តើបរធនបាលកិច្ចបានរួមចំណែកសំខាន់យ៉ាងណាក្នុងការជួយអភិវឌ្ឍន៍វិស័យធនាគារ និងហិរញ្ញវត្ថុនៅកម្ពុជា?

នាកិច្ចពិភាក្សាស្តីពីសក្តានុពលនៃយន្តការបរធនបាលកិច្ច និងនិន្នាការថ្មីៗនៃសេដ្ឋកិច្ច និងបច្ចេកវិទ្យា កាលពីពេលថ្មីៗ លោកបណ្ឌិត អ៊ិន ចាន់នី ប្រធាននាយកប្រតិបត្តិនៃធនាគារអេស៊ីលីដាបានគូសបញ្ជាក់ថា ស្ថានភាពវិស័យធនាគារ និងហិរញ្ញវត្ថុកម្ពុជាបច្ចុប្បន្ននៅតែរក្សាបាននូវភាពរីកចម្រើន បើទោះបីបន្តប្រឈមនឹងបញ្ហាមួយចំនួនក៏ដោយ។ អ្នកជំនាញរូបនេះអះអាងថា ការរីកចម្រើនរបស់វិស័យធនាគារ និងហិរញ្ញវត្ថុកម្ពុជានេះ ក៏មានការរួមចំណែកពីវិស័យបរធនបាលកិច្ចផងដែរ ពោលគឺតាមរយៈការទិញលក់អចនលទ្រព្យតាមយន្តការបរធនបាលកិច្ចដោយឆ្លងកាត់ប្រព័ន្ធធនាគារ ដែលបានចុះបញ្ជីនៅនិយ័តករបរធនបាលកិច្ច ក៏ដូចជាតាមរយៈការរក្សាការពារឯកសារមានតម្លៃផ្សេងៗផងដែរ។

ស្រដៀងគ្នានេ លោក ប៊ុន យីន ប្រធាននាយកប្រតិបត្តិនៃធនាគារ CIMB ទទួលស្គាល់ថា យន្តការបរធនបាលកិច្ចពិតជាបានរួមចំណែយជួយជំរុញការអភិវឌ្ឍន៍វិស័យធនាគារ និងហិរញ្ញវត្ថុនៅកម្ពុជាឱ្យមានការរីកចម្រើប្រាកដមែន ពោលគឺយន្តការបរធនបាលកិច្ចប្រៀបបានជាទីកន្លែងមួយក្នុងការប្រមូលប្រភពទុន សម្រាប់ការអភិវឌ្ឍវិស័យធនាគារ និងហិរញ្ញវត្ថុនៅកម្ពុជា។

បើតាមការបញ្ជាក់របស់ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច ប្រតិបត្តិការសេវារក្សាទុក និងសេវារក្សាសុវត្ថិភាព (Escrow Services) របស់និយ័តករបរធនបាលកិច្ច បានកើនឡើងគួរឱ្យកត់សម្គាល់នាពេលបច្ចុប្បន្ននេះ ពោលគឺបានកើនដល់ទំហំប្រមាណ១៣០លានដុល្លារអាមេរិក គិតត្រឹមរយៈពេល៦ខែដើមឆ្នាំ២០២៤នេះ ខណៈគិតត្រឹមដំណាច់ឆ្នាំ២០២៣កន្លងទៅ គឺមានទំហំត្រឹមតែប្រមាណ៦០លានដុល្លារអាមេរិកតែប៉ុណ្ណោះ។

សូមជម្រាបថា គិតត្រឹមឆ្នាំ២០២៣ និយ័តករបរធនបាលកិច្ចបានផ្តល់អាជ្ញាបណ្ណដល់ក្រុមហ៊ុនបរធនបាលចំនួន១០ និងផ្តល់អាជ្ញាបណ្ណផ្តល់សេវារក្សាទុក និងសេវារក្សាសុវត្ថិភាពដល់ធនាគារពាណិជ្ជចំនួន១៣។ បន្ថែមលើនេះ និយ័តករបរធនបាលកិច្ចបានផ្តល់អាជ្ញាបណ្ណបរធនបាលរូបវ័ន្តបុគ្គលបានចំនួន៥២រូប ក្នុងនោះ២៧រូបជាបរធនបាលរូបវ័ន្តបុគ្គលឯករាជ្យ និង២៥រូបផ្សេងទៀតជាបរធនបាលរូបវ័ន្តបុគ្គលក្រោមឆ័ត្ររបស់ក្រុមហ៊ុនបរធនបាល។ ជាមួយគ្នានេះ ស្ថាប័ននេះ ក៏បានផ្តល់ការទទួលស្គាល់ក្រុមហ៊ុនផ្តល់សេវាវាយតម្លៃបរធនបាលកិច្ចចំនួន១៣ផងដែរ។

គួរបញ្ជាក់ផងដែរថា «បរធនបាលកិច្ច» គឺជាសេវាហិរញ្ញវត្ថុមិនមែនធនាគារមួយ ដែលមានតួនាទីគ្រប់គ្រង មើលថែរក្សា ឬចាត់ចែកទ្រព្យសម្បត្តិរបស់បុគ្គល ឬក្រុមហ៊ុនណាមួយ សម្រាប់ជាប្រយោជន៍ដល់ក្រុមគោលដៅណាមួយ ដែលស្ថិតក្នុងអនុលោមតាមលិខិតបរធនបាលកិច្ច ឬបទប្បញ្ញត្តិជាធរមាន៕

អត្ថបទ សោម ស្រីពេជ្រ និងរូបភាពឯកសារ