តម្រូវការមាសនៅឥណ្ឌា រំពឹងនឹងកើនឡើង ក្រោយរដ្ឋាភិបាលកាត់បន្ថយពន្ធនាំចូលមាស

ប្រទេសឥណ្ឌា បានកាត់បន្ថយពន្ធនាំចូលមាសពី១៥% មកនៅត្រឹម ៩% ជាវិធានការគោលនយោបាយមួយ ដើម្បីគាំទ្រទីផ្សារមាស ដែលបានបង្កើតឡើងនៅក្នុងផែនការថវិកាសហព័ន្ធរបស់ប្រទេសឥណ្ឌាកាលពីចុងខែកក្កដា។ នេះបើយោងតាមក្រុមប្រឹក្សាមាសពិភពលោក (WGC)។

ក្រោយពីបានប្រកាសដាក់ចេញវិធានការនៅសប្ដាហ៍នេះហើយភ្លាម គេបានឃើញតម្លៃមាសធ្លាក់ចុះនៅក្នុងប្រទេសឥណ្ឌា មកនៅត្រឹមជាង ៨០០ ដុល្លារអាម៉េរិក ​ក្នុងទម្ងន់១០ក្រាមមាស ដែលជាតម្លៃទាបបំផុតក្នុងរយៈពេល ៤ ខែកន្លងមកនេះ បន្ទាប់ពីធ្លាប់បានឡើងដល់កម្រិតខ្ពស់បំផុតជាង ៨៩០ ដុល្លារកាលពីដើមខែកក្កដា។

ក្រុមអ្នកជំនាញខាងឧស្សាហកម្មមាសរំពឹងថា ការធ្លាក់ចុះតម្លៃមាសនេះ នឹងបង្កើនតម្រូវការលោហៈដ៏មានតម្លៃនេះ នៅក្នុងប្រទេសដែលប្រើប្រាស់មាសច្រើនបំផុតទីពីររបស់ពិភពលោកមួយនេះ ជាពិសេសនៅពេលរដូវកាលទិញមាសកំពុងតែខិតជិតមកចូលដល់តែម្ដង។

តម្រូវការមាសនៅក្នុងប្រទេសឥណ្ឌា ជាធម្មតាកើនឡើងខ្ពស់បំផុត នៅក្នុងត្រីមាសទី៤ ពីព្រោះវាជារដូវកាលនៃពិធីមង្គលការ និងពិធីបុណ្យនានា ហើយបើតាមក្រុមប្រឹក្សាមាសពិភពលោក បានឱ្យដឹងថា ពិធីរៀបអាពាហ៍ពិពាហ៍មានតម្រូវការមាសចំនួនប្រហែល ៥០% ជារៀងរាល់ឆ្នាំនៅក្នុងប្រទេសឥណ្ឌា។ ដូច្នេះ អ្នកជំនាញជឿជាក់ថា តម្រូវការមាស នឹងកើនឡើងមកវិញ នៅអំឡុងខែកញ្ញាខាងមុខ ក្រោយពីបានធ្លាក់ចុះប្រមាណ ៥% កាលពីត្រីមាសទី២ឆ្នាំនេះ។

កាសែត Economic Times បានរាយការណ៍ថ្មីៗនេះដែរថា ការកើនឡើងតម្រូវការមាសនៅឥណ្ឌា ដោយសារតែការកាត់បន្ថយពន្ធនាំចូលមាសនេះ ក៏នឹងអាចក្លាយជាកត្តាសក្ដានុពលមួយ ចូលរួមធ្វើឲ្យតម្លៃមាសទីផ្សារពិភពលោកកើនឡើងដែរ។

ស្ថាប័នក្រុមប្រឹក្សាមាសពិភពលោកបានប៉ាន់ប្រមាណថា តម្រូវការមាសនៅឥណ្ឌា អាចនឹងកើនមានដល់ប្រមាណ ៧០០ ទៅ៧៥០តោន នៅក្នុងឆ្នាំនេះ ខណៈកាលពីឆ្នាំមុនប្រទេសនេះធ្លាប់មានការប្រើប្រាស់មាសប្រមាណ ៧៦១តោន៕

អត្ថបទ៖ សុខ មង្គល