តើ SME ត្រូវពង្រឹងខ្លួនបែបណា ដើម្បីអាចទទួលបានកម្ចីពីគ្រឹះស្ថានធនាគារ និងហិរញ្ញវត្ថុ?
រាជរដ្ឋាភិបាលកម្ពុជា បានចាត់ទុកវិស័យសហគ្រាសធុនតូច និងមធ្យម (SME) ជាវិស័យអាទិភាព និងជាឆ្អឹងខ្នងក្នុងការជួយគាំទ្រកំណើនសេដ្ឋកិច្ច និងលើកក…
ឥណ្ឌូនេស៊ី ដែលជាប្រទេសមានប្រជាជនច្រើនជាងគេលំដាប់ទី៤លើពិភពលោក និងមានសេដ្ឋកិច្ចធំបំផុតនៅតំបន់អាស៊ាន ធ្លាប់បានបង្ហាញបំណងចង់ចូលរួមជាមួយប្លុកប្រទេស BRICS ដើម្បីពង្រឹងបណ្ដាប្រទេសកំពុងរីកចម្រើនឆាប់រហ័ស និងពង្រីកផលប្រយោជន៍របស់ Global South ដែលសំដៅដល់បណ្ដាប្រទេសកំពុងរីកចម្រើនឆាប់រហ័សនៅអាស៊ី អាម៉េរិកខាងត្បូង និងអាហ្វ្រិក។
ប្រទេសប្រេស៊ីល ដែលជាប្រធានឆ្លាស់វេននៃប្លុកប្រទេស BRICS ក្នុងឆ្នាំ២០២៥ នេះ បាននិយាយថា បណ្ដាប្រទេសជាសមាជិកបានសម្រេចជាឯកច្ឆន្ទអនុម័តឱ្យប្រទេសឥណ្ឌូនេស៊ី ក្លាយជាសមាជិកពេញសិទ្ធិ។
ប្រទេសប្រេស៊ីល ដែលស្ថិតនៅទ្វីបអាម៉េរិកខាងត្បូង បានគូសបញ្ជាក់ថា សំណើរបស់ឥណ្ឌូនេស៊ី ទទួលបានការបើកភ្លើងខៀវពីប្លុកប្រទេស BRICS តាំងពីឆ្នាំ២០២៣ អំឡុងកិច្ចប្រជុំកំពូលរបស់ប្លុកនេះនៅទីក្រុង Johannesburg ប្រទេសអាហ្វ្រិកខាងត្បូង។ ប៉ុន្តែប្រទេសឥណ្ឌូនេស៊ី បានស្នើសុំចូលជាសមាជិកប្លុកប្រទេស BRICS នៅក្រោយការបោះឆ្នោតជ្រើសរើសប្រធានាធិបតី ដែលបានរៀបចំឡើងកាលពីឆ្នាំ២០២៤ ហើយប្រធានាធិបតីជាប់ឆ្នោតលោក ប្រាបូវ៉ូ ស៊ូប៊ីយ៉ាណូ (Prabowo Subianto) បានចូលកាន់តំណែងកាលពីអំឡុងខែតុលា។
រដ្ឋាភិបាលប្រេស៊ីល បាននិយាយថា ឥណ្ឌូនេស៊ី រួមជាមួយប្រទេសជាសមាជិកផ្សេងទៀតនៃប្លុកប្រទេស BRICS គាំទ្រការធ្វើកំណែទម្រង់នៃបណ្ដាស្ថាប័នអភិបាលកិច្ចលំដាប់ពិភពលោក និងរួមចំណែកជាវិជ្ជមានដល់ការពង្រឹងកិច្ចសហប្រតិបត្តិការឱ្យកាន់តែស៊ីជម្រៅនៅក្នុងតំបន់ Global South។ សូមបញ្ជាក់ថា សមាជិកនៃប្លុកប្រទេស BRICS ក៏រួមមានទាំងប្រទេសអេហ្ស៊ីប អេត្យូពី អ៊ីរ៉ង់ និងប្រទេសអេមីរ៉ាតអារ៉ាប់រួមផងដែរ៕
ដោយ: តែម សុខុម
