ប្រធានាធិបតីអ៊ីរ៉ង់ និងអ្នករួមដំណើរទាំងអស់ស្លាប់ក្នុងឧបទ្ទវហេតុធ្លាក់ឧទ្ធម្ភាគចក្រ

ក្រុមមន្ត្រី និងប្រព័ន្ធផ្សព្វផ្សាយរដ្ឋរបស់អ៊ីរ៉ង់បានបញ្ជាក់ថា ប្រធានាធិបតី អ៊ីប្រាហ៊ីម រ៉ៃស៊ី ដែលគេជឿថា អាចនឹងក្លាយជាអ្នកស្នងតំណែងមេដឹកនាំកំពូលរបស់អ៊ីរ៉ង់ពីលោក អាយ៉ាតូឡា អាលី ខាមេណី (Ayatollah Ali Khamenei) ពិតជាបានបាត់បង់ជីវិតក្នុងឧបទ្ទវហេតុធ្លាក់ឧទ្ធម្ភាគចក្រនៅតំបន់ភ្នំនៅជិតព្រំដែន នៃប្រទេសអាហ្ស៊ែបៃហ្សង់ (Azerbaijan) ប្រាកដមែន។

សូមបញ្ជាក់ថា បំណែកឆេះនៃឧទ្ធម្ភាគចក្រដែលបានធ្លាក់កាលពីថ្ងៃអាទិត្យ កន្លងទៅនេះត្រូវបានក្រុមសង្គ្រោះរកឃើញនៅព្រឹកថ្ងៃច័ន្ទ ទី២០ ខែឧសភា នេះ បន្ទាប់ពីប្រតិបត្តិការរុក

រកពេញមួយយប់ក្នុងស្ថានភាពព្យុះភ្លៀង។

មន្ត្រីជាន់ខ្ពស់អ៊ីរ៉ង់មួយរូបបានទម្លាយប្រាប់ប្រព័ន្ធផ្សព្វផ្សាយព័ត៌មានដោយសុំមិនបញ្ចេញឈ្មោះដោយសារវាជារឿងដ៏រសើបថា ប្រធានាធិបតីអ៊ីរ៉ង់ លោក អ៊ីប្រាហ៊ីម រ៉ៃស៊ី រួមជាមួយរដ្ឋមន្ត្រីការបរទេសអ៊ីរ៉ង់ លោក ហ៊ូសេន អាមីរ៉ាបឌុលឡាហ៊ីយ៉ាន់ និងអ្នករួមដំណើរជាមួយទាំងអស់នៅក្នុងឧទ្ធម្ភាគចក្រដែលជួបគ្រោះថ្នាក់ធ្លាក់ខាងលើបានបាត់បង់ជីវិតទាំងអស់។

បន្តិចក្រោយមក អនុប្រធានាធិបតីអ៊ីរ៉ង់លោក ម៉ូសេន ម៉ាន់សូរី (Mohsen Mansouri) បានចេញមកបញ្ជាក់តាមបណ្ដាញទំនាក់ទំនងសង្គមថា ប្រធានាធិបតី អ៊ីប្រាហ៊ីម រ៉ៃស៊ី ពិតជាបានបាត់ជីវិតមែននៅក្នុងគ្រោះថ្នាក់ធ្លាក់ឧទ្ធម្ភាគចក្រនេះ។ ទោះជាយ៉ាងណា រហូតមកទល់ពេលនេះមិនទាន់មានការបញ្ជាក់ជាផ្លូវការអំពីមូលហេតុនៃការធ្លាក់ឧទ្ធម្ភាគចក្រនេះនៅឡើយទេ៕

ដោយ: តែម សុខុម