អ៊ីស្រាអែល គ្រោងចំណាយជិត១០០ពាន់លានដុល្លារអាម៉េរិក ជីកព្រែកដ៏ធំមួយ ដើម្បីប្រជែងនឹងព្រែកជីកស៊ុយអេ

គម្រោងព្រែកជីកដែលមានឈ្មោះថា បេន-ហ្គូរៀន ខានែល (Ben-Gurion Canal) របស់ប្រទេសអ៊ីស្រាអែល នឹងក្លាយជាផ្លូវដឹកជញ្ជូនតាមផ្លួវទឹកដ៏សំខាន់ដែលអាចប្រជែងនឹងព្រែកជីកស៊ុយអេ របស់អេហ្ស៊ីប ខណៈដែលប្រទេសអេហ្ស៊ីបបានគ្រប់គ្រងផ្ដាច់មុខយូរណាស់មកហើយលើព្រែកជីកស៊ុយអេ ដែលជាផ្លូវទឹកដ៏មានសារសំខាន់តភ្ជាប់រវាងអាស៊ី និងអឺរ៉ុប។

គម្រោងព្រែកជីកថ្មីនេះនឹងចាប់ផ្តើមពីទីក្រុងកំពង់ផែអេឡាត នៃប្រទេសអ៊ីស្រាអែល នៅលើសមុទ្រក្រហមឆ្លងកាត់ព្រំដែនប្រទេសហ្ស៊កដានី រត់កាត់តាមជ្រលងអារ៉ាបា ហើយរត់ចូលទៅកាន់សមុទ្រមរណៈមុនពេលរត់បន្តរហូតដល់សមុទ្រមេឌីទែរ៉ាណេនៅចុងបញ្ចប់។

សូមបញ្ជាក់ថា ព្រែកជីកថ្មីនេះនឹងមានជម្រៅជ្រៅជាងព្រែកជីកស៊ុយអេរបស់អេហ្ស៊ីប ដល់ទៅ១០ម៉ែត្រ ដែលអាចឱ្យកប៉ាល់ធំៗបំផុតរបស់ពិភពលោកដែលមានទទឹងរហូតដល់ទៅ១១០ម៉ែត្រ និងបណ្ដោយ៣០០ម៉ែត្រឆ្លងកាត់យ៉ាងងាយស្រួល។

ទោះជាយ៉ាងណា មិនទាន់មានការបញ្ជាក់ពីកាលបរិច្ឆេទចាប់ផ្ដើម និងបញ្ចប់ការជីកព្រែកថ្មីនេះនៅឡើយទេ ខណៈដែលមានការព្រួយបារម្ភយ៉ាងខ្លាំងផ្នែកសន្តិសុខដោយសារតែជម្លោះកំពុងបន្តកើតមាននៅក្នុងតំបន់៕

ដោយ: តែម សុខុម