ពាក់ព័ន្ធបញ្ហានេះ កម្ពុជា ក៏បានប្រកាសគោលជំហរឥតងាករេរបស់ខ្លួនរួចហើយដែរថា កម្ពុជានឹងមិនជម្លៀសពលរដ្ឋខ្មែរចេញពីតំបន់នេះជាដាច់ខាត ព្រោះពលរដ្ឋខ្មែរបានរស់នៅ និងអាស្រ័យផលជាច្រើនទស្សវត្សមកហើយ ហើយក៏ស្ថិតក្នុងដែនអធិបតេយ្យភាពរបស់កម្ពុជាផងដែរ។
លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជាយល់ឃើញថា ការគំរាមមិនចូលរួមកិច្ចប្រជុំគណៈកម្មាធិការព្រំដែនថ្នាក់ភូមិភាគកម្ពុជា-ថៃ (RBC) ដែលកម្ពុជាធ្វើជាម្ចាស់ផ្ទះរបស់មេភូមិភាគ១ថៃ និងការដាក់កំហិតឱ្យកម្ពុជាជម្លៀសពលរដ្ឋចេញពីភូមិ ជាសំណើមួយដ៏ឆ្កួតលីលាដ៍បំផុតរបស់ក្រុមអ្នកនយោបាយថៃ។ លោកបណ្ឌិតបានអះអាងថា កម្ពុជាមិនអាចជម្លៀសពលរដ្ឋខ្លួនចេញបាននោះទេ ព្រោះជាទឹកដីរបស់ខ្មែរ ដោយផ្អែកលើសន្ធិសញ្ញាបារាំងសៀម និងអនុស្សរណៈនៃការយោគយល់គ្នាឆ្នាំ២០០០ ស្តីពីការវាស់វែង និងខណ្ឌសីមាព្រំដែនគោករវាងកម្ពុជា និងថៃ។ ជាក់ស្ដែងតាមរយៈការដាក់សម្ពោធរបស់ថៃនេះ កំពុងធ្វើឱ្យប៉ះពាល់យ៉ាងធ្ងន់ធរដល់សតិអារម្មណ៍ និងបញ្ហាសង្គមសេដ្ឋកិច្ចចំពោះពលរដ្ឋខ្មែរ ដែលរស់នៅតំបន់នោះ បើទោះជាថៃបានប្រកាសក្ដែងៗថា ខ្លួនគោរពតាមគោលការណ៍សិទ្ធិមនុស្ស និងមនុស្សធម៌យ៉ាងណាក្ដី។
ជាមួយគ្នានេះលោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវយល់ឃើញថា ការប្រកាន់គោលជំហររបស់កម្ពុជាដែលមិនជម្លៀសពលរដ្ឋចេញពីភូមិ គឺជារឿងដ៏ត្រឹមត្រូវ និងបានចាត់ទុកការគំរាមរបស់ថៃជាទង្វើឈ្លានពានដ៏គឃ្លើនមកលើកម្ពុជា។ បើតាមអ្នកជំនាញរូបនេះ ប្រសិនបើថៃចង់បានដីខ្មែរនៅភូមិជោគជ័យ និងភូមិព្រៃចាន់នេះ ថៃខ្លួនឯងគួរតែមានភាពក្លាហានលើកយកបញ្ហានេះធ្វើជារបៀបវារៈទៅដោះស្រាយក្នុងតុលារការយុត្តិធម៌អន្តរជាតិ។
មិនខុសគ្នានោះទេលោកបណ្ឌិត មាស នី អ្នកតាមដានការអភិវឌ្ឍសង្គមកត់សម្គាល់ឃើញថា ការដាក់សំណើររបស់ថៃឱ្យកម្ពុជាជម្លៀសពលរដ្ឋចេញពីទឹកដី ហាក់បង្ហាញពីអាកប្បកិរិយាមិនល្អគ្រប់ជំនាន់របស់ក្រុមយោធាថៃ។ ហើយប្រសិនថៃយល់ថា តំបន់នោះជារបស់ខ្លួនថៃគួរធ្វើរបៀបវារៈដាក់ចូលកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) ពោលគឺមិនត្រូវប្រើកម្លាំងយោធាមកដាក់សម្ពាធលើពលរដ្ឋខ្មែរស្លូតត្រង់នោះឡើយ។ បើតាមអ្នកជំនាញរូបនេះ ប្រសិនបើភាគីថៃនៅតែបង្ហាញចេតនាបង្ករឿង ចង់ឬមិនចង់បញ្ហាវិវាទព្រំដែនរវាងប្រទេសទាំងពីរនឹងមិនអាចឈានទៅរកសភាពដើមបានឡើយ ហើយថៃហាក់បង្ហាញចេតនាចង់បង្កើតសង្គ្រាមជាមួយកម្ពុជាជាថ្មីម្ដងទៀតផងដែរ។
បើគ្មានការប្រែប្រួលទេ កិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥កម្ពុជា និងកងទ័ពភូមិភាគទី១ថៃ នឹងប្រព្រឹត្តទៅចន្លោះពីថ្ងៃទី១០ ដល់ថ្ងៃទី១២ ខែតុលា ឆ្នាំ២០២៥ នៅខេត្តបន្ទាយមានជ័យ។ កិច្ចប្រជុំវិសាមញ្ញកម្រិត RBC នេះ គឺមានភារកិច្ចត្រឹមសម្រួលបញ្ហានៅនឹងកន្លែង បន្ធូរបន្ថយភាពតានតឹង និងដោះស្រាយបញ្ហាដោយសន្តិវិធី តែគ្មានសមត្ថកិច្ចកំណត់ខ្សែបន្ទាត់ព្រំដែននោះឡើយ៕
អត្ថបទដោយ៖ ជា ម៉ារ៉ា
