ឧស្សាហកម្មស៊ីម៉ងត៍នៅវៀតណាម កំពុងជួបបញ្ហាការផលិតលើសតម្រូវការ
ឧស្សាហកម្មស៊ីម៉ងត៍នៅប្រទេសវៀតណាម ដែលជាអ្នកក្បែរខាងកម្ពុជា កំពុងជួបបញ្ហាការផលិតលើសតម្រូវការ ដែលធ្វើឱ្យឧស្សាហកម្មនេះ មានការប្រកួតប្រជែងដណ្តើម…
រដ្ឋាភិបាលឥណ្ឌានឹងមិនបន្តកម្មវិធីឧបត្ថម្ភធន ដែលមានទំហំ២៣ពាន់លានដុល្លារ ឱ្យលើសពីវិស័យ ដែលកំពុងសាកល្បងចំនួន១៤ នោះទេ ហើយកាលបរិច្ឆេទនៃការផលិត ក៏មិនត្រូវបានពន្យារពេលទៀតនោះដែរ ទោះជាមានការស្នើសុំពីក្រុមហ៊ុនដែលចូលរួមមួយចំនួនក៏ដោយ។
បើយោងតាមរបាយការណ៍សាធារណៈ បានបង្ហាញថា ក្រុមហ៊ុនប្រមាណ៧៥០ រួមទាំងក្រុមហ៊ុន Foxconn ដែលផ្គត់ផ្គង់ឱ្យក្រុមហ៊ុន Apple និងក្រុមហ៊ុនឥណ្ឌា Reliance Industries ផង បានចុះហត្ថលេខាលើគម្រោងផ្តួចផ្តើមពាក់ព័ន្ធនឹងផលិតកម្មមួយនេះ។
ក្រុមហ៊ុនជាច្រើនទទួលបានការសន្យាជុំវិញការទទួលបានការទូទាត់សាច់ប្រាក់ពីរដ្ឋាភិបាលប្រសិនបើពួកគេបំពេញតាមគោលដៅផលិតកម្ម និងពេលវេលាកំណត់រៀងៗខ្លួន ហើយក្តីសង្ឃឹមក្នុងការទទួលបានថវិកានេះបានបង្កើនចំណែកផលិតកម្មនៅក្នុងសេដ្ឋកិច្ចដល់២៥% នៅឆ្នាំនេះ។ តែយ៉ាងណាក្រុមហ៊ុនជាច្រើនដែលបានចូលរួមក្នុងកម្មវិធីនេះ បានបរាជ័យក្នុងការចាប់ផ្តើមផលិតកម្មរបស់ពួកគេ ខណៈក្រុមហ៊ុនដែលបំពេញតាមគោលដៅផលិតកម្មបានជួបបញ្ហា រដ្ឋាភិបាលឥណ្ឌា មានភាពយឺតយ៉ាវក្នុងការទូទាត់ប្រាក់ឧបត្ថម្ភធន។
គួរបញ្ជាក់ថា គិតត្រឹមខែតុលា ឆ្នាំ២០២៤ ក្រុមហ៊ុនដែលទទួលបានការឧបត្ថម្ភធនពីរដ្ឋាភិបាលឥណ្ឌា ផលិតទំនិញបានមានតម្លៃសរុបជិត១៥២ពាន់លានដុល្លារ ឬ៣៧% នៃគោលដៅដែលរដ្ឋាភិបាលក្រុងញូវដេលី បានកំណត់។ មកទល់ពេលនេះ រដ្ឋាភិបាលឥណ្ឌា ទើបបានចេញប្រាក់លើកទឹកចិត្តបានជិត២ពាន់លានដុល្លារប៉ុណ្ណោះ ឬតិចជាង៨%នៃមូលនិធិដែលត្រូវបែងចែក។ ទោះយ៉ាងណា មកដល់ពេលនេះ ការិយាល័យរដ្ឋាភិបាលរបស់លោក ម៉ូឌី និងក្រសួងពាណិជ្ជកម្ម ដែលគ្រប់គ្រងកម្មវិធីនេះមិនបានឆ្លើយតប ឬបញ្ជាក់ពីដំណឹងនៃការផ្អាកគម្រោងខាងលើនេះនៅឡើយទេ៕
អត្ថបទ៖ សុខ មង្គល
