នៅក្នុងករណីលោកបរាជ័យ បេក្ខជននាយករដ្ឋមន្រ្តីបន្ទាប់អាចជាកូនស្រីរបស់លោក ថាក់ស៊ីន ស៊ីណាវ៉ាត្រា ។
សារព័ត៌មានព័ត៌មានថៃធំៗ និងអន្តរជាតិកាលពីថ្ងៃទី ១៣ ខែ កក្កដា គឺសុទ្ធតែបានរាយការណ៍អំពីការបរាជ័យរបស់លោក ភីថា លីមចារឿនរ៉ាត ដែលជាប្រធានគណបក្សឆ្ពោះទៅមុខរបស់ថៃ ដែលជាគណបក្សឈ្នះការបោះឆ្នោតកាលពីខែឧសភា ដោយនៅក្នុងការបោះឆ្នោតនៅក្នុងសភា លោកត្រូវការសម្លេងគាំទ្រពីគណបក្សរបស់លោក និង គណបក្សសម្ព័ន្ធភាពព្រមទាំងពីគណបក្សដទៃទៀតរួមទាំង ព្រឹទ្ធសភាដែលតែងតាំងដោយយោធា ។
ការបោះឆ្នោតនៅក្នុងសភាកាលពីថ្ងៃព្រហស្បតិ៍ ទី១៣ ខែកក្កដា ក្រោមការដឹកនាំដោយលោក វ៉ាន់ មូហាម៉ាត់ ណ័ ម៉ាថា នៅក្នុងឋានៈជាប្រធានសភា បានបើកដំណើរការដោយការជជែកដេញដោលអស់ ៦ ម៉ោង ដោយមានអ្នកចូលរួមសរុប ៦៤៦ រូប នៅក្នុងនោះមានសមាជិកសភាចំនួន៤៦០ រូប និង ព្រឹទ្ធសភា ២១៦ រូប ។
ដើម្បីក្លាយជានាយករដ្ឋមន្រ្តីទី៣០របស់ថៃ លោក ភីថា លីមចារឿនរ៉ាត ត្រូវការសម្លេងគាំទ្រសរុបចំនួន ៣៧៦ សម្លេង ប៉ុន្តែ ជាលទ្ធផល លោកទទួលបានការគាំទ្រត្រឹមតែចំនួន ៣២៤សម្លេងប៉ុណ្ណោះ ក្រៅពីនោះ ១៨២ សម្លេងប្រឆាំង និង ១៩៩ អនុប្បវាទ ។
ទោះយ៉ាងណា ការបរាជ័យនៅក្នុងការបោះឆ្នោតនៅសភាកាលពីថ្ងៃព្រហស្បត្តិ៍ មិនបានផ្តាច់ឱកាសរបស់លោក ភីថា លីមចារឿនរ៉ាត ឡើយ ដោយលោកនឹងត្រូវឆ្លងកាត់ការបោះឆ្នោតជុំទី២ និង ទី៣ ដែលគ្រោងនឹងធ្វើនៅថ្ងៃទី ១៩ និង ២០ ខែ កក្កដា ខាងមុខបន្តទៀត។ ទោះបីជាយ៉ាងណាក៏ដោយ ដើម្បីក្លាយជានាយករដ្ឋមន្រ្តីថៃបាន លោកប្រហែលជាត្រូវសម្របសម្រួលនិងកែប្រែឥរិយាបទមួយចំនួន ជាពិសេសគឺគោលនយោបាយធ្វើកំណែទម្រង់របបរាជានិយម និង កាត់បន្ថយស្រមោល នៃអំណាចរបស់យោធាថៃនៅក្នុងជួររដ្ឋបាលស៊ីវិលរបស់រាជាណាចក្រនេះ ។
កំណែទម្រង់ដែលដាក់ចេញដោយគណបក្សឆ្ពោះទៅមុខដ៏រឹងរ៉ឹងរបស់លោក ភីថា លីមចារឿនរ៉ាត ជាឧបសគ្គដ៏ចម្បងនៅក្នុងការទទួលបានការគាំទ្រពីព្រឹទ្ធសភា ដែលតែងតាំងដោយយោធា ចំនួន ២៥០ រូប និង ពីសមាជិកសភា ក្រៅសម្ព័ន្ធ៨ បក្សរបស់លោក ដែលពួកគេភាគច្រើនសុទ្ធសឹងតែជាអ្នកដែលស្ថិតនៅក្នុងស្រមោលយោធានិងអ្នកអភិរក្សនិយម។
នៅក្នុងការបោះឆ្នោតសភាកាលពីថ្ងៃទី១៣កក្កដា លោកអាចទទួលបានការគាំទ្រពីព្រឹទ្ធសភា តែ ១៣ រូបប៉ុណ្ណោះ ដូច្នេះនៅក្នុងការបោះឆ្នោតជុំក្រោយលោកដាច់ខាតត្រូវតែធ្វើសម្បទាន គោលនយោបាយខ្លះ។
មកដល់ពេលនេះ មហាជននៅក្នុងប្រទេសថៃ ជាពិសេសនៅក្នុងចំណោមបញ្ញវ័ន្តវ័យក្មេងសុទ្ធតែគាំទ្រ និងជឿជាក់ថា លោក ភីថា លីមចារឿនរ៉ាត នឹងអាចយកឈ្នះបញ្ហាដ៏ចម្រូងចម្រាស់នៅក្នុងប្រព័ន្ធនយោបាយថៃ ហើយលោក ខ្លួនឯងក៏បានអះអាងថា លោកមិនចុះចាញ់ដែរ។
លោកបានបញ្ជាក់ប្រាប់អ្នកសារព័ត៌មានថា លោកកំពុងផ្តោតលើការបោះឆ្នោតជុំបន្ទាប់ ហើយនឹងធ្វើការឆ្ពោះទៅរកការរៀបចំយុទ្ធសាស្ត្រ ដើម្បីយកឈ្នះការបោះឆ្នោតបន្ថែមទៀតក្នុងសភា។
ពាក់ព័ន្ធនឹងបញ្ហានេះ អ្នកវិភាគបានអះអាងថា ប្រសិនបើលោកអាចធ្វើសម្បទាននយោបាយខ្លះជាមួយនឹងយោធា និង អ្នកដែលស្មោះស្ម័គ្រនឹងក្រុមរាជានិយមបែបអភិរក្ស លោកនឹង ទទួលបានតំណែងជានាយករដ្ឋមន្រ្តីទី៣០ របស់ថៃ ប៉ុន្តែនៅក្នុងករណីលោកបរាជ័យ បេក្ខភាពនាយករដ្ឋមន្រ្តីបន្ទាប់ ទំនងជា របស់លោកស្រី ប៉ៃតុនតាន ស៊ីណាវ៉ាត្រា ដែលជាកូនស្រីពៅរបស់អតីតនាយករដ្ឋមន្រ្តី ថាក់ស៊ីន ស៊ីណាវ៉ាត្រា ដែលកំពុងតែរស់នៅនិរទេសខ្លួន ក្រោយរដ្ឋប្រហារដោយយោធានៅឆ្នាំ២០០៦ ។
ក្រោយការបោះឆ្នោតនៅខែឧសភា លោកស្រី ប៉ៃតុនតាន ស៊ីណាវ៉ាត្រា បានដឹកនាំគណបក្សភឿថៃទទួលបានការគាំទ្រនៅលំដាប់ទី២ បន្ទាប់ពីគណបក្សឆ្ពោះទៅមុខ ហើយលោកស្រី ក៏នៅក្នុងក្រុមចម្រុះ៨ បក្ស ដែលគាំទ្របេក្ខភាព លោក ភីថា ផងដែរ ប៉ុន្តែទោះបីជាគណបក្ស នេះបានរងសំពាធជាបន្តបន្ទាប់ពីបក្សសម្ព័ន្ធយោធា និង ពួកប្រជាធិបតេយ្យនាពេលកន្លង ក៏មួយរយៈពេលនេះ ភឿថៃ ហាក់មានគោលនយោបាយសម្របសម្រួលច្រើន ហើយអ្វីដែលសំខាន់ គណបក្សនេះគ្មានគោលនយោបាយរឹងត្អឹងដែលប៉ះពាល់ដល់ស្ថាប័នរាជានិយមឡើយ ។
