងស្ថាប័នមានសមត្ថកិច្ចតែមួយលើករួមគ្នា ដើម្បីទទួលបាននូវការអនុញ្ញាត សម្រាប់យកទៅប្រើប្រាស់ក្នុងការបំពេញបែបបទបញ្ចេញទំនិញពីគយតាមមធ្យោបាយអេឡិចត្រូនិក។
អត្ថបទគួរអាន
ថ្នាក់ដឹកនាំរូបនេះ បានបន្ថែមថា ប្រព័ន្ធនេះក៏មានមុខងារក្នុងការតភ្ជាប់ទៅកាន់ប្រព័ន្ធបញ្ជរតែមួយអាស៊ាន ដើម្បីផ្លាស់ប្តូរទិន្នន័យវិញ្ញាបនបត្របញ្ជាក់ដើមកំណើតទំនិញ ទិន្នន័យឯកសារប្រតិវេទន៍គយ និងទិន្នន័យឯកសារពាណិជ្ជកម្មផ្សេងទៀត តាមទម្រង់អេឡិចត្រូនិក ជាមួយនឹងបណ្តាប្រទេសជាសមាជិកអាស៊ានផងដែរ។
ពាក់ព័ន្ធបញ្ហានេះ ឧកញ៉ា ស៊ិន ចន្ធី អ្នកជំនាញក្នុងវិស័យភស្តុភាកម្ម និងដឹកជញ្ជូនកម្ពុជា និងជាអគ្គនាយកក្រុមហ៊ុន Linehaul Express Cambodia បានគូសបញ្ជាក់ថា តាមរយៈការដាក់ឱ្យអនុវត្តនូវប្រព័ន្ធបញ្ជរតែមួយជាតិនេះ គឺពិតជាបានជួយសម្រួលជាច្រើនដល់វិស័យឯកជនក្នុងការធ្វើធុរៈកិច្ចរបស់ខ្លួន ពោលគឺចំណេញទាំងពេលវេលា និងថវិកា ព្រមទាំងមានតម្លារភាពផងដែរ។
តែយ៉ាងណាអ្នកជំនាញរូបនេះអះអាងថា នៅក្នុងចំណោមស្ថាប័នទាំង១៦ ដែលមានក្នុងប្រព័ន្ធបញ្ជរតែមួយជាតិនេះ គឺមានស្ថាប័នមួយចំនួនហាក់មិនទាន់អាចទទួលឱ្យប្រើប្រាស់បាននៅឡើយ ដូច្នេះហើយលោកសំណូមពរឱ្យមានការអភិវឌ្ឍបន្ថែមទៀត ដើម្បីកាន់តែជួយសម្រួល និងពន្លឿនការរៀបចំឯកសារផ្សេងតាមប្រព័ន្ធអេឡិចត្រូនិកនេះកាន់តែប្រសើរថែមទៀត។
សូមជម្រាបថា សម្ដេចធិបតី ហ៊ុន ម៉ាណែត បានបង្ហាញនូវក្តីរំពឹងយ៉ាងមុតមាំថា ប្រព័ន្ធបញ្ជរតែមួយជាតិនេះ នឹងក្លាយទៅជាគំរូជោគជ័យមួយទៀតនៃការខិតខំប្រឹងប្រែងរួមគ្នារបស់ក្រសួងស្ថាប័នរបស់រាជរដ្ឋាភិបាល ដែលបានជម្នះរាល់ការលំបាកទាំងឡាយក្នុងដំណើរការសម្របសម្រួលស្ថាប័នផងដែរ៕
None
