នៅសន្និសីទមួយស្ដីអំពីជំងឺឆ្លងលើកទី ៨ នៅទីក្រុងតូក្យូ កាលពីថ្ងៃទី ២៧ខែតុលា លោក តេដ្រូស អគ្គនាយកអង្គការសុខភាពពិភពលោកបានថ្លែងអំពាវនាវឱ្យមានការគាំទ្របន្ថែមទៀតពីភាគីពាក់ព័ន្ធក្នុងការបង្កើនអត្រាការចាក់វ៉ាក់សាំងជាសកលឱ្យបាន ៤០% នៅចុងឆ្នាំនេះ ដោយលោកសំដៅទៅលើកម្មវិធីចែកចាយវ៉ាក់សាំង ដែលគាំទ្រដោយអង្គការសុខភាពពិភពលោកថា "គោលដៅនេះអាចសម្រេចបាន លុះត្រាតែ បណ្ដាប្រទេស និងក្រុមហ៊ុនដែលគ្រប់គ្រងការផ្គត់ផ្គង់វ៉ាក់សាំងសកល ផ្តល់អាទិភាពដល់យន្តការ កូវ៉ាក់ (COVAX)ជាមុន" ។
សូមជម្រាបថា តាំងពីវ៉ាក់សាំងកូវីដ១៩ផលិតបានមកទល់បច្ចុប្បន្ន ការចែកចាយវ៉ាក់សាំងមិនទាន់មានភាពស្មើគ្នានៅឡើយទេ ជាពិសេសគឺក្នុងបណ្ដាប្រទេសក្រីក្រ ជាក់ស្ដែង នៅតំបន់អាហ្វ្រិក មានតែ ៥% នៃចំនួនប្រជាជនប៉ុណ្ណោះ ដែលត្រូវបានចាក់វ៉ាក់សាំងគ្រប់ចំនួនដូស។
ទន្ទឹមនេះ ក្រៅពីការអំពាវនាវរបស់អគ្គនាយកអង្គការសុខភាពពិភព ទាក់ទងនឹងការចែងចែកវ៉ាក់សាំងហើយនោះ ក្នុងកម្មវិធីនេះ គេក៏បានពិភាក្សា អំពីការប្រារព្ធព្រឹត្តិការណ៍កីឡាអូឡាំពិកនៅទីក្រុងតូក្យូ កាលពីពេលកន្លងតៅ ដែលស្ថិតក្រោមការរាតត្បាតនៃជំងឺកូវីដ ១៩ផងដែរ។ បន្ថែមពីនេះ ក៏មានការពិភាក្សាទាក់ទងនឹងការពិនិត្យឡើងវិញលើការធ្វើតេស្ត និងការចាក់វ៉ាក់សាំងនៅក្នុងប្រទេសជប៉ុន ក៏ដូចជាប្រព័ន្ធថែទាំវេជ្ជសាស្ត្រអំឡុងពេលមានការផ្ទុះឡើងវិញផងដែរ។
អត្ថបទគួរអាន
ជាក់ស្ដែង គេមើលឃើញថា បើទោះបីជា ប្រទេសជប៉ុនបានរាយការណ៍អំពីអត្រាស្លាប់ដោយសារកូវីដស្ថិតនៅកម្រិតទាបក៏ដោយ ប៉ុន្ដែប្រទេសនេះ ត្រូវបានប្រឈមមុខនឹងឧបសគ្គជាច្រើន រួមទាំងសមត្ថភាពធ្វើតេស្តនៅមានកម្រិត កង្វះគ្រែក្នុងមន្ទីរពេទ្យ និងការចាក់វ៉ាក់សាំងមានភាពយឺតយ៉ាវ។
សូមបញ្ជាក់ថា បច្ចុប្បន្ននេះ ចំនួនអ្នកដែលបានចាក់វ៉ាក់សាំងយ៉ាងហោចណាស់មួយដូសនៅទូទាំងពិភពលោក គឺមានជិត៥០%ហើយ នៃចំនួនប្រជាជនពិភពលោកសរុប ហើយក្នុងនោះ មានវ៉ាក់សាំងជិត៧ពាន់លានដូសហើយដែលត្រូវបានចាត់ចែងចាក់ជូនពលរដ្ឋនៅទូទាំងពិភពលោក ដោយក្នុងមួយថ្ងៃមានវ៉ាក់សាំងជិត២៥លានដូសត្រូវបានចាត់ចែងដើម្បីចាក់ជូនពលរដ្ឋ។ ក៏ប៉ុន្ដែ សម្រាប់ប្រទេសចំណូលទាបវិញ គឺមានប្រជាជនត្រឹមតែជាង៣%ប៉ុណ្ណោះ នៃប្រជាជនសរុប ដែលទទួលបានការចាក់វ៉ាក់សាំងយ៉ាងហោចណាស់១ដូស៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
