ឥណ្ឌូនេស៊ី កំពុងសម្លឹងពង្រីកការធ្វើពាណិជ្ជកម្មជាមួយ BRICS ក្រោយរងសម្ពាធពីអាម៉េរិក

ឥណ្ឌូនេស៊ី ដែលបានរងសម្ពាធពន្ធបដិការ៣២% ពីសហរដ្ឋអាម៉េរិក កំពុងពង្រីកការផ្តោតសំខាន់លើទីផ្សារនាំចេញរបស់ខ្លួនជាមួយនឹងក្រុមប្រទេសសមាជិក BRICS និងបណ្តាប្រទេសនៅក្នុងកិច្ចព្រមព្រៀង CPTPP។ រដ្ឋមន្ត្រីសម្របសម្រួលទទួលបន្ទុកកិច្ចការសេដ្ឋកិច្ចលោក អ៊ែឡានហ្គា ហាតាតូ ( Airlangga Hartarto) បានលើកឡើងក្នុងសន្និសីទស្តីពីការអភិវឌ្ឍន៍ការចរចាពាណិជ្ជកម្មឥណ្ឌូណេស៊ី និងអាម៉េរិក ថ្មីៗនេះថា ឥណ្ឌូនេស៊ី ដែលទើបចូលរួមជាមួយ BRICS កំពុងដាក់ពាក្យចូលរួមជាមួយ CPTPP។

រដ្ឋមន្ត្រីរូបនេះបានអះអាងថា ការពង្រីកទីផ្សារនេះវាស្របនឹងកិច្ចខិតខំប្រឹងប្រែង ដើម្បីបញ្ចប់កិច្ចព្រមព្រៀងពាណិជ្ជកម្មជាយុទ្ធសាស្ត្រមួយចំនួន ដូចជាកិច្ចព្រមព្រៀងភាពជាដៃគូសេដ្ឋកិច្ចទូលំទូលាយនៃសហភាពឥណ្ឌូណេស៊ី-អឺរ៉ុប (IEU-CEPA) ជាដើម។ លោកបានសង្កត់ធ្ងន់ថា ការពង្រីកទីផ្សារនាំចេញទៅកាន់បណ្តាប្រទេស BRICS, CPTPP និង EU គឺជាផ្នែកមួយនៃយុទ្ធសាស្ត្ររយៈពេលវែងរបស់រដ្ឋាភិបាលឥណ្ឌូនេស៊ី ដើម្បីកាត់បន្ថយសម្ពាធពន្ធបដិការរបស់សហរដ្ឋអាម៉េរិក។

យ៉ាងណាក៏ដោយ ឥណ្ឌូណេស៊ី ក៏នឹងបន្តជំរុញឲ្យមានការចរចាពាណិជ្ជកម្មទ្វេភាគីជាមួយអាម៉េរិកផងដែរ។ មកដល់ពេលនេះ BRICS មានទីផ្សារប្រមាណជាង៣ពាន់លាននាក់ និងមាន GDP សរុបប្រមាណ ៥០ទ្រីលានដុល្លារ ចំណែក CPTPP មានទីផ្សារជាង៥០០លាននាក់ និង GDP សរុបប្រមាណ១៦ទ្រីលានដុល្លារ៕

ដោយៈ សរ សុជាតិ