តើគម្រោងព្រែកជីកហ្វូណន តេជោ មានសារសំខាន់យ៉ាងណាក្នុងការជួយជំរុញកំណើនសេដ្ឋកិច្ច និងការអភិវឌ្ឍន៍នៅកម្ពុជា?

លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជាយល់ឃើញថា ប្រសិនបើគម្រោងព្រែកជីកហ្វូណន តេជោ សាងសង់រួចជាស្ថាពរ វានឹងផ្ដល់ផលប្រយោជន៍ផ្នែកសេដ្ឋកិច្ចដ៏មហាសាល ព្រោះព្រែកជីកនេះនឹងជួយសម្រួលដល់ការដឹកជញ្ជូនតាមផ្លូវទឹកពីកំពង់ផែ នៅភ្នំពេញឆ្ពោះទៅសមុទ្រ និងទៅកាន់ប្រទេសទី៣ ដែលនឹងធ្វើឱ្យពាណិជ្ជកម្មរបស់កម្ពុជាកាន់តែមានភាពប្រសើរឡើង ដោយសារតែវាជួយកាត់បន្ថយថ្លៃដើមនៃការដឹកជញ្ជូនបានច្រើន។ ទន្ទឹមនឹងជួយទាក់ទាញការវិនិយោគពីបរទេសមកកាន់ប្រទេសកម្ពុជា គម្រោងព្រែកជីកនេះ នឹងជួយកាត់បន្ថយការពឹងផ្អែកលើប្រទេសវៀតណាម ដោយសារតែកន្លងមក ការដឹកជញ្ជូន និងផ្ទេរទំនិញតាមផ្លូវទឹកត្រូវឆ្លងកាត់តាមប្រទេសក្បែរខាងកម្ពុជាមួយនេះ។ សម្រាប់អ្នកជំនាញរូបនេះ គម្រោងនេះ ក៏នឹងដើរតួនាទីសំខាន់សម្រាប់វិស័យកសិកម្ម និងនេសាទ ព្រមទាំងទេសចរ ទប់ស្កាត់គ្រោះមហន្តរាយទឹកជំនន់ ហើយពលរដ្ឋដែលរស់នៅតាមបណ្ដោយព្រែកជីកនេះនឹងទទួលបានផលប្រយោជន៍ជាបន្តបន្ទាប់ផងដែរ។

ពាក់ព័ន្ធគម្រោងព្រែកជីកហ្វូណន តេជោ នេះដែរ ឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា យល់ឃើញថា ក្រោយគម្រោងព្រែកជីកនេះដាក់ឱ្យដំណើរការ វានឹងជួយកាត់បន្ថយថ្លៃដើមនៃការដឹកជញ្ជូន និងផ្ដល់សក្ដានុពលយ៉ាងច្រើនសម្រាប់សេដ្ឋកិច្ចកម្ពុជា។ បើតាមអ្នកជំនាញរូបនេះ តម្លៃដឹកជញ្ជូនតាមផ្លូវទឹក គឺទាបជាងការដឹកជញ្ជូនតាមផ្លូវគោករហូតដល់ទៅ៣ដងឯណោះ ខណៈការដឹកជញ្ជូនតាមផ្លូវទឹក ក៏ជួយកាត់បន្ថយការកកស្ទះចរាចរ និងការខូចខាតផ្លូវផងដែរ។

ស្រដៀងគ្នានេះ លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយយល់ឃើញថា ព្រែកជីកហ៊្វូណនតេជោ នឹងជួយបើកឱកាសដ៏ពិសេស សម្រាប់ការដឹកជញ្ជូន ដែលមានការប្រកួតប្រជែងបានជាមួយប្រទេសជិតខាង។ លោកកត់សម្គាល់ឃើញថា កន្លងមកប្រទេសជិតខាងមានប្រៀបខ្លាំងក្នុងការដឹកជញ្ជួនតាមផ្លូវទឹកពីខេត្តមួយចំនួនទៅដល់សមុទ្រ ដែលកម្ពុជាខ្វះ និងជាឧបសគ្គដ៏ធំសម្រាប់ការប្រកួតប្រជែង ជាពិសេសសម្រាប់វិស័យកសិកម្ម និងកែច្នៃ។ សម្រាប់អ្នកជំនាញរូបនេះ បើកម្ពុជាអាចអភិវឌ្ឍន៍គម្រោងនេះឱ្យលេចចេញជារូបរាងបានមែននោះ វានឹងក្លាយជាចលករដ៏សំខាន់ក្នុងការជួយជំរុញផលិតកម្មកសិកម្ម និងវិនិយោគឧស្សាហ៍កម្មនៅកម្ពុជាឱ្យកាន់តែល្អប្រសើរបន្ថែមទៀត។

ពាក់ព័ន្ធនឹងគម្រោងព្រែកជីកនេះដែរ លោក ថងលុន ស៊ីសុលីត ប្រធានរដ្ឋឡាវ បានប្រាប់សម្តេចតេជោ ហ៊ុន សែន ប្រធានព្រឹទ្ធសភាថា លោកគាំទ្រចំពោះគម្រោងព្រែកជីកហ្វូណនតេជោ ដែលជាប្រព័ន្ធដឹកជញ្ជូនផ្លូវទឹកដ៏សំខាន់របស់កម្ពុជា ដែលតភ្ជាប់ពីទន្លេទៅកាន់សមុទ្រ។ ការបង្ហាញការគាំទ្រនេះធ្វើឡើងបន្ទាប់ពីលោកបានស្តាប់ការពន្យល់ និងបកស្រាយរបស់សម្តេចតេជោ ហ៊ុន សែន ដែលអះអាងថា គម្រោងព្រែកជីកហ្វូណនតេជោនេះ គឺមិនមានការប៉ះពាល់ដល់បរិស្ថាន ឬក៏លំហូរចរន្តទឹករបស់ទន្លេមេគង្គនោះទេ តែព្រែកជីកនេះ គឺជាការតភ្ជាប់រវាងទន្លេបាសាក់ដើម្បីទៅកាន់សមុទ្រកម្ពុជា។

ទោះជាយ៉ាងណាក៏ដោយ គម្រោងព្រែកជីកហ្វូណនតេជោនេះ ក៏តែងតែទទួលបានការរិះគន់ពីបុគ្គលមួយចំនួនតូច ដែលមាននិន្នាការមិនគាំទ្រការដឹកនាំរបស់រាជរដ្ឋាភិបាលកម្ពុជាផងដែរ។ ជាក់ស្តែងកាលពីពេលថ្មីៗលោក សម រង្ស៊ី ប្រធានអតីតគណបក្សសង្គ្រោះជាតិ និងជាអ្នកនយោបាយជើងចាស់កំពុងរស់នៅនិរទេសនៅក្រៅប្រទេសបានបង្ហាញគំនិតប្រឆាំងថា គម្រោងព្រែកជីកភ្ជាប់ពីរាជធានីភ្នំពេញទៅកាន់សមុទ្រនេះ អាចនាំមកនូវគ្រោះថ្នាក់ដ៏ធ្ងន់ធ្ងរដល់បរិស្ថាន និងជីវភាពរស់នៅប្រជាពលរដ្ឋខ្មែរ។ ហើយព្រែកជីកនេះ ធ្វើឡើងសម្រាប់បម្រើផលប្រយោជន៍យុទ្ធសាស្ត្ររបស់ចិន។

ឆ្លើយតបទៅនឹងការរិះគន់នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានលើកឡើងថាប្រជាជនកម្ពុជាមួយប្រទេសបានយល់អំពីអត្ថប្រយោជន៍ចំពោះសេដ្ឋកិច្ច និងសង្គមជាតិកម្ពុជា ដែលគម្រោងព្រែកជីកហ្វូណនតេជោនឹងផ្ដល់ឲ្យសម្រាប់ប្រទេស និងប្រជាជនខ្មែរ។ ប៉ុន្តែបែរជាលោក សម រង្សី ដែលជាអ្នកនយោបាយចាស់វស្សា ដែលតែងតែតាំងខ្លួនជាអ្នកស្រលាញ់ជាតិ មិនមានសមត្ថភាពក្នុងការមើលឃើញ ឬទទួលស្គាល់នូវអ្វីដែលល្អសម្រាប់ខ្មែរទៅវិញ។ សម្តេចធិបតី បានចាត់ទុកលោក សម រង្សី ជាមនុស្សដែលប្រឆាំងមិនរើសពេលវេលា ឬប្រធានបទ ហើយសូម្បីសមិទ្ធផលសម្រាប់ជាតិ និងប្រជាជនខ្មែរ ក៏លោកប្រឆាំងដែរ។

ពាក់ព័ន្ធបញ្ហានេះដែរ លោកបណ្ឌិត គិន ភា បានសម្ដែងការភ្ញាក់ផ្អើលយ៉ាងខ្លាំងចំពោះសំណេររបស់មេដឹកនាំអតីតបក្សប្រឆាំងលោក សម រង្ស៊ី និងបានចាត់ទុកថា ខ្លឹមសារនៃសាររបស់លោក សម រង្ស៊ី នោះក្បត់ទាំងស្រុងទៅនឹងផលប្រយោជន៍ជាយុទ្ធសាស្ត្ររបស់ជាតិ។ ជាទស្សនរបស់លោកបណ្ឌិត គិន ភា ទោះបីជាសាររបស់លោក សម រង្ស៊ី ត្រូវសរសេរឡើងដើម្បីបំផ្លិចបំផ្លាញគម្រោងអភិវឌ្ឍន៍ជាតិរបស់គណបក្សកាន់អំណាចដើម្បីផលប្រយោជន៍នយោបាយផ្ទាល់ខ្លួន ឬត្រូវបានប្រើប្រាស់ដោយអ្នកជិតខាងឬមហាអំណាចណាមួយក៏ដោយ តែការលើកឡើងបែបនេះជាអំពើក្បត់ទៅនឹងផលប្រយោជន៍ជាតិទាំងស្រុង៕

អត្ថបទ៖ បូ ដូឡា,រូបភាព ឯកសារ