ធនាគារពិភពលោកដំឡើងការព្យាករណ៍កំណើនសេដ្ឋកិច្ចសម្រាប់អាស៊ីបូព៌ា និងប៉ាស៊ីហ្វិក តែព្រមានពីការប្រមូលផ្តុំការពឹងផ្អែកខ្លាំងលើ AI

ប៉ុន្តែធនាគារពិភពលោកបានសង្កត់ធ្ងន់ៗថា ការប្រមូលផ្តុំកំណើនសេដ្ឋកិច្ចតែលើបច្ចេកវិទ្យា AI តែមួយ អាចនឹងធ្វើឱ្យអាស៊ីបាត់បង់សរសរស្តម្ភសេដ្ឋកិច្ចសំខាន់ៗផ្សេងទៀត និងងាយរលំនៅពេលទីផ្សារបច្ចេកវិទ្យាសកលជួបបញ្ហា។
យោងតាមរបាយការណ៍ចុងក្រោយរបស់ធនាគារពិភពលោក សេដ្ឋកិច្ចតំបន់អាស៊ីបូព៌ា និងប៉ាស៊ីហ្វិកត្រូវបានព្យាករថា នឹងកើនឡើង៤,៥%នៅឆ្នាំនេះ គឺខ្ពស់ជាងការព្យាករណ៍កាលពីខែមេសា ០,៣%។ ប៉ុន្តែកំណើននេះនឹងចាប់ផ្តើមថយចុះមកនៅត្រឹម៤,៤% នៅឆ្នាំ២០២៧ និង៤,៣% នៅឆ្នាំ២០២៨។ អ្វីដែលគួរឱ្យភ្ញាក់ផ្អើលនោះ គឺប្រសិនបើកាត់ផ្ដាច់ទំនិញដែលពាក់ព័ន្ធនឹង AI ចេញ កំណើនពាណិជ្ជកម្មអាស៊ី គឺស្ទើរតែស្មើសូន្យ ឬអវិជ្ជមានតែម្តង។
ទំនិញបច្ចេកវិទ្យា AI មានចំណែកលើសពាក់កណ្តាលនៃកំណើននាំចេញសរុប ហើយថែមទាំងក្តោបក្តាប់រហូតដល់ទៅជាង៧០% នៅក្នុងប្រទេសភាគច្រើនដូចជាម៉ាឡេស៊ី ហ្វីលីពីន ថៃ និងវៀតណាម។ នៅក្នុងរយៈពេល១២ខែចុងក្រោយនេះ ចិន ឥណ្ឌូណេស៊ី ម៉ាឡេស៊ី ហ្វីលីពីន ថៃ និងវៀតណាមបានស្រូបទាញចំណូលពីការនាំចេញទំនិញពាក់ព័ន្ធនឹង AI រហូតដល់ទៅ១,៤ទ្រីលានដុល្លារ។
ប៉ុន្តែធនាគារពិភពលោកបានទាញអាសន្នសញ្ញាថា ការហក់ឡើងនៃវិស័យ AI លើកនេះមានល្បឿនលឿន និងចាក់លុយខ្លាំងជាងរលកបច្ចេកវិទ្យាណាៗទាំងអស់ក្នុងប្រវត្តិសាស្ត្រ។ បច្ចុប្បន្នការចំណាយលើវិស័យ AI បានស្ទុះឡើងស្មើនឹង៦% នៃ GDP របស់សហរដ្ឋអាម៉េរិកដែលជាកម្រិតខ្ពស់បំផុតមិនធ្លាប់មាន។ ចាប់ពីឆ្នាំ២០២៥ ដល់ឆ្នាំ២០២៨ ការចំណាយលើបច្ចេកវិទ្យា AI ពិភពលោក ត្រូវបានរំពឹងថា នឹងហក់ឡើងដល់ទៅ២,៩ទ្រីលានដុល្លារ។
ប្រសិនបើថ្ងៃណាមួយការចំណាយលើ AI របស់ពិភពលោកស្រាប់តែគាំង ឬធ្លាក់ចុះ នោះសេដ្ឋកិច្ចតំបន់អាស៊ីបូព៌ា និងប៉ាស៊ីហ្វិក នឹងប្រឈមមុខនឹងវិបត្តិដ៏ធ្ងន់ធ្ងរ ដោយសារតែគ្មានសរសរស្តម្ភសេដ្ឋកិច្ចផ្សេងទៀតមកជួយទ្រទ្រង់ទាន់ពេលវេលា៕

ដោយៈ សរ សុជាតិ