វគ្គប្រកួតផ្តាច់ព្រ័ត្រឆ្នាំនេះធ្វើឡើងនៅខេត្តព្រះសីហនុ ហើយវិទ្យាល័យ ហ៊ុន សែន កំពង់សិលា ខេត្តព្រះសីហនុ ទទួលបានជ័យលាភីលេខ១ ក្នុងវេទិកាយុវជនជជែកពិភាក្សាអំពីបរិស្ថាននៅឆ្នាំ២០២២ នេះ ខណៈវិទ្យាល័យ ហ៊ុន សែន ព្រៃនប់ ទទួលបានជ័យលាភីលេខ២ និងវិទ្យាល័យ ហ៊ុន សែន បាក់ខ្លង ជាប់ចំណាត់ថ្នាក់លេខ៣។ វេទិកាយុវជនជជែកពិភាក្សាអំពីបរិស្ថានឆ្នាំ២០២២ ត្រូវបានរៀបចំឡើងដោយក្រសួងបរិស្ថាន សហការជាមួយក្រសួងអប់រំ យុវជន និងកីឡា។ ក្រុមហ៊ុន Smart Axiata គឺជាអ្នកឧបត្ថម្ភធំមួយក្នុងចំណោមអ្នកឧបត្ថម្ភផ្សេងទៀត។
វេទិកាយុវជនជជែកពិភាក្សាអំពីបរិស្ថានឆ្នាំ២០២២ បានរៀបចំធ្វើឡើងចាប់ពីខែមិថុនាដល់ខែសីហាឆ្នាំ២០២២។ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន និងឯកឧត្តម ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ បានអញ្ជើញចូលរួមជាមួយភាគីពាក់ព័ន្ធមួយចំនួនទៀតនៅក្នុងវេទិការនេះ។
ឯកឧត្តម នេត្រ ភក្ត្រា បានមានប្រសាសន៍ថា៖ «ព្រះរាជាណាចក្រកម្ពុជាមានការរីកចម្រើនយ៉ាងឆាប់រហ័សដោយសារមានសន្តិភាព និងស្ថិរភាពនយោបាយជាបន្តបន្ទាប់។ រាជរដ្ឋាភិបាលក៏កំពុងពិចារណាអំពីការអភិវឌ្ឍប្រកបដោយការទទួលខុសត្រូវ និងនិរន្តរភាពផងដែរ ដូចដែលអនុវត្តចំពោះកំណើនសង្គម-សេដ្ឋកិច្ច។ ការគិតគូរអំពីបរិស្ថាននៅតែបន្តនាំមុខគេចំពោះវិស័យសាធារណៈ និងឯកជន ដូច្នេះហើយបានជាយើងរៀបចំវេទិកាយុវជននេះឡើង»។
លោក Feiruz Ikhwan នាយកប្រតិបត្តិស្តីទីរបស់ក្រុមហ៊ុន Smart Axiata មានប្រសាសន៍ថា៖ «ការអភិរក្ស និងការពារបរិស្ថានគឺជាសរសរស្តម្ភមួយនៃកម្មវិធីទំនួលខុសត្រូវសង្គមរបស់យើង។ ក្នុងនាមជាប្រតិបត្តិករទូរស័ព្ទចល័តឈានមុខគេនៅកម្ពុជា ក្រុមហ៊ុន Smart Axiata តែងតែខិតខំព្យាយាមឱ្យមាននិរន្តរភាពនៅក្នុងគម្រោង និងកម្មវិធីទាំងអស់របស់យើង។ យើងក៏ចង់លើកទឹកចិត្តយុវជនកម្ពុជាឱ្យចូលរួមក្នុងការការពារធនធានធម្មជាតិ ការអភិរក្សជីវចម្រុះ និងការរស់នៅប្រកបដោយនិរន្តរភាព ដើម្បីជាប្រយោជន៍រួម ដូច្នេះហើយបានជាយើងគាំទ្រវេទិកានេះ»។
វេទិកានេះផ្តល់ឱ្យយុវជននូវឱកាសមួយដើម្បីសិក្សា ស្រាវជ្រាវ និងផ្លាស់ប្តូរចំណេះដឹង និងបទពិសោធជាមួយអ្នកជំនាញបរិស្ថាន។ នៅក្នុងដំណើរការនេះ យើងសង្ឃឹមថា យុវជននឹងមានការយល់ដឹងកាន់តែច្បាស់អំពីរបៀបគ្រប់គ្រងបរិស្ថាន។
ប្រធានបទចំនួនបីត្រូវបានលើកយកមកពិភាក្សានៅក្នុងវគ្គផ្តាច់ព្រ័ត្រនេះ ដែលរួមមាន ការអប់រំបរិស្ថាននៅវត្តអារាមមានប្រសិទ្ធភាពក្នុងការផ្លាស់ប្តូរឥរិយាបទស្រលាញ់បរិស្ថានជាងនៅសាលារៀន, សំណល់ប្លាស្ទិកគឺជាប្រភពចម្បងនៃការបំពុលបរិស្ថានសមុទ្រ និងការបង្កើតមុខរបរឱ្យសហគមន៍មូលដ្ឋានបានចូលរួមចំណែកដល់ការអភិរក្សជីវៈចម្រុះ។
ក្រុមហ៊ុន Smart Axiata កំពុងចូលរួមចំណែកយ៉ាងសកម្មក្នុងការឆ្លើយតបនឹងបញ្ហាអាកាសធាតុបន្ទាន់ តាមរយៈការពិនិត្យតាមដាន និងគ្រប់គ្រងបរិមាណកាបូនដែលបញ្ចេញដោយក្រុមហ៊ុន ពោលគឺជាផ្នែកមួយនៃកិច្ចខិតខំប្រឹងប្រែងរបស់ក្រុមហ៊ុនក្នុងការលើកកម្ពស់និរន្តរភាព។
កាលពីដើមឆ្នាំនេះ ក្រុមហ៊ុន Smart Axiata គឺជាអ្នកឧបត្ថម្ភធំមួយក្នុងកម្មវិធី “ទិវាមួយម៉ោងសម្រាប់ភពផែនដី” នៅកម្ពុជា ដែលមានការជួបជុំគ្នារវាងក្រសួងនានារបស់រាជរដ្ឋាភិបាល សហគមន៍មូលដ្ឋាន យុវជន អង្គភាពសាធារណៈនិងឯកជន អង្គការមិនមែនរដ្ឋាភិបាល ប្រព័ន្ធផ្សព្វផ្សាយ និងប្រជាពលរដ្ឋនៅទូទាំងប្រទេសកម្ពុជា ដើម្បីបង្ហាញសកម្មភាពរបស់ពួកគេឆ្ពោះទៅរកអនាគតដែលកាន់តែមានសុខភាពល្អនិងកាន់តែប្រសើរសម្រាប់ទាំងអស់គ្នា។
សម្រាប់ព័ត៌មានបន្ថែមអំពីកិច្ចប្រឹងប្រែងទាក់ទងនឹងបរិស្ថានរបស់ក្រុមហ៊ុន Smart Axiata សូមតាមដានទំព័រហ្វេសប៊ុក Smart for Cambodia តាមរយៈគេហទំព័រ www.facebook.com/smartforcambodia៕
